جامبىل وبلىسىندا يسلام ءدىنى سالاسى ماماندارىنىڭ بىلىكتىلىگىن جەتىلدىرۋ، ءدىني ءبىلىمىن ارتتىرۋ جۇمىستارى جاندانىپ كەلەدى. بۇل ماقساتتا «ھيباتۋلا تارازي» ورتالىق مەشىتىنىڭ جانىنا ساۋات اشۋ كۋرستارى، ءدىني ءبىلىم جانە كادر دايىنداۋ بولىمدەرى، يمامداردىڭ ءبىلىمىن جەتىلدىرۋ ينستيتۋتتارى جۇمىس جاساۋدا، دەپ جازادى Qamshy.kz اقپارات اگەنتتىگى. 

وڭىردە اسىرەسە دەسترۋكتيۆتى ءدىني اعىمدارعا قارسي يممۋنيتەت قالىپتاستىرۋعا باسا ءمان بەرىلۋدە. سايكەسىنشە قۇزىرەتىنە ءدال وسى اعىمنىڭ الدىن الۋ كىرەتىن ءدىن وكىلدەرىن وقىتۋ، بىلىكتىلىگىن ارتتىرۋ جۇمىستارى جولعا قويىلعان.

–وبلىس اكىمدىگى ءدىن پروبلەمالارىن زەرتتەۋ ورتالىعىنىڭ مەملەكەتتىك الەۋمەتتىك تاپسىرىسى اياسىندا دەسترۋكتيۆتى ءدىني يدەولوگياعا قارسى يممۋنيتەت قالىپتاستىرۋ ماقساتىندا وبلىس يمامدارىنىڭ بىلىكتىلىگىن ارتتىرۋ سەمينارى ۇيىمداستىرىلدى. «ھيباتۋللا تارازي» مەشىتىندە وتكەن بۇل ەكى اپتالىق وقۋ سەمينارىنا 129 ءدىن قىزمەتكەرى قاتىستى. سونداي-اق، دەسترۋكتيۆتى اعىمنىڭ الدىن الۋ ماقساتىندا مەشىت جاماعاتىنىڭ ءبىلىم دەڭگەيىن كوتەرۋ باعىتىندا 24 تالاپكەر قاتىسقان 1 ايلىق ساۋات اشۋ كۋرستارى اشىلىپ وتىر. سونداي-اق ءدىن قىزمەتكەرىنىڭ جان-جاقتى ءبىلىمدى بولۋى زامان تالابى ەكەنىن ەسكەرە وتىرىپ، ورتالىق مەشىت جانىنان ءدىني ءبىلىم جانە كادر دايىنداۋ ءبولىمىنىڭ جۇمىسى جولعا قويىلدى. جىل باسىنان بەرى يمامداردىڭ ءبىلىمىن جەتىلدىرۋ ينستيتۋتىنىڭ 2 ايلىق كۋرسىنان ءبىزدىڭ وبلىستان 6 يمامى ءبىلىمىن جەتىلدىردى. وڭىردەگى مەشىتتەردە يمام قىزمەتىنە نيەت بىلدىرگەن 2 ازامات ساۋاتىن اشتى، –دەيدى قازاقستان مۇسىلماندار ءدىني باسقارماسىنىڭ وبلىس بويىنشا وكىلى، «ھيباتۋلا تارازي» مەشىتىنىڭ باس يمامى قانات جۇماعۇل.

جالپى ءوڭىردىڭ قىرعىزستانمەن شەكارالاس اۋماقتارىندا دەسترۋكتيۆتى ءدىني اعىم وكىلدەرىنىڭ كوبەيۋى، جات اعىمداردى ۋاعىزداردى ناسيحاتتايتىن ءدىني ادەبيەتتەردىڭ ەركىن اينالىمى سىندى ارەكەتتەر بەلەڭ الۋدا. سوعان قاراماستان يسلام ءدىنىنىڭ وكىلدەرى بۇل اعىمدارعا ساۋاتتى توسقاۋىل بەرۋ، ولارعا وتكەن ازماتتاردى قوعامعا قايتا بەيىمدەۋ ماسەلەسىن ءجىتى نازاردا ۇستايدى. ءارى بۇل جۇمىستاردى جۇيەلى جۇرگىزەتىن ءدىن وكىلدەرىنىڭ ءبىلىمىن جەتىلدىرۋ دە وزەكتىلىگىمەن كۇن تارتىبىنەن تۇسكەن ەمەس. بۇل جۇمىستاردا قازاقستان مۇسىلماندار ءدىني باسقارماسى، وبلىس اكىمدىگىنىڭ ءدىن ىستەر باسقارماسى، ءدىن پروبلەمالارىن زەرتتەۋ ورتالىعى، «ھيباتۋلا تارازي» وبلىستىق ورتالىق مەشىتتىڭ يمامدارى بىرلەسە كۇش بىرىكتىرىپ ارەكەت ەتۋدە.