«راحات» اق فيرمالىق دۇكەندەرىندە جاڭا قاپتاماداعى «Almaty» كەۋەكى شوكولادى ساتىلىمعا شىقتى دەپ حابارلايدى Qamshy.kz اقپارات اگەنتتىگى.

جاڭا قاپتامادا الماتى قالاسىنىڭ ءتولقۇجاتىنا اينالعان قالانىڭ ەڭ كورىكتى جەرلەرى مەن عيماراتتارى بەينەلەنگەن.

يلليۋستراسيا اۆتورى بەلگىلى سۋرەتشى-كاريكاتۋريست -،مۇرات ءدىلمانوۆ.

«بۇرىن-سوڭدى تاۋار قاپتاماسىنا سۋرەت سالعان ەمەسپىن. بۇل العاشقى تاجىريبەم. ءوزىم قىزىلوردا وبلىسىندا دۇنيەگە كەلگەنمىن. ءۇش جاسىمدا الماتىعا كوشىپ كەلگەن كەزدە ءبىر ايداي وتباسىمىزبەن «قازاقستان» قوناقۇيىندە تۇردىق. سول كەزدەگى اسەرلەر ءالى ەسىمدە. سۋرەتتەردى بالا شاقتان قالعان العاشقى اسەر نەگىزىندە سالدىم. اسسورتي شوكولادىنىڭ قاپتاماسىندا قالاداعى ەسكى عيماراتتار عانا ەمەس، الماتىنىڭ قازىرگى جاڭا عيماراتتارى، ترامۆاي جانە مەترو بەينەلەنگەنىن بايقاعان بولارسىزدار. سۋرەتتى تولىقتاي سالىپ شىعۋعا باس-اياعى ءۇش اي ۋاقىت كەتتى. بۇل جالعىز مەنىڭ جۇمىسىم ەمەس. مەن تەك يلليۋستراسياسىن سالدىم. بۇل جوبا اياسىندا مەنىمەن بىرگە ءبىراز جاندار تەر توكتى. مۇنى ورتاق جۇمىس دەپ سانايمىن» - دەيدى مۇرات ءدىلمانوۆ.

جاقىندا عانا جاڭا قىزمەتكە كىرىسكەن «راحات» اق ماركەتينگ ديرەكتورى فاريدا اكيمبايەۆا: «جاڭا قاپتاماداعى «Almaty» شوكولادى كوپشىلىكتىڭ كوڭىلىنەن شىعادى دەگەن سەنىمدەمىز. ەسكى قاپتاماعا قاراعاندا جاڭا قاپتاما تۇستەرى اشىق، تارتىمدى، سۇيىكتى قالامىزدىڭ ناعىز بەينەسىن كورسەتىپ تۇر. سۋرەتشى مۇرات ءدىلمانوۆ الماتى كەلبەتىن كەلتىرىپ، شوكولاد قاپتاماسىن ارلەندىرىپ جىبەردى. ونىڭ سالعان سۋرەتتەرى كوڭىلىمىزدەن شىقتى. قازاقستاننىڭ ءتاتتى كامپيت-شوكولادتارى وتانىمىزدا عانا ەمەس، شەتەلدە دە كەڭىنەن تانىمال ەكەنى جاسىرىن ەمەس. كادە سىي رەتىندە كوپ تارتىلادى. جاڭا قاپتاماداعى شوكولادتى «الماتىدان بازارلىق» دەپ يگى تىلەكپەن سىيلاۋعا بولادى»-دەيدى.

«راحات» اكسيونەرلىك قوعامى – 75 جىلدىق تاريحى بار، قازاقستانداعى كونديتەرلىك ءونىم وندىرەتىن ەڭ ءىرى ءوندىرىس ورىندارىنىڭ ءبىرى.

كونديتەرلىك ونىمدەر سوعىس كەزىندە ماسكەۋ مەن حاركوۆتان كوشىرىلىپ اكەلىنگەن جابدىقتارمەن العاش رەت 1942 جىلى اراق – ليكەر شىعاراتىن زاۋىت الاڭىندا شىعارىلدى.

 «راحات» اق-ىندا 4500-گە جۋىق ادام ەڭبەك ەتەدى. وندىرىستىك قۋات الماتى جانە شىمكەنت قالالارىنداعى ەكى ءوندىرىس ورنىندا شوعىرلانعان.

ءوندىرىستىڭ جان-جاقتىلىق سيپاتى، اۋقىمدىلىعى جانە كاكاو داندەرىن قايتا وڭدەيتىن جەكە جەلىنىڭ بولۋى، وتاندىق وندىرۋشىلەرمەن سالىستىرعاندا، كاسىپورىندا كونديتەرلىك ونىمدەردىڭ الۋان ءتۇرىن شىعارۋعا مۇمكىندىك بەرەدى. بۇگىنگى تاڭدا «راحات» اق-ىنىڭ ءونىم قورجىنى 14 توپقا بولىنەتىن، 400-دەن اسا اتاۋعا يە، الۋان ءتۇرلى كونديتەرلىك ونىمدەرمەن  تولىققان.