ەلباسى نۇرسۇلتان نازاربايەۆ ءارقاشان قوعام ءومىرىنىڭ جەكەلەگەن سالالارىن سيفرلاندىرۋ ولاردىڭ دامۋىنا جاعداي جاساۋعا ءجىتى نازار اۋدارىپ كەلەدى. مۇنداي جۇيە اسىرەسە مەديسينا سالاسىنا قاجەت-اق. ەلباسىنىڭ سيفرلاندىرۋ تۋرالى باستاماسى ت.رىسقۇلوۆ اۋدانىنىڭ ورتالىعى لۋگوۆوي اۋىلدىق ەمحاناسىندا وڭتايلى كادەگە جاراپ كەلەدى، دەپ جازادى Qamshy.kz اقپارات اگەنتتىگى.
ەلباسى ءوز جولداۋلارىنىڭ بىرىندە 2019 جىلدىڭ 1 قاڭتارىنان باستاپ بارلىق ەمحانالار مەن اۋرۋحانالار مەديسينالىق قۇجاتتاردى قاعازسىز، سيفرلىق نۇسقادا جۇرگىزۋ ماسەلەسىنە ايرىقشا نازار اۋدارعان ەدى. سايكەسىنشە سول ستراتەگيالىق قۇجاتتا جەرگىلىكتى تۇرعىنداردىڭ ەلەكتروندى دەنساۋلىق پاسپورتتارىن جاساۋعا، كەزەكتەر تۇرۋدىڭ، بيۋروكراتيانى جويۋعا، قىزمەت كورسەتۋ ساپاسىن ارتتىرۋعا مۇمكىندىك بەرەتىندىگى دە ايتىلعان ەدى. اتالعان ماڭىزى زور قۇجات جۇكتەگەن جاۋاپكەرشىلىگى مول مىندەتتىڭ ۇدەسىنەن شىعۋدا ت.رىسقۇلوۆ اۋدانى ورتالىعىندا تۇراتىن 9960 ادامعا قىزمەت كورسەتەتىن لۋگوۆوي اۋىلدىق ەمحاناسىندا ءبىرقاتار شارۋالار قولعا الىنعانى قۋانتادى. بۇگىندە ەمحانادا 40-تان استام مەديسينالىق قىزمەتكەر قۇلانداردىڭ دەرتىنە داۋا تابۋ جولىندا تەر توگۋدە. دەنساۋلىق ساقشىلارى تاۋلىگىنە 75 ەمدەلۋشىگە ساپالى مەديسينالىق قىزمەت ۇسىنا الادى. ەمحانا ۇجىمى 6 جالپى تاجىريبەلىك دارىگەر مەن 29 ورتا بۋىندى مەديسينالىق قىزمەتشىدەن تۇرادى.
–ەمحانانىڭ ماتەريالدىق تەحنيكالىق الەۋەتى تولىعىمەن جاڭا زامان سۇرانىسىنا ساي كەلەدى. بارلىق قىزمەتكەرلەرگە كومپيۋتەرلىك قوندىرعىلار قولجەتىمدى. ولاردىڭ بارلىعى دەرلىك جوعارى جىلدامدىقتاعى عالامتورعا قوسىلعان. ەمحانا ماماندارى سيفرلاندىرۋ جۇيەسى ارقىلى جۇمىس جاساۋعا كوشكەن. ونىڭ ىشىندە ەمدەلۋشىلەردى باسقارۋدىڭ ەلەكتروندى جۇيەسىمەن بىرگە «دامۋمەد»، اۆتوماتتاندىرىلعان اقپاراتتىق جۇيە سىندى باعدارلامالاردى قولدانامىز. بۇل باعدارلامالارمەن ارنايى وقۋ كۋرستارىنان وتكەن 5 دارىگەر مەن 13 ورتا بۋىندى مەيىربيكە جۇمىس جاسايدى. الداعى ۋاقىتتا ەمدەلۋشىلەرگە ساپالى قىزمەت كورسەتۋدىڭ بارلىق سالالارى سيفرلى فورماتقا كوشەدى. دەنساۋلىق ساقتاۋ مينيسترلىگىنىڭ بۇيرىعىن باسشىلىققا الا وتىرىپ، ناۋقاستاردى تەگىن دارى-دارمەكپەن قامتۋ جۇمىستارىن دا ەلەكتروندى رەجيمدە جۇرگىزىپ كەلەمىز، –دەيدى لۋگوۆوي اۋىلدىق ەمحاناسىنىڭ اعا مەيىربيكەسى قالدىكۇل نۇرسەيىتوۆا.
ارىپتەسىنىڭ ويىن قۇپتاعان اكۋشەر ميرا رىسالدييەۆا سالانى سيفرلاندىرۋ قاعازباستىلىقتان ارىلۋدىڭ جولى ەكەندىگىن راستايدى. تۇرعىندار دا دارىگەرلەردىڭ ساعاتتاپ قاعازدان باس الماي قۇجات تولتىرۋعا كەتەتىن ۋاقىتىن ساپالى قىزمەت كورسەتۋگە ارناعانىنا ءدان ريزا.
