جامبىل وبلىسىندا قازاقستان رەسپۋبليكاسىندا ءدىني ەكسترەميزم مەن تەرروريزمگە قارسى ءىس-قيمىل جونىندەگى 2018 – 2022 جىلدارعا ارنالعان مەملەكەتتىك باعدارلاماسىنا ساي دەسترۋكتيۆتى ءدىني اعىم وكىلدەرىنىڭ سانىن ازايتۋ جۇمىستاردى جۇيەلى جۇرگىزىپ كەلەدى. بۇل ورايدا، قۇقىق قورعاۋ، ءدىن ىستەرى باسقارماسى، ءدىن پروبلەمالارىن زەرتتەۋ ورتالىقتارى مەن ازاماتتىق قوعام ينستيتۋتتارى اراسىندا جۇيەلى بايلانىس ورناتىلعان، دەپ جازادى Qamshy.kz اقپارات اگەنتتىگى. 

بۇل ورايدا وبلىستاعى بارلىق اۋدان تۇرعىندارى اراسىندا تەولوگ-مامانداردىڭ قاتىسۋىمەن «ءدىن مەن ءداستۇر ساباقتاستىعى»، «ءسىز ءدىني ساۋاتتىسىزبا؟» تاقىرىپتارىندا كەزدەسۋلەر ۇيىمداستىرىپ تۇرادى. ال ءبىرقاتار اۋدانداردا مەملەكەتتىك الەۋمەتتىك تاپسىرىس شەڭبەرىندە ءدىن سالاسىنداعى وزەكتى ماسەلەلەرگە ازاماتتىق قوعام ينستيتۋتتارىن تارتۋ تاجىريبەسى قالىپتاسقان.

–ماسەلەن جۋالى اۋدانى مەن تاراز قالاسى اكىمدىكتەرى ۇكىمەتتىك ەمەس ۇيىم وكىلدەرىن تارتا وتىرىپ، ايماقتاعى ءدىن سالاسىنداعى وتكىر ماسەلەلەردى تەرەڭنەن زەرتتەۋدە. سونداي-اق مۇندا بىلىكتى تەولوگ مامانداردىڭ كومەگىمەن دەسترۋكتيۆتى ءدىني باعىتتاعى ازاماتتاردى وڭالتۋ جۇمىستارى دا ءوز ناتيجەسىن بەرۋدە. وتكەن جىلى تاراز قالاسىندا تەرىس ءدىني اعىمنىڭ جەتەگىنە ەرگەن 5 ازامات ال جۋالى اۋدانىندا 3 ازامات قوعامعا قايتا بەيىمدەلگەن. بۇل جۇمىستاردا دۇرىس باعىت باعدار بەرۋدە ءدىن ىستەرى باسقارماسى مەن ءدىن پروبلەمالارىن زەرتتەۋ ورتالىعىنىڭ ماماندارى دا اۋدانداردا ءىسساپارلاردا بولىپ، ءاقپاراتتىق-تۇسىندىرۋ جۇمىستارى مەن ادىستەمەلىك كومەكتەردى تۇراقتى تۇردە كورسەتىپ كەلەدى،–دەيدى وبلىس اكىمدىگى ءدىن ىستەرى باسقارماسىنىڭ باسشىسى جانگەلدى وماروۆ.

ال قازاقستان مۇسىلماندار ءدىني باسقارماسىنىڭ وبلىستاعى وكىلى، «ھيباتۋلا تارازي» ورتالىق مەشىتىنىڭ باس يمامى قانات جۇماعۇل وڭىردە قازاقستان رەسپۋبليكاسىندا ءدىني ەكسترەميزم مەن تەرروريزمگە قارسى ءىس-قيمىل جونىندەگى 2018 – 2022 جىلدارعا ارنالعان مەملەكەتتىك باعدارلاماسىن ىسكە اسىرۋدا يسلام ءدىنى سالاسىنىڭ وكىلدەرىمەن جۇرگىزىلگەن جۇمىستىڭ اۋقىمدىلىعىن العا تارتادى.

–وبلىس اۋماعىندا تەرىس اعىمدا جۇرگەن ازاماتتارمەن مەشىتتەردە 498 جالپى كەزدەسۋ جانە 109 جەكە كەزدەسۋ ءوتتى. بۇل كەزدەسۋلەرگە 24 988 ادام قامتىلدى. سولاردىڭ ىشىنەن 8 ادام حانافيگە ورالسا، 28ء-ى ەكى ويلى كۇيدە قالىپ وتىر. قازىرگى تاڭدا ولارمەن جۇمىس جاسالىپ جاتىر سونداي تاراز قالاسى مەن ونىڭ اۋماعىندا ورنالاسقان 158/1، 158/2، 158/4، 158/5، 158/7 تۇزەتۋ مەكەمەلەرىندە جىل باسىنان بەرى 10 يمام جەكە جانە جالپى كەزدەسۋلەر وتكىزدى. بۇل جۇمىستار تۇزەتۋ مەكەمەلەرىندەگى تەرىس اعىمدار جۇرگەندەردى قوعامعا قايتا باۋلۋ ماقساتىندا جۇرگىزىلىپ كەلەدى، –دەيدى ق.جۇماعۇل.