ساۋدا تاۋار اينالىمىنىڭ ەل ەكونوميكاسىندا الار ورنى ەرەك. سەبەبى ءدال وسى قارجىلاي اينالىم جۇيەسى تۇراقتىلىق پەن ەكونوميكالىق وسىمگە كەپىلدىك بەرەدى. بۇنى ەلباسى نۇرسۇلتان ءابىش ۇلى نازاربايەۆ ءوزىنىڭ جولداۋلارىندا باسا ايتقانى ەل ەسىندە. سوندىقتان بۇل جۇرە قارايتىن ماسەلە ەمەس، دەپ جازادى Qamshy.kz اقپارات اگەنتتىگى. جالپى جامبىل وبلىسى تالاس اۋدانىندا 2019 جىلدىڭ قاڭتار-تامىز ايلارىنا بولشەك ساۋدا تاۋار اينالىمى 1 ميلليارد 142 ميلليون 800 مىڭ تەڭگەنى قۇراپ، بىلتىرعى جىلمەن سالىستىرعاندا 110،5 پايىزعا نەمەسە 109 ميلليون تەڭگەگە ۇلعايعان (2018 جىلى 1 ميلليارد 033 ميلليون 800 مىڭ تەڭگە). ناقتى كولەم يندەكسى 104،5 پايىزدى قۇرادى.

سونى ەسەسىنەن اۋىل شارۋاشىلىق سالاسىندا الشاڭ باسۋشىلىق بار. اتاپ ايتساق، اۋىل شارۋاشىلىعى ءونىمى 6 ميلليارد 608 ميلليون 900 مىڭ تەڭگەگە ءوندىرىلىپ، 108،2 پايىزعا ورىندالعان. نەمەسە 498 ميلليون 200 مىڭ تەڭگەگە ارتىپ وتىر(2018 جىل قاڭتار-تامىز 6 ميلليارد 110 ميلليون 700 مىڭ تەڭگە). ناقتى كولەم يندەكسى 102،6 پايىزعا جەتتى.

مال باسى 2018 جىلدىڭ 8 ايىمەن سالىستىرعاندا: ءمۇيىزدى ءىرى قارا مالى 27 769 باستى قۇراپ ياعني 3،7 پايىزعا ءوستى، قوي-ەشكى 395 650 باستى قۇراپ 3،2 پايىزعا ارتتى، جىلقى 10 989 باستى قۇراپ 4،1 پايىزعا كوبەيدى، تۇيە 2 458 باستى قۇراپ 9،9 پايىزدى مەجەلەدى، ءۇي-قۇستارى 34 633 باستى قۇراپ 8،3 پايىزعا ءوسىپ وتىر (شوشقا 375 باستى قۇراپ 3 ەسەگە ءوستى).

ەت جانە ءسۇت ونىمدەرىن ءوڭدىرۋ بويىنشا: 2018 جىلدىڭ ەسەپتى كەزەڭىمەن سالىستىرعاندا ەت 8 مىڭ 138،4 توننا قۇراپ، 2،9 پايىزعا وسكەن، ءسۇت 6 مىڭ 360 توننا قۇراپ، 2،7 پايىزعا وسكەن، جۇمىرتقا 1 ميلليون 949 مىڭ دانا ءوندىرىلىپ، 0،4 پايىزعا ارتقان جانە ءجۇن 289،7 توننا قۇراپ، 1،9 مەجەلەگەن.

ءبىر سوزبەن ايتقاندا بارلىق باعىتتا ءوسىم بار، ءتۇسىم جوق. ارينە اسىراۋشى سالاعا مەملەكەت تاراپىنان جىلدا قىرۋار قارجى ءبولىنىپ، قامقورلىققا الىنىپ جاتقاندىقتان جۇمىستىڭ جۇيەسىن تاپقانى دا ءجون. ەكىنشىدەن بۇل ەلدى مەكەننىڭ ەڭسەسىن تىكتەپ، تۇرعىنداردىڭ الەۋمەتىن ارتىرا تۇسەدى. پرەزيدەنت جولداۋىنىڭ باستى ۇستانىمى دا وسى. تۇراقتىلىق پەن تۇرمىسى تۇزەلگەن حالىق. ارينە ءارى بىردەن بولىپ كەتپەيتىنى دە تابيعي زاڭدىلىق. الايدا كوش جۇرە تۇزەلەتىندىگىن ۇمىتپاعان ءجون. وسى قىرىنان كەلگەندە تالاستىقتاردىڭ تىندىرىمدى تىرلىگىن باس بارماقپەن باعالاۋعا تۇرارلىق.

جاسا، جايناي بەر تالاسىم!