بۇگىندە تۇتاس جامبىل وبلىسى اۋداندارىنىڭ، تۇپكىر-تۇپكىردەگى ەلدى مەكەندەردىڭ ورتا بۋىندى اۋىل شارۋاشىلىق ماماندارىنا سۇرانىسىن وتەپ كەلە جاتقان قۇلان اۋىلشارۋاشىلىعى كوللەدجىنىڭ عاسىرعا جۋىق تاريحى بار. ءتىپتى بۇل وقۋ ورنىنىڭ العاشىندا ەلىمىزدىڭ تۇڭعىش استاناسى بولعان ورىنبوردا قۇرىلىپ كەيىننەن الماتىعا ودان تارازعا ەڭ اقىرىندا قۇلان كوشىرىلگەنىنە دە تاريح كۋا، دەپ جازادى Qamshy.kz اقپارات اگەنتتىگى. 

جامبىل وبلىسى قۇرىلعان شاقتا وڭىردە بولعان 3 ارناۋلى ورتا ءبىلىم بەرۋ وشاعىنىڭ ءبىرى سانالعان قۇلان اۋىل شارۋاشىلىعىنىڭ ىرگەتاسى 1923 جىلى ورىنبور قالاسىندا قالاندى. قازاق اسسر-نىڭ حالىق كوميسسارلار كەڭەسىنىڭ جارلىعىمەن ولكەلىك ۆەتەرينارلىق جانە زووتەحنيكالىق تەح-نيكۋمى بولىپ اشىلعان وقۋ ورنى كوپ ۇزاماي الماتى قالاسىنا كوشىرىلەدى. مۇندا ول الماتى ۆەتەرينارلىق جەر قاتىناستارى تەحنيكۋمى بولىپ اتالعان. الماتىدا ۇزاق ۋاقىت تابان تىرەي الماعان تەحنيكۋم 1930 جىلى سول كەزدەگى اۋليەاتا (قازىرگى تاراز) قالاسىنا قونىس اۋدارادى. وسىندا 33 جىلعا جۋىق وڭىرگە قاجەتتى ورتا بۋىندى اۋىل شارۋاشىلىق ماماندارىن دايارلاعان وقۋ ورداسىندا قازاقتىڭ كورنەكتى مەملەكەت جانە قوعام قايراتكەلەرىمەن بىرگە كۇللى الەمگە تانىمال شىڭعىس ايتماتوۆ تا ءبىلىم العان.

ال 1963 جىلى بۇل وقۋ ورنى قازىرگى قۇلان اۋىلىنا اۋىستىرىلدى. مۇندا دا ول جامبىل ززوتەحنيكالىق ۆەتەرينارلىق تەحنيكۋمى رەتىندە بىلىكتى اۋىل شارۋاشىلىعى ماماندارىن ازىرلەۋدەگى مارتەبەلى ميسسياسىن ابىرويمەن اتقارا ءبىلدى. 1995 جىلى ەلدەگى قوعامدىق-ساياسي ومىرىندەگى وزگەرىسكە ساي تەحنيكۋم اتاۋىن قۇلان اۋىلشارۋاشىلىعى كوللەدجى بولىپ اتاۋىن وزگەردى. بۇگىنگى كۇنگە دەيىن كوللەدج «مەكتەپكە دەيىنگى ءبىلىم بەرۋ جانە تاربيەلەۋ»، «كاسىپتىك ءبىلىم بەرۋ»، «قۇقىقتانۋ»، «ەسەپ جانە اۋديت»، «اگرونوميا»، «فەرمەر شارۋاشىلىعى»، «زووتەحنيكا» جانە «مال دارىگەرلىگى» سەكىلدى ماماندىقتار بويىنشا ارناۋلى ورتا ءبىلىمى بار مامانداردى دايارلاپ كەلدى. «ناتيجەلى جۇمىسپەن قامتۋدى جانە جاپپاي كاسىپكەرلىكتى دامىتۋدىڭ 2017-2021 جىلدارعا ارنالعان «ەڭبەك» مەملەكەتتىك باعدارلاماسى نەگىزىندە مۇندا «ۆەتەريناريا»، «اگرونوميا»، «دانەكەرلەۋ ءىسى»، «اسپازشى»، «اقپاراتتىق جۇيەلەر» سىندى ماماندىقتار دا وقىتىلۋدا.

جاڭا وقۋ جىلىنان باستاپ كوللەدجدە «ءسۇت ونىمدەرىنىڭ ءوندىرىسى»، «ەت جانە ەت ونىمدەرىنىڭ ءوندىرىسى»، «ورمان شارۋاشىلىعى، باق-ساياباق جانە لاندشاف قۇرىلىسى» سياقتى جاڭا ماماندىقتار اشىلدى.

وتكەن جىلى كوللەدج وبلىس اكىمى اسقار مىرزاحمەتوۆ بۇل كوللەدجدى وبلىستاعى اۋىلشارۋاشىلىق ماماندارىن دايارلايتىن بازالىق كوللەدجگە اينالدىرۋ تۋرالى شەشىم قابىلدادى.