تاراز قالاسىندا جامبىل وبلىسىنىڭ 80 جىلدىعى جانە قازاقستان حالقى تىلدەرى كۇنى مەرەكەسىنە وراي وزگە ەتنوس وكىلدەرىنىڭ جاستارى اراسىندا ەسسە جازۋدان بايقاۋ ءوتتى. اتالمىش شارا 2019 جىلدىڭ 28 قانتارىندا وبلىس اكىمى بەكىتكەن ءىس-شارالار جوسپارىنىڭ 26 تارماعىنا سايكەس قازاقستان حالقى اسسامبلەياسىنىڭ «قازاقتانۋ» عىلىمي-اعارتۋشىلىق جوباسى اياسىندا ۇيىمداستىرىلدى.
جامبىل وبلىسى قازاقستان حالقى اسسامبلەياسى مەن وبلىس اكىمى اپپاراتىنىڭ «قوعامدىق كەلىسىم» كمم ۇيىمداستىرعان بايقاۋعا ايماقتىڭ جوعارعى وقۋ ورىندارى مەن كوللەدجدەردەن بارلىعى 60-قا جۋىق ستۋدەنت قاتىستى.
بايقاۋ مەملەكەتتىك ءتىلدىڭ ماڭىزدىلىعىن سانالى تۇردە سەزىندىرە وتىرىپ، قۇرمەتتەۋگە تاربيەلەۋ، وتانسۇيگىشتىك قاسيەتىن ارتتىرىپ، ەلىمىزدىڭ باسەكەگە قابىلەتتى جاستار قاتارىنا قوسىلۋىنا ىقپال ەتۋ، جاستاردىڭ بويىندا جوعارى الەۋمەتتىك بەلسەندىلىك پەن شىعارماشىلىق الەۋەتىن دامىتۋدى ماقسات ەتتى.
بايقاۋعا قاتىسۋشىلارعا «جامبىلىم – جەر جانناتىم» تاقىرىبىندا 1 ساعات ىشىندە قازاق تىلىندە 250 سوزدەن كەم بولماۋى ءتيىس جانە ەرەجەدە كورسەتىلگەن كريتەرييلەرگە ساي ەسسە جازۋ تالابى قويىلدى.
قازىلار القاسى جازىلعان شىعارمالاردى باعالاپ، بايقاۋ ناتەجيەسىن شىعارعانشا قاتىسۋشىلار «كونە تاراز» تاريحي-مادەني كەشەنىن ارالاپ، مۇراجاي مەن دوستىق ۇيىنە ساياحات جاسادى.
ماراپاتتاۋ سالتاناتىندا تاراز قالالىق №44 ورتا مەكتەپتىڭ قازاق ءتىلى مەن ادەبيەتى ءپانىنىڭ ءمۇعالىمى ساۋلە سىدىقوۆا ءسوز الىپ، باعالاۋ قورىتىندىسىن جاريالادى.
– قازاق تىلىندە ەسسە جازۋ وڭاي بولماعانى انىق. دەسە دە، ويتولعاۋدى باسىم كوپشىلىكتەرىڭىز وتە جاقسى دەڭگەيدە، ەرەجەدە كورسەتىلگەن كريتەرييلەرگە ساي جازىپ شىقتىڭىزدار. قازىلار القاسى جازىلعان ەسسەلەردى مۇقيات تەكسەرىپ شىقتىق. شىعارمانىڭ جوعارى ساۋاتتىلىق دەڭگەيى، تاقىرىپتىڭ ايقىن اشىلۋى، بايانداۋدىڭ ادەبي ءستيلى جانە بايقاۋ تاقىرىبىنا ساي بولۋى سىندى باستى تالاپتارعا ەرەكشە ءمان بەرىلدى، – دەدى س. ومەن قىزى.
بايقاۋ قورتىندىسى بويىنشا تاراز مەملكەتتىك پەداگوگيكالىق ۋنيۆەرسيتەتىنەن مارگاريتا گازايەۆا مەن اباي اتىنداعى جامبىل گۋمانيتارلىق كوللەدجىنەن ۋلفەدينا دۋرسۋنوۆا ءى ورىندى يەلەندى. جەڭىمپازدار باعالى سىيلىقتار مەن ديپلومدارعا يە بولدى. قالعان قاتىسۋشىلارعا جاپپاي ىنتالاندىرۋ سىيلىقتارى جانە العىس حاتتار تابىستالدى.
