جامبىل وبلىسىنىڭ اكىمى اسقار مىرزاحمەتوۆتىڭ تاپسىرماسىنا ساي تاراز قالاسىنان 25 شاقىرىم قاشىقتىقتاعى اتلاح قالاسىنىڭ ورنىنا ارحەولوگيالىق زەرتتەۋ جۇمىستارى جۇرگىزىلمەك. بۇل جايىندا وبلىس اكىمىنىڭ جامبىل اۋدانىنداعى جۇمىس ساپارى كەزىندە بەلگىلى بولدى، دەپ جازادى Qamshy.kz اقپارات اگەنتتىگى.
اۋدانعا جاساعان ساپارى كەزىندە تاريحي ورىنعا ارنايى ات باسىن بۇرعان ءوڭىر باسشىسى وسى ماڭدا بولعان اتلاح-تالاس شايقاسىنىڭ تاريحي ءمان مازمۇنىنا توقتالىپ، جاۋاپتى تۇلعالارعا بۇل ماڭدا ارحەولوگيالىق زەرتتەۋ جۇمىستارىن جۇرگىزۋدى كەشىكتىرمەي قولعا الۋعا تاپسىرما بەردى. ءوز كەزەگىندە تاريحشىلار دا ءبىزدىڭ جىل ساناۋىمىزدىڭ 751 جىلى مۇندا بولعان اتلاح شايقاسىنىڭ يسلەم وركەنيەتىنىڭ قازاق دالاسىنا تارالۋىندا شەشۋشى مانگە يە شايقاس بولعانىن اتاپ ءوتتى. سوندىقتان ءوڭىر باسشىسى بۇل قاسيەتتى ورىندى ناسيحاتتاۋ، ونىڭ وتاندىق تاريحقا بەلگىسىز قىرىن مەيلىنشە تانىتۋ جۇمىستارىنا ءجىتى نازار اۋدارۋ كەرەكتىگىن اتاپ ءوتتى. سايكەسىنشە بۇل شارۋالار كەشەندى ارحەولوگيالىق عىلىمي-زەرتتەۋ مەن بارلاۋ-قازبا شارالار ارقىلى جۇزەگە اسىرىلماق.
جامبىل وبلىستىق تاريحي-مادەني ەسكەرتكىشتەردى قورعاۋ جانە قالپىنا كەلتىرۋ ديرەكسياسى ديرەكتورىنىڭ ورىنباسارى ساۋران قالييەۆ اتلاح قالاشىعىن عىلىمي زەرتتەۋ جۇمىستارىنا جەرگىلىكتى تاريحشى-ارحەولوگ عالىمداردى تارتىلاتىندىعىنا باسا نازار اۋداردى. وبلىس اكىمى ءوڭىر تاريحقا كوپكە تانىتۋدى ماقسات ەتكەن مۇنداي شاراعا قارجى وبلىستىق بيۋدجەتتەن بولىنەتىندىگىن ايتتى.
ايتا كەتەيىك، اتلاح شايقاسى ءبىزدىڭ جىل ساناۋىمىزدىڭ 751 جىلى تاراز ماڭىنداعى اتلاح قالاشىعىنىڭ ماڭىندا جۇڭگو جانە اراب اسكەرلەرىنىڭ اراسىندا بولعان. اتلاح قالاشىعى جايىندا دەرەكتەر تاريحي مالىمەتتەردە مولىنان كەزدەسەدى. ماسەلەن اتاقتى تاريحشى ماحمۋد قاشقاريدىڭ ءوز ەڭبەكتەرىندە «اتلاح – تارازدىڭ ماڭىنداعى قالانىڭ اتى» دەپ اتاپ كورسەتەدى. تاعى ءبىر تاريحشى ا.بەرنشتامنىڭ جازبالارىندا اتلاحتىڭ قالدىعى – جۋانتوبە ەكەندىگى ايتىلادى. اتلاح ماڭىنداعى كەسكىلەسكەن ۇرىستا جەڭىلىس تاپقان جۇڭگو اسكەرلەرى ودان كەيىن تۇركى ەلدەرىنە شابۋىل جاساۋدى دوعارىپتى. بۇل شايقاستىڭ تاعى ءبىر ماڭىزدىلىعى ونىڭ سول تۇستاعى گەوساياساتقا اسەر ەتىپ، قازاق جەرىندە يسلام وركەنيەتىنىڭ كەڭىنەن وركەن جايۋىنا سەبەپ بولۋىمەن بايلانىستىرىلادى. وسى شايقاستان كوپ وتپەي قازىرگى قازاقستان اۋماعىندا بيلىك قۇرعان قاراحان حاندىعى يسلام ءدىنىن مەملەكەتتىك ءدىن رەتىندە قابىلداعانى تاريحتان ءمالىم.
پىكىر قالدىرۋ