توقايەۆ پەن پۋتين سوچيدە كەزدەستى دەپ حابارلايدى Qamshy.kz اقپارات اگەنتتىگى akorda.kz سايتىنا سىلتەمە جاساپ.

رەسمي كەزدەسۋ راسىمىنەن كەيىن مەملەكەتتەر باسشىلارى شاعىن جانە كەڭەيتىلگەن قۇرامدا كەلىسسوزدەر جۇرگىزدى.

قاسىم-جومارت توقايەۆ قازاقستان پرەزيدەنتى لاۋازىمىنا كىرىسۋىنە بايلانىستى قۇتتىقتاعانى جانە جىلى لەبىز بىلدىرگەنى ءۇشىن ۆلاديمير پۋتينگە ريزاشىلىق ءبىلدىرىپ، ءوزىنىڭ العاشقى شەتەلدىك ساپارىنىڭ رەسەي فەدەراسياسىنا جاسالۋىنىڭ سيمۆولدىق ءمانىن اتاپ ءوتتى.

مەملەكەت باسشىسى قازاقستان مەن رەسەيدىڭ قازىرگى ىقپالداستىعى كوپشىلىك ءۇشىن قارىم-قاتىناس جاساۋدىڭ جارقىن ۇلگىسى بولىپ سانالاتىنىن ايتتى.

– مەملەكەت باسشىسى رەتىندە مەن قازاقستاننىڭ تۇڭعىش پرەزيدەنتى – ەلباسى نۇرسۇلتان ءابىش ۇلى نازاربايەۆ ساياساتىنىڭ ساباقتاستىعىن قامتاماسىز ەتىپ، قازاقستان مەن رەسەي اراسىنداعى ەكىجاقتى ىنتىماقتاستىقتى جان-جاقتى ءارى بەلسەندى دامىتۋ ءىسىن جالعاستىرا بەرەمىن، – دەدى قاسىم-جومارت توقايەۆ.

قازاقستان پرەزيدەنتى ەكى ەلدىڭ ەكونوميكالىق ىنتىماقتاستىعىنا، اسىرەسە ەنەرگەتيكا، كولىك، ترانزيت، ونەركاسىپ جانە عارىش سالالارى ماسەلەلەرىنە ارنايى توقتالدى.

– رەسەي قازاقستاننىڭ سىرتقى ساۋداسىنداعى «ءنومىرى ءبىرىنشى» ارىپتەسى بولىپ قالا بەرەدى. قازاقستاننىڭ ساۋدا اينالىمىنداعى ونىڭ مەنشىكتى ۇلەسى 19 پايىز. ينۆەستيسيالىق ىنتىماقتاستىق قارقىندى دامۋدا. ەلىمىزدە رەسەي كاپيتالى قاتىساتىن 9 مىڭنان استام كاسىپورىن ءوز جۇمىستارىن تابىستى اتقارۋدا، – دەدى مەملەكەت باسشىسى.

ۆلاديمير پۋتين قاسىم-جومارت توقايەۆتىڭ مەملەكەت باسشىسى رەتىندە رەسەيگە العاشقى ساپارىنىڭ سيمۆولدىق ءمانىن اتاپ ءوتىپ، ەكى ەل اراسىنداعى بايلانىستاردىڭ جوعارى دەڭگەيدە ەكەنىن ايتتى.

– ءسىز قارىم-قاتىناسىمىزدىڭ دەڭگەيىن بىلەسىز جانە ءوزىڭىز دە بۇعان كوپ ۇلەس قوستىڭىز. ارينە، بۇل – قازاقستاننىڭ تۇڭعىش پرەزيدەنتى نۇرسۇلتان نازاربايەۆتىڭ قاجىرلى ەڭبەگى. ءبىزدىڭ جاي ارىپتەس قانا ەمەس، حالىقارالىق ۇيىمدار اياسىندا دا، ەكىجاقتى بايلانىستار بويىنشا دا جاقىن وداقتاس ەكەنىمىز ءسوزسىز. قارىم-قاتىناسىمىز وتە ءتيىمدى دامۋدا. ناقتى ءارى ايقىن ناتيجەلەرگە قول جەتكىزىپ كەلەمىز. بۇل حالىقتارىمىزدىڭ تىنىس-تىرشىلىگىنەن كورىنىس تاۋىپ وتىر. ءسىزدىڭ بۇگىنگى ساپارىڭىز كەڭ اۋقىمداعى ەكىجاقتى وداقتاستىق بايلانىستارىمىزدى نىعايتۋعا سەپتىگىن تيگىزەتىنىنە سەنىمدىمىن، – دەدى ۆلاديمير پۋتين.

كەزدەسۋ بارىسىندا مەملەكەتتەر باسشىلارى مادەني-گۋمانيتارلىق سالاداعى مەملەكەتارالىق ءوزارا ىقپالداستىق ماسەلەلەرىن تالقىلادى، سونداي-اق وڭىرلىك جانە حالىقارالىق كۇن تارتىبىندەگى وزەكتى تاقىرىپتار بويىنشا پىكىر الماستى.