قازاقستاندا 1 قاراشادان باستاپ مەكەنجاي انىقتاماسىنىڭ جويىلاتىنى بەلگىلى. «ازاماتتارعا ارنالعان ۇكىمەت» مەملەكەتتىك كورپوراسيا باسقارماسىنىڭ ءتوراعاسى اسەمگۇل بالتاشيەۆا ودان بولەك تاعى 28 انىقتامانىڭ دا جويىلاتىنىن جاريالادى، دەپ حابارلايدى Qamshy.kz اقپارات اگەنتتىگى قازاقپارات.

«ەلىمىزدە مەكەنجايى انىقتاماسىن جويۋ – جۇمىستىڭ باسى عانا. ءبىز قازىرگى ۋاقىتتا ءدال وسىنداي 28 انىقتامانى جويۋدى كوزدەپ وتىرمىز. ياعني، تاعى 28 انىقتامانى الۋ ءۇشىن حالىققا قىزمەت كورسەتۋ ورتالىعىنا بارۋدىڭ قاجەتى بولماي قالادى»، – دەدى اسەمگۇل بالتاشيەۆا ەلوردادا ءوتىپ جاتقان «سيفرلىق كۇز» شاراسىندا.

ونىڭ ايتۋىنشا، ءارتۇرلى سيپاتتاعى انىقتامالار مەن قۇجاتتار ومىرلىك قاجەتتىلىكتەردەن تۋىندايدى.

«ءبىز شەتەلدىك تاجىريبەلەردىڭ كوبىن زەرتتەپ، قىزمەتتەردىڭ ساپاسى مەن قولجەتىمدىلىگىن ارتتىرۋ ءۇشىن اۋقىمدى تالداۋ جۇمىستارىن جۇرگىزدىك. بەلگىلى ءبىر قۇجاتتى الۋ ءۇشىن مىندەتتى تۇردە ۋاقىت ءبولىپ، مەكەمە ارالاۋدىڭ قاجەتتىگى جويىلىپ بارادى. مەملەكەتتىك قىزمەتتەردى الۋدىڭ پرواكتيۆتى تۇردە الۋ مۇمكىندىگىن جولعا قويدىق. پرواكتيۆ دەگەنىمىز – قىزمەتتىڭ ءوزىنىڭ ازاماتتاردى ىزدەپ تابۋى دەگەندى بىلدىرەدى. قايدا بارام، نە ىستەيمىن دەپ باس قاتىرۋدىڭ كەرەگى جوق. وسىناۋ 28 مەملەكەتتىك قىزمەتتىڭ ءتۇرىن 17 پرواكتيۆتى قىزمەتكە اۋىستىرىپ جاتىرمىز. ياعني، 28 قىزمەتتىڭ ءتۇرىن رەگيستردەن الىپ تاستايمىز»، – دەدى اسەمگۇل بالتاشيەۆا.

ەسكە سالا كەتسەك، ىشكى ىستەر مينيسترلىگى قازاقستاندا مەكەنجاي انىقتاماسى جويىلاتىنىن بۇعان دەيىن حابارلاعان بولاتىن.