شۋ اۋداندىق مۇراجايى جاڭا عيماراتقا كوشىرىلدى. بۇل تاريحي جادىگەرلەردى كوزدىڭ قاراشىعىنداي ساقتاپ، وتكەن ءداۋىردىڭ تىنىس-تىرشىلىگىنەن حابار بەرەتىن نىسانعا جەرگىلىكتى بيلىكتىڭ وڭ كوزقاراسىن تانىتادى. ءارى بۇل وتكەندى تانىپ، تاريحتان ساباق الۋدى ۇندەيتىن ەلباسىنىڭ «بولاشاققا باعدار: رۋحاني جاڭعىرۋ»، «ۇلى دالانىڭ جەتى قىرى» ماقالالارىنىڭ نەگىزگى مازمۇنىمەن ۇندەسەدى، دەپ جازادى Qamshy.kz اقپارات اگەنتتىگى. 

بۇعان دەيىن جەرگىلىكتى، رەسپۋبليكالىق باسىلىمداردىڭ بەتتەرىندە شۋ اۋداندىق مۇراجايىنىڭ توزىعى جەتكەن عيماراتتا كۇنەلتكەن مۇشكىل ءحالى باياندالعان ماقالالار جارىق كورگەن بولاتىن. ءدال وسى كەمشىلىكتەردى تەز ارادا جويىپ، مۇراجاي قورىنداعى 4 275 جادىگەردى ىڭعايلى ورىنعا ورنالىستىرۋدى قولعا العان جەرگىلىكتى بيلىك اۋدان ورتالىعى تولە بي اۋىلىنداعى مەيرامحانا عيماراتىن 3 ميلليون 760 مىڭ تەڭگە ساتىپ الادى. ونى مۇراجايعا لايىقتى ەتىپ قايتا جابدىقتاۋ جۇمىسىنا 36 ميلليون 670 مىڭ تەڭگە قارجى قاراستىرىلدى.

جالپى شۋ اۋداندىق مۇراجايى 1986 جىلدان بەرى جۇمىس جاساپ كەلدى. ال 1989 جىلدان بۇل نىسان جامبىل وبلىستىق ولكەتانۋ مۋزەيىنىڭ شۋ اۋداندىق ءبولىمى بولىپ قايتا قۇرىلدى.

جاڭا عيماراتقا قونىستانعان مۋزەي عيماراتى ەندىگى كەزەكتە ولكە تاريحىنا قىزىعۋشىلىق تانىتقان اۋدان تۇرعىندارى مەن قوناقتارىنا لايىقتى قىزمەت كورسەتىپ، قاجەتىنە جاراۋدى ماقسات ەتىپ وتىر.

–ءقازىر مۇراجايدا مەڭگەرۋشى مەن كىشى عىلىمي قىزمەتكەر جانە باقىلاۋشى جۇمىس جاسايدى. مۋزەي قورى 4275 جادىگەردى قۇرايدى. بارلىق جادىگەرلەر تاريحي كەزەڭدەر، داتالى ۋاقىتتارىنا جانە ماڭىزدىلىعىنا قاراي بەس بولىمنەن تۇرادى. اتاپ ايتقان مۋزەي كەلۋشىلەرىنىڭ تالعامىنا قاراي ارحەولوگيا، ەتنوگرافيا، تاريحي كەزەڭ، شۋ ءوڭىرى جانە تاۋەلسىز قازاقستان بولىمدەرىندەگى جادىگەرلەرمەن تانىسا الادى. مۇنداعى ارحەولوگيا بولىمىنە تۇتاستاي ورتا عاسىرداعى ولكە تاريحىنان سىر شەرتەدى. ال تاريحي كەزەڭدەر بولمەسىندە اۋدانداعى اۋعان سوعىسىنا قاتىسۋشىلار جايىندا مول ماعۇلمات بەرەدى. مۇندا ولاردىڭ مايدان دالاسىنان جازعان حاتتار جانە قولدانعان تۇرمىستىق زاتتارى قويىلعان. بۇعان دەيىن مۋزەي عيماراتى ەسكى عيماراتتىڭ قۋىقتاي بولمەسىنە ورنالاسقان دا تۇرعىندار وندا قولدا بار قۇندى زاتتارىن تاپسىرۋعا قۇلىقتى بولمادى. ەندى مۋزەيدىڭ جاڭا عيماراتىن كوشكەنىنەن حاباردار شۋلىقتار ونىڭ قورىن تولىقتىرۋعا اتسالىسادى دەگەن سەنىمدەمىز، –دەيدى مۇراجاي مەڭگەرۋشى ايدا بەردەنوۆا.