وبلىستا 70 مىڭنان استام مەملەكەتتىك قىزمەتكەر جۇمىس ىستەيدى. ونىڭ 54 پايىزىن جاستار قۇرايدى. بۇل تۋرالى ايماقتىق كوممۋنيكاسيالار قىزمەتىندە وتكەن بريفينگتە  ق ر مەملەكەتتىك قىزمەت ىستەرى اگەنتتىگىنىڭ شقو بويىنشا دەپارتامەنتىنىڭ باسشىسى جاننا قابدولدا قىزى ءمالىم ەتتى.

بريفينگتە پرەزيدەنتتىك جاستار كادرلىق رەزەرۆىنە قالاي قاتىسۋعا بولاتىنى تۋرالى كەڭىنەن ءتۇسىندىرىلدى. 

– وبلىستا 23-29 جاس ارالىعىنداعى 86 ادام جۇمىس ىستەيدى. ال 30-39 جاس ارالىعىنداعى 518 قىزمەتكەر باسشىلىق قىزمەتتەردى اتقارادى. ونىڭ ىشىندە وبلىس اكىمىنىڭ ءبىر ورىنباسارى، ءۇش قالا مەن اۋدان اكىمى، وبلىستىق باسقارماسىنىڭ 10 باسشىسى مەن 45 اۋىلدىق وكرۋگتىڭ اكىمى بار، – دەدى جاننا قابدولدا قىزى.

پرەزيدەنتتىك جاستار كادرلىق رەزەرۆىنە قاتىسۋ ءۇشىن ۇمىتكەرلەرگە بار بولعانى PKRezerv.kz سايتىنا تىركەلۋ قاجەت. وعان كەمىندە 5 جىل جۇمىس ءوتىلى بار، 35 جاسقا تولماعان قازاقستان رەسپۋبليكاسىنىڭ جوعارى ءبىلىمدى ازاماتى ۇمىتكەر بولا الادى. تىركەۋ ونلاين پلاتفورمادا جۇرگىزىلمەك. بريفينگكە قاتىسقان «ق ر پرەزيدەنتىنىڭ جانىنداعى مەملەكەتتىك باسقارۋ اكادەمياسىنىڭ» شقو-داعى فيليالىنىڭ ديرەكتورى سەرگەي كوۆاليەۆ وسىلاي دەدى.

– بىرنەشە كەزەڭنەن تۇراتىن ىرىكتەۋدە ۇمىتكەرلەر الدىمەن تەستتەن ءوتىپ، ەسسە جازادى. بۇل قاتىسۋشىلاردىڭ ءوي-ورىسىن، جازۋ قابىلەتىن، اقپاراتتى ساراپتاي الۋى مەن جەكە قاسيەتتەرىن باعالاۋعا مۇمكىندىك بەرەدى. العاشقى كەزەڭنەن سۇرىنبەي وتكەندەر بەينەجازبالار ارقىلى ءوز جوبالارىن قورعايدى. جوبالاردىڭ الەۋمەتتىك ماڭىزى بولۋى شارت. ءار كەزەڭنىڭ باعاسى ەسەپكە الىنىپ، ۇمىتكەرگە ورتاشا ۇپاي قويىلادى. وزىپ شىققاندارمەن ەكسپەرتتىك كوميسسيا جەكە كەزدەسۋ وتكىزەدى. ەڭ كوپ بالل جيناعان قاتىسۋشىلاردىڭ كانديداتۋراسى پرەزيدەنتتىڭ جاستار كادرلىق رەزەرۆىنىڭ ۇلتتىق كوميسسياسىنىڭ وتىرىسىندا بەلگىلى بولادى، – دەدى سەرگەي كوۆاليەۆ.