«اتامەكەن» كاسىپكەرلەر پالاتاسى تاراپىنان قولعا الىنىپ جاتقان قارجىلاي جانە قارجىلاي ەمەس قولداۋلار ءوز جەمىسىن بەرىپ كەلەدى. سولاردىڭ ءبىرى – «باستاۋ» جوباسى. «باستاۋ» باستالعالى وبلىستا 4070 ادام كاسىپكەرلىك نەگىزدەرى كۋرسىنان ءوتىپ، ولاردىڭ 2363 ءوز كاسىبىن اشۋىنا مۇمكىندىك الدى. جاقىندا وسى باعدارلاما بويىنشا جاڭا وقۋ كەزەڭى باستالىپ، وعان ۇمىتكەرلەر جينالدى. بۇل جونىندە وبلىستىق كاسىپكەرلەر پالاتاسىنىڭ باسپا ءسوز قىزمەتى حابارلادى.

جوباعا ءوزىن-وزى جۇمىسپەن قامتىپ وتىرعان جانە جۇمىسپەن قامتۋ ورتالىعىندا تىركەلسە دە تىركەلمەسە دە جۇمىسسىز جۇرگەن ازاماتتار قاتىسا الادى. وقۋعا قاتىسقان ازاماتتار كاسىپكەرلىك نەگىزدەرى بويىنشا بىلىكتىلىكتەرىن جەتىلدىرۋمەن قاتار وزدەرىنىڭ بيزنەس-جوسپارلارىن ازىرلەپ شىعادى. وقۋدى ءساتتى اياقتاعان سوڭ بيزنەس-جوسپارلارىن وڭىردەگى قارجى ينستيتۋتتارى: «اۋىل شارۋاشىلىعىن قارجىلاي قولداۋ قورى» اكسيونەرلىك قوعامى وبلىستىق فيليالى مەن «اتامەكەن تاراز» جاۋاپكەرشىلىگى شەكتەۋلى سەرىكتەستىگىنە ۇسىنا الادى. بۇل جوبالار ومىرشەڭ دەپ تانىلسا اتالمىش قارجى ۇيىمدارى 6 پايىزبەن 8000 ايلىق ەسەپتىك كورسەتكىشكە (بيىلعى جىلعى كورسەتكىشپەن 20 200 000 تەڭگە) دەيىن نەسيە الا الادى. وقۋ اقىسىن مەملەكەت وتەيدى جانە قاتىسۋشىلارعا ستيپەنديا تولەنەدى.

– وقۋ پروسەسىنىڭ جالپى مەرزىمى – 20 جۇمىس كۇنى. وقۋ كەزىندە ترەنەرلەر جەكەلەگەن كەڭەستەر بەرىپ، ءوز جوباڭدى قارجىلاندىرۋ ۇيىمدارىنىڭ الدىندا ءساتتى قورعاپ شىعۋىڭىز ءۇشىن كوپشىلىك الدىندا سويلەۋ مانەرىنە باۋليدى. وقۋدى اياقتاعان سوڭ جوبا قاتىسۋشىلارىنا سەرتيفيكاتتار بەرىلەدى. سەرتيفيكات ەكى ءتۇرلى بولادى. اۋداندىق، وبلىستىق كوميسسيا الدىندا بيزنەس-جوباسىن ءساتتى قورعاي العان جاعدايدا جوبانى بىتىرگەندىگى جونىندە، ال ەكىنشىسى – كوميسسيا الدىندا جوباسىن قورعاي الماعان جاعدايدا وقۋعا قاتىسقاندىعى جونىندە بەرىلەتىن سەرتيفيكات. وقۋدان 3 كۇننەن ارتىق قالۋعا بولمايدى. وقۋدان سەبەپسىز قالعان ازاماتتار كوميسسيانىڭ شەشىمىمەن شىعارىلادى. وقۋدى ءبىتىرىپ، سەرتيفيكات العان سوڭ 1 جولعى سەرتيفيكات بەرىلەدى. ول سەرتيفيكات «ەڭبەك» ناتيجەلى جۇمىسپەن قامتۋ جانە جاپپاي كاسىپكەرلىكتى دامىتۋدىڭ 2017-2021 جىلدارعا ارنالعان» باعدارلاماسى اياسىندا نەسيە راسىمدەۋگە جانە 100 نەمەسە 200 ايلىق ەسەپتىك كورسەتكىش كولەمىندە گرانت الۋعا قاجەت اشادى، – دەيدى «باستاۋ» جوباسىنىڭ وبلىستىق كاسىپكەرلەر پالاتاسىنىڭ ساراپشىسى ءارى جوبانىڭ ۇيلەستىرۋشىسى دانا ەرالييەۆا.

«باستاۋ» جوباسى «ناتيجەلى جۇمىسپەن قامتۋ جانە جاپپاي كاسىپكەرلىكتى دامىتۋدىڭ 2017-2021 جىلدارعا ارنالعان» باعدارلاماسىنىڭ ەكىنشى باعىتىنا كىرەدى. بۇل جوباعا قاتىسۋ ءۇشىن نيەت ءبىلدىرۋشى ازامات جۇمىسپەن قامتۋ ورتالىعىنا نەمەسە كاسىپكەرلەر پالاتاسىنىڭ اۋداندارداعى فيليالىنا، سونداي-اق ءوزى تۇراتىن اۋىلدىق وكرۋگ اكىمشىلىگىنە ءوتىنىش بەرە الادى. نيەت ءبىلدىرۋشىنىڭ ماقساتتى توپقا جاتاتىندىعىن انىقتايتىن – جۇمىسپەن قامتۋ ورتالىعى. ورتالىق ءتىزىمدى پالاتانىڭ فيليالىنا وتكىزەدى. ودان ءارى پالاتا اتالمىش ازاماتتاردىڭ كاسىپكەرلىك الەۋەتىن انىقتاۋ ماقساتىندا تەستتەن وتكىزەدى. تەستتەن وتكەن ازاماتتار جوبانىڭ قاتىسۋشىسى اتانادى.