قۇلاندا قۇس شارۋاشىلىعى ەرەكشە سەرپىنمەن دامىپ كەلەدى. تەك اعىمداعى جىلدىڭ العاشقى التى ايىنىڭ وزىندە ت.رىسقۇلوۆ اۋدانىنداعى قۇستىڭ سانى 113 010 دانا جەتىپ، 103،1 پايىزدىق ءوسىمدى كورسەتكەن. اۋدانداعى اقىرتوبە اۋىلىنىڭ تۇرعىنى ءناسىپحان وماربەكوۆ 200 باس كانادالىق كۇركەتاۋىق ءوسىرىپ وتىر، دەپ جازادى Qamshy.kz اقپارات اگەنتتىگى. 

كەزىندە ءتىس دارىگەرلىكپەن اينالىسقان ءناسىپحان وماربەكوۆ بۇگىندە زەينەتكەرلىكتە. قۇرمەتتى ەڭبەك دەمالىسىنا شىققان قاريا ۇيىندە قۇر بەكەر قاراپ وتىرۋدى ءجون ساناپ كاسىپتىڭ وسى ءبىر ەرەكشە ءتۇرىن قولعا العان ەكەن.

–قولىمىزداعى بارلىق مالدى جاز كەلگەننەن جايلاۋعا جىبەرەمىز. وسى ساتتە قىم-قۋىت تىرلىكتەن قول بوساپ قالادى. سوندىقتان وسى جازدا بوس وتىرماي كاسىپپەن اينالىسۋعا بەل بۋدىم. ۇلدارىمنىڭ كۇركەتاۋىق ءوسىرۋ يدەياسىن قابىل الىپ، ونىڭ «BIG-6» دەپ اتالاتىن ەرەكشە ءتۇرىن كۇتىپ ۇستاۋعا تاۋەكەل ەتتىم. سودان الماتىداعى ارنايى كاسىپورىننان تەگى كانادالىق كۇركەتاۋىقتىڭ 200-دەي ءبىر ايلىق بالاپانىن ساتىپ الىپ ىسكە كىرىسىپ تە كەتتىك،–دەيدى قاريا.

ءبىر قىزىعى كۇركەتاۋىقتىڭ «BIG-6» اتالاتىن ءتۇرىنىڭ جۇمىرتقالارى ءبىزدىڭ ەلىمىزگە كانادا مەملەكەتىنەن جەتكىزىلەتىن كورىنەدى. ءوز كەزەگىندە كانادالىق كۇركەتاۋىق نەبارى 5 ايدا 20-25 كەلىگە دەيىن ەت بەرەتىن كورىنەدى. ءارى بۇل ءۇي قۇستارىنا ۇستاۋدىڭ ەرەجەلەرى دە قاراپايىم. باستىسى قۇستار اشىق قورادا باپتالعانى دۇرىس. سەبەبى جابىق قورادا ۇستالعان كۇركەتاۋىقتاردىڭ وزدەرىنىڭ ساڭعىرىعان بولىنگەن گازدان ۋلانىپ قالۋى دا مۇمكىن ەكەن.

–الايدا كۇركەتاۋىقتىڭ مەجەلى مەرزىمدى ءتيىستى سالماق جيناۋى ءۇشىن ونىڭ ءتيىستى قورەكتىك زاتتارمەن قورەكتەنگەنى ابزال. اتاپ ايتقاندا ءبىر ايلىق بالاپان كەششىندە ولار «ستارت» دەپ اتالاتىن جەممەن قورەكتەنەدى. ءۇش ايلىعىنان باستاپ جەمنىڭ «روست» اتالاتىن تۇرىنە كوشەدى. ال، ءتورتىنشى جانە بەسىنشى ايلاردا «فينيش»-پەن تاماقتاندىرعان ابزال. وعان قوسا تاماقتاندىرۋ رەجيمىندە ارنايى انتيبيوتيكتەر، ۆيتاميندەر بەرىپ وتىرعان ءجون،–دەيدى قۇس شارۋاشىلىعىن قولعا العان كاسىپكەر.

تۇرعىندارىنىڭ دەنى مال ەتىنە جەڭسىك قازاقستاندا دا كۇركەتاۋىق ەتىنە سۇرانىس جوعارى كورىنەدى. ونى اقىرتوەگە كانادالىق كۇركەتاۋىقتى جەرسىندىرگەن قاريا ايتادى. ءتىپتى ول باپتاعان كۇركەتاۋىق بابىنا جەتەر-جەتپەستەن ونىڭ ەتىن ساتىپ الۋعا قۇشتارلىق تانىتقاندار تابىلىپتى.