«سيفرلى قازاقستان» مەملەكەتتىك باعدارلاماسىندا IT-قىزمەت كورسەتۋدى دامىتۋ ەرەكشە ماڭىزعا يە بولىپ وتىر. وسىعان وراي، «سيفرلى قازاقستان» باعدارلاماسى اياسىندا ءوڭىر كىتاپحانالارىنىڭ قوعامداعى كەڭىستىگىن دامىتۋ، ولاردى ۇزدىكسىز وزگەرىپ وتىرعان شارتتارعا بەيىمدەلۋ ماقساتىندا جامبىل وبلىسىنىڭ اكىمى ا.مىرزاحمەتوۆتىڭ باستاۋىمەن وبلىستاعى مەملەكەتتىك كىتاپحانالار جانىنان سيفرلاندىرىلعان اقپاراتتىق ورتالىقتار اشىلۋدا. «سيفرلاندىرىلعان اقپاراتتىق ورتالىق اشۋ» تۇجىرىمداماسىندا كورسەتىلگەندەي، ورتالىقتار اۋىل تۇرعىندارىن كورسەتىلەتىن ەلەكتروندىق اقپاراتتىق قىزمەت اياسىن كەڭەيتۋ، ءارتۇرلى ساناتتاعى تۇرعىنداردىڭ الەۋمەتتىك ماڭىزدى اقپاراتتار مەن انىقتامالارعا قولجەتىمدىلىگىن ارتتىرۋ، سونداي-اق شارۋا قوجالىقتارى، كاسىپكەرلىك سۋبەكتىلەرىنىڭ، باسقا دا مۇددەلى زاڭدى جانە جەكە تۇلعالاردىڭ اۋىل تۇرعىندارىمەن كەزدەسۋلەر، بيزنەس-ترەنينگتەر مەن سەمينارلار وتكىزۋ الاڭى رەتىندە پايدالانۋىنا جاعداي تۋعىزۋ ماقساتىندا ءوز قىزمەتتەرىن ۇسىنۋدا.

بۇگىنگى تاڭدا جامبىل وبلىسىندا 274 مەملەكەتتىك كىتاپحانا ءوڭىر تۇرعىندارىنا مادەني-اقپاراتتىق قىزمەت كورسەتەدى. 11 كىتاپحانا تاراز قالاسىندا شوعىرلانسا، 263 مەملەكەتتىك كىتاپحانا ءوڭىردىڭ 151 اۋىلدىق وكرۋگىندە قىزمەت اتقارادى.

2018 جىلدان باستاپ ۇستىمىزدەگى جىلدىڭ 8 ايى ىشىندە وبلىس كىتاپحانالارىنان 18 «كوۆوركينگ» جانە 112 سيفرلاندىرىلعان اقپاراتتىق ورتالىق اشىلدى. سونىمەن قاتار، 2019 جىلدىڭ سوڭىنا دەيىن جوسپارعا سايكەس 19 وكرۋگتە 20 ورتالىق ىسكە قوسىلادى جانە قوسىمشا 17 اۋىلدىق وكرۋگتەگى 19 كىتاپحانادا وسىنداي ورتالىقتار اشۋ مۇمكىندىگى بار. بۇل باعىتتا جۇيەلى جۇمىستار جۇرگىزىلۋدە.

سيفرلاندىرىلعان اقپاراتتىق ورتالىقتاردا جىلدامدىعى جوعارى ينتەرنەت جەلىسى ارقىلى ءتۇرلى اقپارات ىزدەۋ، كەڭەسشى كومەگى، قۇجاتتاردى باسىپ شىعارۋ، ينتەللەكتۋالدى قىزمەت تۇرلەرى مەن قۇجاتتاردى سيفرلى فورماتقا ەنگىزۋ، ءوز بەتىنشە جۇمىس جاساۋ ءۇشىن كومپيۋتەرلەر ۇسىنۋمەن قاتار ە.gov kz پورتالى ارقىلى مەملەكەتتىك قىزمەت تۇرلەرى كورسەتىلەدى. ونىڭ ىشىندە جوعارى سۇرانىسقا يە مەكەن-جايلىق، زەيناتاقى قورى انىقتاماسى، بالاباقشاعا كەزەكتە تۇرعانى جايلى، جىلجىمايتىن مۇلىكتەر، ازاماتتىڭ سوتتالعان نەمەسە سوتتالماعانى تۋرالى، ت.ب. انىقتامالارىن الۋعا بولادى.

سونىمەن قاتار، بۇگىنگى تاڭدا ورتالىق قىزمەتكەرلەرى http://zhambyl.cao-zhambyl.kz سايتى ارقىلى جەرگىلىكتى تۇرعىنداردى اۋىل، اۋدان، وبلىستىڭ قوعامدىق، مادەني، ەكونوميكالىق، الەۋمەتتىك ءومىرى اياسىندا جان-جاقتى اقپاراتپەن قامتاماسىز ەتۋ مۇمكىندىگىنە يە بولىپ وتىر.