بۇگىندە تاراز قالاسىنداعى ورتالىق كوشەلەردە جول بەلگىلەرى مەن باعدارشامداردىڭ باعىتتاعىشتارى تولىقتاي رەتكە كەلتىرىلۋدە. مۇنىڭ بارلىعى دا كولىك جۇرگىزۋشىلەرى مەن جاياۋ جۇرگىنشىلەردىڭ قاۋىپسىزدىگى ءۇشىن جاسالىپ جاتقان شارالار. وسى ورايدا ءبىز وبلىستىق جەرگىلىكتى پوليسيا قىزمەتىنىڭ اكىمشىلىك پوليسيا باسقارماسى جول-تەحنيكالىق ينسپەكسيا ءبولىمىنىڭ باستىعى نيكولاي سوننان جول قاۋىپسىزدىگىن مەن قوزعالىستى قامتاماسىز ەتۋ جانە ونى جاقسارتۋدىڭ ماڭىزى ايرىقشا ەكەنىن ايتادى. بۇل ماسەلەلەردى رەتكە كەلتىرۋ ءۇشىن وبلىستىق پوليسيا دەپارتامەنتى وبلىس اۋماعىنداعى جولداردا بولاتىن كەلەڭسىزدىكتى جويۋ، جول-كولىك وقيعالارىن تۇراقتاندىرۋ جانە جول قوزعالىسىن ۇيىمداستىرۋدى جاقسارتۋ ماقساتىندا جىل باسىنان بەرى وبلىستىڭ اۆتوموبيل جولدارىنا 1 203 تەكسەرۋ جۇمىستارىن جۇرگىزىپتى.

-تەكسەرۋ بارىسىندا 13 000 شاقىرىمعا جۋىق جول قامتىلدى. ناتيجەسىندە 8 000-نان استام كەمشىلىكتەر انىقتالىپ، ول بويىنشا ءتيىستى مەكەمە باسشىلارىنا 1 203 ۇيعارىم حات جولداندى. جولدى كۇتىپ ۇستاۋدا ورىن العان كەمشىلىكتەر بويىنشا جەرگىلىكتى اتقارۋشى ورگاندارعا جانە وبلىس پەن اۋدان پروكۋراتۋرالارىنا 178 مالىمەت جىبەرىلىپ، جولداردى قاناعاتتانارلىقسىز كۇيدە ۇستاعانى جانە جول قاۋىپسىزدىگىن قامتاماسىز ەتپەگەنى ءۇشىن 88 لاۋازىمدى تۇلعا اكىمشىلىك جاۋاپكەرشىلىككە تارتىلدى.

وبلىس اۆتوجولدارىنا 2 200-گە جۋىق جول بەلگىلەرى مەن 100 مەتر جاساندى كەدىر-بۇدىر (ۆيبراتور) ورناتىلىپ، 46 500 مەتر جول بەلگىسى ەنگىزىلدى. 86 430 شارشى مەتردەن استام جول جابىندىسى جوندەلدى جانە 1 100 مەتر قورشاۋ قۇرىلعىلارى قالپىنا كەلتىرىلدى. سونىمەن قاتار رەسپۋبليكالىق ماڭىزى بار اۆتوموبيل جولدارىنداعى جول قوزعالىسىن ۇيىمداستىرۋدى جاقسارتۋ بويىنشا قابىلدانعان ءىس-شارالار ەلدى-مەكەندەردىڭ كوشە-جول جەلىلەرىنە دە قولدانىلۋدا. اعىمداعى جىلى تاراز قالاسىنداعى 135 باعدارشامنىڭ 72 پايىزىنىڭ قايتا قۇرۋ جۇمىستارى اياقتالدى، 10 نەگىزگى جول قيىلىسىندا باعىتتاردىڭ جۇمىس جۇكتەمەسىنە بايلانىستى باسقارۋ سيكلدەرىن اۆتوماتتى تۇردە وزگەرتەتىن «اقىلدى باعدارشام» جەلىلىك باعدارلاماسى ورناتىلىپ، تاراز قالاسىنىڭ باستى كوشەلەرىنىڭ وتكىزۋ قابىلەتىن ارتتىرۋ ماقساتىندا كولىكتەردىڭ 6 جولاقتى قوزعالىسى ۇيىمداستىرىلىپ جانە وڭ جاقتى بۇرىلىستار سالىندى.

سونىمەن قاتار قازىرگى ۋاقىتتا جەرگىلىكتى اتقارۋشى ورگاندارمەن بىرلەسىپ اباي جانە تولە بي دانعىلدارىنا «جاسىل تولقىن» قوزعالىستى باسقارۋدىڭ اۆتوماتتاندىرىلعان جۇيەسىن ەنگىزۋ جۇمىستارى جۇرگىزىلىپ جاتىر، – دەدى ن.سون