شۋ اۋدانىنىڭ جۇرتشىلىعى كەڭەس وداعىنىڭ باتىرى، پۋلەمەتشى جەرلەستەرى ساتتار ەستەمەسوۆتىڭ تۋعانىنا 100 جىل تولۋ مەرەكەسىن دۋمانداتىپ وتكىزدى. باتىر قۇرمەتىنە ارنالعان شارالاردىڭ بەل ورتاسىنان الماتى، جامبىل وبلىسى مەن تاراز قالاسىنان ارنايى قوناقتار تابىلدى، دەپ جازادى Qamshy.kz اقپارات اگەنتتىگى. 

باسقا ءوزى سۇرانىپ، العاشقىلاردىڭ ءبىرى بولىپ مايدان شەبىنە اتتانعان جاۋجۇرەك جاۋىنگەر. ول سمولەنسك وبلىسىن ازات ەتۋ شايقاسىنا قاتىسىپ، 24 جاسىندا ەرلىكپەن قازا تابادى. قيان-كەسكى شايقاستاعى ەرەن ەرلىگى ەسكەرۋسىز قالماي كەڭەس وداعىنىڭ باتىرى اتاندى.

باتىر جەرلەستەرىنىڭ عاسىرلىق تويىن شۋلىقتار بارىنشا ءسان سالتاناتپەن وتكىزدى. سالتاناتتى شارالار لەگى كوكقاينار اۋىلدىق مادەنيەت ءۇيى مەن باتىر اتىنداعى مەكتەپتەگى كەۋدەمۇسىنگە گۇل قويۋ راسىمىنەن باستالدى. مۇنان كەيىن مەرەيتوي قوناقتارى شۋ قالاسىنداعى «جەڭىس» ساياباعىنداعى ساتتار ەستەمەسوۆتىڭ ەسكەرتكىشى ماڭىندا ونىڭ قۇرمەتىنە ءبىر مينۋتتىق ۇنسىزدىك جاريالادى. مەكتەپ وقۋشىلارى باتىرعا ارنالعان جىردان شاشۋ شاشتى. كەلەسى ساتتە دارمەن سمايىل رەداكتورلىق ەتۋىمەن جارىق كورگەن «ەل ءۇشىن تۋعان ەر ساتتار» كىتابىنىڭ تۇساۋى كەسىلدى. بۇل راسىمگە قوعام قايراتكەرى ورازگۇل اسانعازى، اۋداننىڭ ءبىر توپ قۇرمەتتى ازاماتتارى قاتىستى.

ال ورتالىق الاڭدا وتكەن ارنايى جيىندا اۋدان اكىمى جارىلقاسىن ايتاقوۆ، قوعام قايراتكەرى و.اسانعازى، جۋرناليست د.سمايىل،قالالىق ارداگەرلەر ۇيىمىنىڭ ءتوراعاسى ق.قارعابايەۆتار ءسوز سويلەدى. ءوز سوزدەرىندە سپيكەرلەر بۇل شارانىڭ ەلباسى نۇرسۇلتان نازاربايەۆتىڭ وتكەندى تانۋ، ولكەدەن شىققان تۇلعالاردى تانۋعا دارىپتەيتىن «بولاشاققا باعدار: رۋحاني جاڭعىرۋ» باعدارلامالىق ماقالالارىمەن ۇندەس ەكەنىن اتاپ ءوتتى. ودان سوڭ ايماق باسشىسى ءبىر توپ ازاماتتارعا «ساتتار ەستەمەسوۆ-100 جىل» مەدالىن تابىستادى.

ءتۇس اۋا باتىردىڭ قۇرمەتىنە ارنايى اس بەرىلىپ، قۇران باعىشتالدى. سونداي-اق، ءدال وسى شارا شەڭبەرىندە ساتتار ەستەمەسوۆتىڭ اتى بەرىلگەن اتشاباردىڭ تۇساۋى كەسىلىپ، كوپشىلىك الامان، قۇنان جانە تاي بايگەلەرىن تاماشالادى. بوزبىلەمدە بالۋاندار بەلدەسىپ، ءوزارا كىم مىقتىنى انىقتادى. اۋداندىق مادەنيەت ۇيىندە ايتىس اقىندارى ءسوز سايىسىنا ءتۇستى. ءتىپتى بۇل ايتىسقا قىرعىز اقىندارىنىڭ قاتىسۋىن كوپشىلىك شۋلىق باتىردىڭ ابىرويى الاتاۋدان ارى اسقاندىعىمەن بايلانىستىرىپ جاتتى.