جامبىل وبلىستىق تۋبەركۋلەزگە قارسى ەرەسەكتەرگە ارنالعان ساناتورييىندە ەمدەۋ-ساۋىقتىرۋ شارالارىنىڭ تىڭ ءتاسىلى قولعا الىنعان. وبلىس اكىمىنىڭ تىكەلەي باستاماسى مۇندا ەم الۋشىلارعا ءبىر مەزگىل جاڭادان ساۋىلعان ساۋمال بەرىلە باستادى. ول ءۇشىن ساناتوريي جانىنان ساۋىن جىلقىلاردى ۇستاۋعا ارنالعان قوراجاي دا سالىنعان. مۇندا ساۋىلعان بيە ءسۇتىنىڭ ارتىلعان بولىگى قىمىز رەتىندە دايىندالىپ، وبلىستىق فتيزيوپۋلمونولوگيا ورتالىعىنا(بۇرىنعى وبلىستىق تۋبەركۋلەزگە قارسى ديسپانسەرىنە) جىبەرىلەدى، دەپ جازادى Qamshy.kz اقپاراتتىق اگەنتتىگى. 

اعىمداعى جىلدىڭ مامىر ايىنان بەرى قولعا الىنعان باياندى باستاما وكپە اۋرۋىنا ۇشىراعانداردىڭ دەرتىنە حالىقتىق مەديسينامەن داۋا تابۋعا مۇمكىندىك بەرۋىمەن ەرەكشەلەنگەلى تۇر. قادىم زاماننان جەلى قۇلىن بايلاپ، قامبار اتا تۇلىگى ءسۇتىنىڭ قاسيەتىن سەزىنگەن قازاق حالقى انتيبيوتيك رەتىندە ءدال وسى قىمىزدى پايدالانعانى تاريحتان بەلگىلى. قارىشتاپ دامىعان جاڭا تەحنولوگيا داۋىرىندە دە دەنساۋلىق سالاسىنىڭ ماماندارى ۇلتتىق سۋسىننىڭ پايداسى زور ەكەندىگىن مويىندايدى.

–ءبىزدىڭ ساناتوريي بۇرىن وكپە اۋرۋىمەن اۋىرعان جانە سوزىلمالى وكپە قابىنۋىنا ۇشىراعان ازاماتتارعا ەم-دوم جاساۋ ارنالعان. مۇنداعى ەمدىك شارالار كەزىندە ەمدەلۋشىلەرگە ۇسىنىلاتىن ءسۇت ونىمدەرىنىڭ تاۋلىكتىك نورماسى 500 ءميليليتردى قۇرايدى. وسىنىڭ 250 ءميليليترىن ءبىز ساۋمال رەتىندە بەرە باستادىق. بۇل باستامانى وبلىس اكىمى كوتەرىپ، قالا ىرگەسىندەگى ساناتوريي رەتىندە ءبىزدىڭ مەكەمەدە قولعا الۋدى تاپسىردى. ناتيجەسىندە بيىل مامىر ايىندا وتكەن مەملەكەتتىك ساتىپ كونكۋرسىندا جەڭىمپاز تانىلعان «اقنازاروۆ» جەكە كاسىپكەرلىگى ساناتوريي جانىنا 7 باس بيە بايلاپ، ەمدەلۋشىلەرگە كۇندەلىكتى ساۋمال بەرۋدى ۇيىمداستىرىپ جاتىر. تاۋلىگىنە مۇندا 15 ليتر ساۋمال ىشىلەدى. ودان ارتىلعان 30 ليتر بيە سۇتىنەن قىمىز دايىندالىپ، وبلىستىق فتيزيوپۋلمونولوگيا ورتالىعىنا جىبەرىلىپ وتىرادى. ساۋمال وكپە اۋرۋىمەن بۇرىن اۋىرعاندارعا وتە جاقسى كومەكتەسەدى. اسىرەسە ونى تاڭعى تاماقتان كەيىن 2 ساعات سوڭ ىشكەن دۇرىس. جانە ساۋمالدى ساۋىلعاننان كەيىنگى 30 مينۋت ىشىندە تۇتىنۋ قۇپتالادى. ءتىپتى ساناتوريي جانىنان ارنايى كيىز ۇيدە تىگىلدى. ال وكپە اۋرۋىنىڭ بەلسەندى تۇرىمەن ەمالىپ جاتقان ناۋقاستارعا قىمىزدىڭ بەرەرى مول. كەلەسى جىلى بيە باسىن كوبەيتىپ، تاراز قالاسىنداعى وبلىستىق تۋبەركۋلەزگە قارسى بالالارعا ارنالعان ءساناتورييىن دە جاڭا ساۋىلعان ساۋمالمەن قامتاماسىز ەتۋدى جوسپارلاپ وتىرمىز، –دەيدى وبلىستىق تۋبەركۋلەزگە قارسى ەرەسەكتەرگە ارنالعان ءساناتورييىنىڭ باس دارىگەرى ەرجان ءابدىحالىقوۆ.

بۇگىندە ساناتورييدە 58 ادام ەم الىپ جاتىر. ولاردى ەمدەۋدىڭ ءبىر كۋرسى 14 تاۋلىككە سوزىلادى. وتكەن ەكى جىل ىشىندە مۇندا 2269 ادام ەم العان. ال جىل باسىنان بەرگى 7 ايدا ساناتورييدە 848 ادام ەم-دوم قابىلداعان. ولاردىڭ اراسىندا ۇلتتىق سۋسىندى قولدانا وتىرىپ، ساۋىقتىرۋدىڭ تىڭ تاسىلىنە جۇگىنگەندەرى دە بارشىلىق.