نۇرسۇلتان نازاربايەۆ ەۋروپا مەن ازيا پارلامەنتتەرى سپيكەرلەرىنىڭ IV وتىرىسىندا الەمدە ءۇشىنشى دۇنيەجۇزىلىك سوعىس بولسا، بۇكىل وركەنيەت ءۇشىن سوڭعى سوعىس بولۋى مۇمكىن ەكەنىن ايتتى دەپ جازادى Qamshy.kz اقپارات اگەنتتىگى. 

"جەر شارىنا تاعى دا ءقاۋىپ ءتونىپ تۇر. ەگەر  جاپپاي قىرىپ-جويۋ بولىپ، قارۋ قولدانىپ، ءۇشىنشى دۇنيەجۇزىلىك سوعىس بولسا، بۇل ءبىزدىڭ وركەنيەتىمىز ءۇشىن سوڭعى سوعىس بولۋى ابدەن مۇمكىن. قيىندىقسىز ءومىر سۇرۋگە، ەرتەڭگى كۇنگە دەگەن قورقىنىش پەن سەنىمسىز ومىرگە، بالالارىمىز بەن نەمەرەلەرىمىزدىڭ بولاشاعىنا دەگەن ۇلكەن سۇرانىس بۇرىننان قالىپتاسقان. مۇنداي جاعدايدا جەر شارىنىڭ بارلىق تۇرعىندارى قارۋسىزدانۋ ءۇشىن جاھاندىق كۇرەسكە بەلسەنە ارالاسىپ، عالامشارداعى ءومىردى قورعاۋعا بار كۇشىن سالۋى كەرەك"، - دەيدى نازاربايەۆ.

سونداي-اق ول جاقىندا وتكەن «اسەم» جانە «ءبىر بەلدەۋ - ءبىر جول» فورۋمدارىندا رەسەي، جۇڭگو، اقش جانە ەۋروپالىق وداق اراسىنداعى ديالوگتى باستاۋدى ۇسىندى. جەردەگى بەيبىتشىلىكتىڭ ورناۋى وسى دەرجاۆالارعا بايلانىستى ەكەنىن ايتىپ، ۇلى سوعىستاردىڭ كەلىسسوزدەرمەن اياقتالاتىنىن ەسكەرتتى. 

"بۇل ەلدەردىڭ باسشىلارى ادامزاتتىڭ بولاشاعى، تۇراقتىلىق پەن قاۋىپسىزدىك ءۇشىن ەرەكشە جاۋاپكەرشىلىكتى سەزىنەتىنىنە سەنىمدىمىن. ءتورت ساياسي كوشباسشى وزدەرىنىڭ ەرىك-جىگەرىن كورسەتىپ، پلانەتاداعى شيەلەنىستى بولدىرماۋ جولدارىن تابۋى كەرەك. بۇل تەك كەلىسسوزدەر مەن ديالوگ ارقىلى عانا شەشىلەدى" ، - دەيدى نازاربايەۆ.