مەملەكەت باسشىسى ءوز جولداۋىندا اۋىلدىق جەرلەردىڭ الەۋمەتتىك ورتاسىن جاڭعىرتۋ قاجەتتىلىگىن ايتتى. وسى ماقساتتا ەلباسى «اۋىل – ەل بەسىگى» جوباسىنىڭ باستالعانىن جاريالاعان ەدى. «اۋىلدىق جەرلەردىڭ الەۋمەتتىك ورتاسىن جاڭعىرتۋعا دا كىرىسۋىمىز قاجەت. وسىعان بايلانىستى ارنايى «اۋىل – ەل بەسىگى» اتتى جوبانى جۇزەگە اسىرۋ قاجەت. بۇل ارقىلى قازاقستاندىقتاردىڭ جەرگىلىكتى جەردەگى ەڭبەگىنە قاتىستى يدەولوگيانى قولعا الۋىمىز كەرەك. بۇل اكىمشىلىكتەردىڭ مىندەتى»، – دەدى مەملەكەت باسشىسى. اۋىلداردىڭ جاعدايىن جاقسارتىپ، اۋىل حالقىنىڭ تۇرمىس ورەسىن كوتەرۋ ءۇشىن قولعا الىنعان «اۋىل – ەل بەسىگى» جوباسى قارقىندى جۇمىس ىستەۋدە. سونىڭ ءبىر جارقىن مىسالى ءبىزدىڭ اۋداندا دا كورىنىس تابۋدا. ەلباسىنىڭ تىكەلەي باستاماسىمەن قولعا الىنعان جوبا اياسىندا جامبىل وبلىسى، بايزاق اۋدانى ورتالىعى سانالاتىن سارىكەمەر اۋىلىن دامىتۋعا باعىتتالعان ناقتى ىستەر جۇزەگە اسىرىلۋدا دەپ جازادى Qamshy.kz اقپارات اگەنتتىگى .

جوبا اياسىندا جولدار جوندەلىپ، ءبىلىم بەرۋ، دەنساۋلىق ساقتاۋ مەكەمەلەرىنىڭ ماتەريالدىق-تەحنيكالىق بازاسى كۇشەيتىلىپ، از قامتىلعان جانە كوپبالالى وتباسىلارعا كومەك كورسەتىلۋدە. دارىگەرلىك امبۋلاتوريا، بالاباقشا مەن مادەنيەت ۇيلەرى سىندى الەۋمەتتىك نىساندار قۇرىلىسىنىڭ جوبالارى دا جۇزەگە اسىرىلىپ جاتىر. اۋىل اۋماعىن اباتتاندىرۋ ءىسى دە جاقسى قولعا الىنعان. ءار اۋىلدا شىرشالار وتىرعىزىلىپ، گۇلزارلار ەگىلىپ، جۇرگىنشىلەر ءۇشىن جولدار سالىنۋدا. اتاپ ايتار بولساق، «اۋىل – ەل بەسىگى» جوباسى بويىنشا ۇسىنىلعان جوبالاردان سارىكەمەر اۋىلىندا بارلىعى 948،0 ملن. تەڭگەگە 29 جوبا ىرىكتەلىپ الىندى. ونىڭ ىشىندە، كوشەلەردى جارىقتاندىرۋعا 4 جوبا 372،6 ملن. تەڭگەگە، ءبىلىم نىساندارىن كۇردەلى جانە اعىمداعى جوندەۋگە 4 جوبا 253،7 ملن. تەڭگەگە، دەنساۋلىق ساقتاۋ سالاسى نىساندارىن كۇردەلى جانە اعىمداعى جوندەۋگە 2 جوبا 93،9 ملن. تەڭگەگە، سپورت نىساندارىن كۇردەلى جانە اعىمداعى جوندەۋگە 3 جوبا 60،1 ملن. تەڭگەگە، مادەنيەت سالاسىنا 5 جوبا 52،5 ملن. تەڭگەگە، جولداردى