جامبىل وبلىسىنىڭ قورداي اۋدانىندا جىلدىڭ ءتورت مەزگىلىندە ءونىم بەرەتىن جىلىجايىنىڭ جۇمىسى جاندانا تۇسۋدە دەپ جازادى Qamshy.kz اقپارات اگەنتتىگى.

«Greenwill» جاۋاپكەرشىلىگى شەكتەۋلى سەرىكتەستىگىنە قاراستى جاڭا تەحنولوگيانىڭ مول مۇمكىندىكتەرىن پايدالانۋ ارقاسىندا ورتالىق ازياداعى ەڭ وزىق اگروقۇرىلىمعا اينالدى، دەپ جازادى Qamshy.kz اقپاراتتىق اگەنتتىگى.

 بۇل اگروكەشەن ازىرگە وبلىستاعى جىل 12 اي ءونىم بەرەتىن بىردەن ءبىر جىلىجاي سانالادى. 4 گەكتار اۋماقتا ورنالاسقان جىلىجايدان جىلىنا 1200 توننا ءونىم الىنادى. مۇنداعى وندىرىستىك پروسەس تۇگەلىمەن جاڭا زاماناۋي قوندىرعىلارعا يەك ارتادى. جىلىجايدا تامشىلاتىپ سۋعارۋ جۇيەسى ەنگىزىلگەن. بۇل جۇيە وسىمدىكتەردىڭ تامىرىنا قاجەتتى سۋدىڭ ۇزدىكسىز جەتكىزىلۋىن قامتاماسىز ەتۋدەن بولەك تىڭايتقىشتىڭ دا وسىمدىك تامىرىنا ۇدايى ءنار بەرەدى. كەشەندەگى كومپيۋتەرلىك قوندىرعىلار ونداعى كليماتتىڭ وسىمدىككە قولايى بولۋىن باقىلايدى. مۇندا قازىرگى تاڭدا 20 ادام جۇمىسپەن قامتىلعان ال ءونىمدى جيناۋ ناۋقانىندا جۇمىسشىلارى سانى 60 ادامعا دەيىن ارتادى.

سەرىكتەستىك جەتەكشىسى ارسمانە حاركي نارىقتاعى جاڭا وسكىن كوكونىستەرگە سۇرانىستىڭ جوعارى ەكەنىن العا تارتادى. كاسىپكەر بيىل تاعى ءبىر جىلىجاي كەشەنىن ىسكە قوسۋدى جوسپارلاپ وتىر.

–بولاشاقتا جىلىجايدا ءقازىر وسىرىلەتىن قيار مەن قىزاناقتان بولەك بۇرىش پەن قۇلپىنايدى ءوسىرۋدى قولعا الامىز. قۇلپىنايدىڭ جوعارى ساپالى وڭتۇستىككورەيالىق سۇرىپىن 1 گەكتارعا وتىرعىزىپ، قىس مەزگىلىندە 50 توننا ءونىم الۋعا نيەت تانىتىپ وتىرمىز، –دەيدى ارسمانە حاركي.

جالپى جىلىجاي جۇمىسىنىڭ باستى ەرەكشەلىگى ونىڭ اكۆوپونيكالىق تاسىلىمەن جۇمىس جاساۋىندا بولىپ وتىر. بۇل ءادىس وزىق تەحنولوگيالار كومەگىمەن ءبىر مەزگىلدە بالىق پەن وسىمدىكتى قاتار وسىرۋگە مۇمكىندىك بەرەدى. جىلىجايدى جابدىقتاۋ جۇمىستارى وڭتۇستىك كورەيانىڭ «MANN CEA» اكۆافەرما كومپانياسىمەن جۇرگىزىلگەن. بۇگىندە اگروكەشەندە جىلىنا 300 توننا سالاتتىڭ «ايسبەرگ»، «رۋككولا»، «ليستوۆوي»، «روبلەن» سۇرىپتارىجانە 40 توننا «تيلاپيا» بالىعىن ءوندىرۋدى ماقسات ەتكەن.

جاقىندا عانا اۋداندا رەسمي ىسساپارمەن بولعان اۋىل شارۋاشىلىعى ءمينيسترىنىڭ ورىنباسارى ايداربەك ساپاروۆ تا بۇل كەشەننىڭ جۇمىسىن جوعارى باعالاپ، ونىڭ رەسپۋبليكا اۋماعىنداعى اكۆاپونيكالىق تاسىلمەن ءونىم بەرەتىن تۇڭعىش جىلىجاي ەكەندىگىن باسا نازار اۋداردى. الداعى ۋاقىتتا بۇل كەشەندەگى جۇمىس جۇيەسى رەسپۋبليكانىڭ باسقا وڭىرلەرىندە سالىناتىن زاماناۋي جىلىجايلاردىڭ وندىرىستىك ۇدەرىسىنە ەنگىزىلمەك.