ىقىلاس دۇكەن ۇلى اتىنداعى تاراز قالالىق مادەنيەت ۇيىندە قالا پروكۋراتۋراسى مەن قالا اكىمدىگىنىڭ جۇمىسپەن قامتۋ ورتالىعىنىڭ ۇيىمداستىرۋىمەن بورىشكەرلەردەن ءناپاقا ءوندىرۋ تۇرعىسىندا بوس جۇمىس ورىندارىنىڭ جارمەڭكەسى ءوتتى،-دەپ حابارلايدى «Qamshy.kz» اقپارات اگەنتتىگى. جارمەڭكەنى وتكىزۋدىڭ ماقساتى – اليمەنت بويىنشا قارىزى بار بورىشكەرلەردى جۇمىسقا ورنالاستىرۋ.

شارانىڭ اشىلۋىندا تاراز قالاسى اكىمى اپپاراتىنىڭ باسشىسى بارلىباي مەيىرمانوۆ ءسوز الىپ، اتالمىش جارمەڭكەگە جۇمىس بەرۋشى مەكەمەلەردىڭ باسشىلارىن تارتا وتىرىپ، ولاردىڭ تاراپىنان ۇسىنىلعان بوس ورىندارعا جۇمىس ىزدەۋشى ازاماتتاردىڭ ورنالاسۋىنا ىقپال ەتىپ، ەڭبەك نارىعىنداعى جاعدايمەن تانىستىرۋ، ءوز بەتىنشە جۇمىس ىزدەپ تابۋعا كومەكتەسۋ جانە جۇمىس ىزدەۋگە كاسىبي باعىت-باعدار بەرۋ كەرەكتىگىن اتاپ ءوتتى.

تاراز قالاسىنىڭ تۇرعىنى اسلان قارجاۋبايەۆ دانەكەرلەۋ بويىنشا جۇمىس ىزدەپ كەلگەن. بالالارىنا ءناپاقا تابۋ ءۇشىن بۇگىنگى جارمەڭكەدەن ۇلكەن ءۇمىت كۇتىپ كەلدى. ول وسىنداي ءىس-شارالار ءجيى وتكىزىلىپ تۇرسا دەگەن تىلەگىن جەتكىزدى.

– مەنىڭ نەگىزگى ماماندىعىم دانەكەرلەۋشى. وسىعان دەيىن جۇمىس ىستەگەن جوقپىن. اجىراسقانمىن. بالالارىم بار. جاڭا جۇمىسقا ورنالاسسام پەرزەنتتەرىمە ءتيىستى قارجىنى تولەپ تۇرار ەدىم، – دەيدى ول.

جامبىل وبلىسى جەكە سوت ورىنداۋشىلارىنىڭ وڭىرلىك پالاتاسى باسشىسىنىڭ ورىنباسارى ماقسات ەلۋبايەۆتىڭ ايتۋىنشا، وبلىس بويىنشا 12700 اليمەنت تولەۋشىنىڭ ءىسى جەكە سوت ورىنداۋشىلارىنىڭ قولىندا. بۇگىندە ولاردىڭ 400-گە جۋىعى تابىسىن جاسىرىپ، تولەمنەن قاشىپ ءجۇر. ماقسات ءىلياس ۇلى مۇنداي شارالار وبلىستا العاش رەت وتكىزىلىپ وتىرعانىن، اليمەنتتەردى جيناۋ ماسەلەسىن جەڭىلدەتۋ ماقساتىندا مۇنداي شارالاردى وتكىزۋدىڭ ماڭىزى زور ەكەنىن ايتادى.

«ەڭبەك» ناتيجەلى جۇمىسپەن قامتۋدى جانە جاپپاي كاسىپكەرلىكتى دامىتۋدىڭ 2017-2021 جىلدارعا ارنالعان باعدارلاماسى اياسىندا وتكەن شاراعا 80 بورىشكەر قاتىسىپ، ونىڭ 45ء-ى جاڭا جۇمىس ورىندارىنا شاقىرتۋ الدى. جالپى جارمەڭكەگە كادر تاپشىلىعى بار 9 مەكەمە قاتىسىپ، 180 جۇمىس ورنىن ۇسىندى. جۇمىس بەرۋشىلەر بوس جۇمىس ورىندارى تۋرالى تولىق اقپارات بەرىپ، جۇمىسقا ۇمىتكەرلەردىڭ ارقايسىسىمەن اڭگىمەلەسۋ وتكىزدى.

ارينە، زاڭنىڭ اتى-زاڭ. سوندىقتان دا جاۋاپكەرشىلىكپەن قاشپاي، بەرەشەكتى وتەگەن ابزال. ال بۇل تۇرعىدا وسىنداي شارالاردىڭ ءوز پايداسىن تيگىزەتىندىگىنە سەنىم مول.