جوندەۋگە 10 جوبا 108،0 ملن. تەڭگەگە جانە 1 جوبا جۇمىسپەن قامتۋ ورتالىعىنىڭ عيماراتىن اعىمداعى جوندەۋ 7،2 ملن. تەڭگەگە جوندەلۋدە. جۇمىستاردىڭ ۋاقىتىلى جانە ساپالى اتقارۋ ماقساتىندا ءىس-شارا جوسپارى بەكىتىلىپ، تۇراقتى باقىلاۋعا الىندى. قازىرگى تاڭدا، 29 جوبانىڭ جەڭىمپازدارى انىقتالىپ، 28 جوبا بويىنشا جۇمىستار جۇرگىزىلىپ جاتىر. بايتەرەك اۋىلدىق وكرۋگىندەگى “جيدەلى” كوشەسىندە جول جابىنىن ورتاشا جوندەۋ جۇمىسى جوباسى عانا باستالمادى. ال، بۇگىنگى تاڭدا 29 جوبانىڭ 11 جوباسى اياقتالدى. ولار: سارىكەمەر اۋىلىنداعى ورتالىق اۋرۋحانانى اعىمداعى جوندەۋ، بالالار جاسوسپىرىمدەر سپورت مەكتەبىن اعىمداعى جوندەۋ، سارىكەمەر اۋىلىنداعى ع.مۇراتبايەۆ اتىنداعى گيمنازيانىڭ شاعىن ستاديونىن اعىمداعى جوندەۋ، بايتەرەك اۋىلدىق وكرۋگىندەگى “نوۆايا” جانە “بايزاق باتىر” كوشەلەرىن ەلەكترمەن جارىقتاندىرۋ، اعىمداعى جوندەۋ، سارىكەمەر اۋىلىنداعى ورتالىق كىتاپحانا عيماراتى مەن مۇراجايدى اعىمداعى جوندەۋ، سونىمەن قاتار، سارىكەمەر اۋىلىنداعى “بايزاق باتىر”، “د.قونايەۆ”، “تولە بي”،

“ج.ديداربەكوۆ”، “ۇ.سىزدىقبايەۆ”، “ناۋرىز”، “ساپارالييەۆ”، “م.اۋەزوۆ”، “م.اۋەزوۆ بۇرىلىسى”، “رايىمبەك بابا”، “بۇرالقييەۆ”، “ى.سۇلەيمانوۆ”، “قۇلىمبايەۆ”، “سىپاتاي باتىر”، “بايدىبەك بابا”، “م.مامەتوۆا” كوشەلەرىن اعىمداعى جوندەۋ جۇمىستارى اياقتالدى. اعىمداعى جىلدىڭ شىلدە ايى مەن تامىز ايىنا يگەرۋگە جوسپارلانعان قاراجات 185 260 ملن. تەڭگەنى قۇراسا، ونىڭ 184 798 ملن. تەڭگەسى يگەرىلىپ، يگەرىلمەگەن قارجى كولەمى جەرگىلىكتى بيۋدجەتتەن 5 690 ملن.تەڭگەنى قۇراپ وتىر. ەلباسى نۇرسۇلتان نازاربايەۆ «قازاقستاندىقتاردىڭ ءال-اۋقاتىنىڭ ءوسۋى: تابىس پەن تۇرمىس ساپاسىن ارتتىرۋ» اتتى حالىققا جولداۋىندا اۋىلدىق جەرلەردىڭ الەۋمەتتىك ورتاسىن جاڭعىرتۋ ماقساتىندا «اۋىل — ەل بەسىگى» اۋقىمدى جوباسىنىڭ ىسكە قوسقانىن جوعارىدا ايتتىق. وسى باعدارلاما اياسىندا ەل دامۋىنىڭ التىن بەسىگى بولعان اۋىلدار قارقىندى دامىپ كەلەدى. بۇل جوبا الداعى ۋاقىتتا بۇدان دا ۇلكەن جەتىستىكتەرگە باستايتىنى ءسوزسىز