قازاقستان رەسپۋبليكاسىنىڭ پرەزيدەنتى قاسىم-جومارت توقايەۆ «سىندارلى قوعامدىق ديالوگ-قازاقستان تۇراقتىلىعى مەن وركەندەۋىنىڭ نەگىزى» اتتى قازاقستان حالقىنا جولداۋىندا دەنساۋلىق ساقتاق سالاسىن دامىتۋعا قاتىستى دا مىندەتتەردى ناقتىلاپ بەردى.

مەملەكەت باسشىسى مەديسينالىق قىزمەت كورسەتۋدىڭ ساپاسى مەن قولجەتىمدىلىگىن قامتاماسىز ەتۋ تۋرالى تارقاتا ايتا كەلە «بۇل جەردە حالىقتىڭ دەنساۋلىعىنا بايلانىستى، اسىرەسە، انا مەن ءسابي ولىمىنە قاتىستى كورسەتكىشتەردىڭ وڭىرلىك تەڭگەرىمسىزدىگى ايقىن كورىنەدى.

دەگەنمەن، بۇل كورسەتكىش تومەندەپ كەلەدى. ءبىراق ءالى دە جوعارى، سونداي-اق دامىعان ەلدەردىڭ دەڭگەيىنەن ايتارلىقتاي كوپ.

ۇكىمەت ءار ءوڭىر بويىنشا مەديسيناداعى ناقتى دەرتتەر توپتاماسى جونىندە باسىمدىقتار ءتىزىمىن جاساپ، سونىڭ نەگىزىندە بيۋدجەتتەن قارجى ءبولۋى قاجەت.

2020 جىلعى 1 قاڭتاردان باستاپ قازاقستاندا مىندەتتى الەۋمەتتىك مەديسينالىق ساقتاندىرۋ جۇيەسى ىسكە قوسىلادى» دەپ اتاپ كورسەتتى.

سونىمەن قاتار پرەزيدەنت جىلدىڭ باستى قۇجاتىندا مىندەتتى الەۋمەتتىك مەديسينالىق ساقتاندىرۋدىڭ جۇزەگە اسىرىلۋى مەديسينالىق قىزمەت كورسەتۋدىڭ ساپاسى مەن قولجەتىمدىلىگىن جاقسارتۋعا باعىتتالعانىنا ايرىقشا تولتالدى.

«ءۇشجىلدىق بيۋدجەت اياسىندا دەنساۋلىق ساقتاۋ جۇيەسىن دامىتۋعا قوسىمشا 2،3 تريلليوننان استام تەڭگە بولىنەدى.

ۇكىمەت الەۋمەتتىك مەديسينالىق ساقتاندىرۋ جۇيەسىنىڭ بەدەلىنە تاعى دا نۇقسان كەلتىرمەۋ ءۇشىن ونى جۇزەگە اسىرۋ ماسەلەسىنە زور جاۋاپكەرشىلىكپەن قاراۋى قاجەت.

ءبىزدىڭ قاتەلەسۋگە قۇقىمىز جوق» دەدى مەملەكەت باسشىسى.

جولداۋ جۇكتەگەن مىندەتتەر قورداي اۋدانىندا دا جۇيەلى جۇزەگە اسىرىلاتىن بولادى. اسىرەسە، دەنساۋلىق ساقتاۋ مەكەمەلەرىنىڭ ماتەريالدىق-تەحنيكالىق بازاسىن نىعايتۋعا باسا نازار اۋدارىلۋدا. وسى ورايدا مەملەكەتتىك-جەكەشەلىك ارىپتەستىكتىڭ مۇمكىندىكتەرى كەڭىنەن پايدالانىلماق.

جالپى اۋداندا مەملەكەتتىك-جەكەشەلىك ارىپتەستىك اياسىندا دەنساۋلىق ساقتاۋ سالاسى بويىنشا 8 نىساننىڭ قۇرىلىسى اياقتالۋدا. ولاردىڭ قاتارىندا كەنەن، ستەپنوە اۋىلدارىندا اشىلاتىن 2 دارىگەرلىك امبۋلاتوريا بار. سونىمەن قاتار كالگۋتى، كىزىلساي اۋىلدارىندا فەلدشەرلىك اكۋشەرلىك پۋنكتەر ەسىگىن ايقارا اشپاق، ال بەل، مۇزبەل، سارىباستاۋ، بايتەرەك اۋىلدارىندا مەديسينالىق تىرەك ىسكە قوسىلادى.