ەلباسى نۇرسۇلتان نازاربايەۆتىڭ «ۇلى دالانىڭ جەتى قىرى» اتتى ماقالاسىندا قازاقتىڭ قادىم زاماننان بەرگى تۇرمىس تىرشىلىگىنىڭ جىلقى مالىمەن بايلانىستى ەكەنى ايتىلادى. قامبار اتا تۇلىگىن قولعا ۇيرەتكەن دە قازاقتار. ءتىپتى ونىڭ ءسۇتى سان ءتۇرلى دەرتكە شيپا بولاتىندىعىن ايتىپ، كۇندەلىكتى قىمىز ءىشۋ دە قازاقتىڭ كۇندەلىكتى داعدىسىنا اينالدىرعان. وسى ورايدا، ت.رىسقۇلوۆ اۋدانىنداعى راحىم سابدەنوۆ اۋىلىنىڭ تۇرعىنى زاميرا ەلەۋسىنوۆا اتا كاسىپتى جالعاستىرىپ، قىمىز ءوندىرىسىن جولعا قويۋدى ماقسات ەتىپ وتىر، دەپ جازادى Qamshy.kz اقپارات اگەنتتىگى.
مىڭ ءتۇرلى دەرتكە ەم قىمىزدى كاسىپ كوزىنە اينالدىرعان زاميرا بۇل ىسكە بىلەك سىبانا كىرىسكەن. وتكەن جىلى «اۋىل شارۋاشىلىعىن قارجىلاي قولداۋ قورىنان» 3 ميلليون تەڭگە نەسيە العان كاسىپكەر وعان 7 باس انالىق جىلقى ساتىپ العان. ءوز كاسىبىن وركەندەتۋگە شىنداپ كىرىسكەن ول «ەڭبەك» ناتيجەلى جۇمىسپەن قامتۋدى جانە جاپپاي كاسىپكەرلىكتى دامىتۋدىڭ 2017-2021 جىلدارعا ارنالعان باعدارلاماسى اياسىندا «باستاۋ» جوباسىنىڭ مۇمكىندىگىن پايدالانىپ كاسىپكەرلىك نەگىزدەرىن وقىعان.
– ءقازىر جەكە كاسىپتى جولعا قويۋ ەكىنىڭ ءبىرىنىڭ ويىندا جۇرگەنىمەن وعان تاۋەكەل ەتەتىندەر از. ءبىز دە كۇيەۋىم جانات ەكەۋمىز ۇزاق ۋاقىت ويعا العان وسى شارۋانىڭ تىگىسىن جاتقىزۋدى ۇزاق ويلاستىرىپ اقىرى اتا كاسىپ مال شارۋاشىلىعىمەن اينالىسۋعا بەل بۋدىق. ونىڭ ىشىندە قامبار اتا تۇلىگىن قامقورلىققا الىپ، ونىڭ قىمىزىن ءوندىرۋدى ماقسات ەتتىك. بۇل جوسپارىمىزدى ەلىمىزدەگى تۇرمىسى تومەن وتباسىلاردىڭ بيزنەسكە جولىن اشقان «باستاۋ» جوباسى پايدامىزعا جارادى. بۇگىندە ويعا العان كوپ شارۋانى ىسكە اسىرا الدىق. كۇيەۋىم جىلقىنىڭ كۇتىپ-باپتاۋمەن اينالىسادى،- دەيدى زاميرا ساتىلعان قىزى.
وسىلايشا قىمىز ءوندىرىسىن وتباسىلىق كاسىپ ەتۋدى قۇنتتاعان قۇلاندىق كاسىپكەردىڭ شاعىن جانە ورتا بيزنەستى دامىتۋعا مول مۇمكىندىك بەرگەن پرەزيدەنتكە ايتار العىسى شەكسىز.
–ارينە كاسىپكەرلىك قولداۋ بار جەردە عانا قاناتىن كەڭگە جايادى. سوندىقتان ءقازىر ەلىمىزدىڭ كەز كەلگەن تۇرعىنىنىڭ تۇرمىسىن تىكتەۋدە مەملەكەتكە يەك ارتىپ جەكە كاسىپكەر اتانا الاتىندىعىنا كوز جەتكىزدىم. باستىسى نيەت بولسا بولدى. قىمىز ءوندىرىسىن قولعا العان كاسىپكەر رەتىندە الداعى ۋاقىتتا بۇل نارىقتا وزىندىك برەند قالىپتاستىرۋدى ماقسات ەتىپ وتىرمىن، –دەپ ويىن جالعادى جەكە كاسىپكەر.
