مەملەكەت باسشىسى ق.توقايەۆتىڭ قازاقستان حالقىنا العاشقى جولداۋىندا ءمان بەرگەن ماڭىزدى ماسەلەلەردىڭ قاتارىندا ينفراقۇرىلىمدى دامىتۋ جايى دا بار. وسى ورايدا پرەزيدەنت «الداعى ءۇش جىل ىشىندە تۇرعىنداردى تازا اۋىز سۋمەن جانە سۋ جەتكىزۋمەن قامتاماسىز ەتۋگە شامامەن 250 ميلليارد تەڭگە بولىنەدى.

اتقارۋشى بيلىك ورگاندارى «نۇرلى جول» باعدارلاماسىن تولىق جانە ساپالى ىسكە اسىرۋعا باسا ءمان بەرۋى كەرەك.

بۇل – ستراتەگيالىق جوبا. سونىڭ ارقاسىندا بۇكىل كولىك ينفراقۇرىلىمى جاڭعىرتىلادى.

وسى ماقساتقا وراي، مەملەكەت 2022 جىلعا دەيىن 1،2 تريلليون تەڭگەدەن استام ينۆەستيسيا سالادى.

ۇكىمەت بۇعان دەيىن دە كوپ قاراجات بولگەن بولاتىن، ءبىراق ونىڭ كوبى قۇمعا سىڭگەن سۋداي جوق بولىپ كەتتى. اشىعىن ايتساق، شەنەۋنىكتەردىڭ قالتاسىنا كەتتى، ال تازا سۋ، جول جانە باسقا دا ينفراقۇرىلىمنىڭ جاعدايى ءالى دە سول كۇيىندە.

بۇل جولى ۇكىمەت پەن پارلامەنت ەسەپ كوميتەتىمەن بىرلەسىپ، بيۋدجەت قاراجاتىن تولىعىمەن ءتيىمدى پايدالانۋدى قامتاماسىز ەتۋى ءتيىس» دەپ اتاپ ءوتتى.

بۇگىندە قورداي اۋدانىندا ەلدى مەكەندەردى اۋىزسۋمەن، گازبەن قامتۋ، اۆتوموبيل جولدارىن جاڭعىرتۋ جۇمىستارى جاندانا تۇسۋدە.

بەكىتىلگەن مەجەگە سايكەس ايماقتا ورتالىقتاندىرىلعان سۋمەن قامتاماسىز ەتۋ ينديكاتورى 70،7 پايىزعا جوسپارلانىپ، ورىندالعان. ياعني، اعىمداعى جىلى ءالجان انا اۋىلىندا سۋ جۇيەسىنىڭ قۇرىلىسى اياقتالىپ وتىر. ناتيجەسىندە ينديكاتور بىلتىرعى جىلدىڭ ەسەپتى كەزەنىمەن سالىستىرعاندا 2 پايىزعا ۇلعايىپ، 29 ەلدى مەكەن ورتالىقتاندىرىلعان سۋمەن قامتىلعان.

ال بەكىتىلگەن مەجەگە سايكەس ورتالىقتاندىرىلعان گازبەن قامتاماسىز ەتۋ ينديكاتورى 29 پايىزعا جوسپارلانىپ، بىلتىرعى جىلدىڭ دەڭگەيىندە ساقتالىپ وتىر. قورداي اۋدانىنداعى ەلدى مەكەندەردى گازداندىرۋ ماسەلەسىن كەزەڭ-كەزەڭىمەن شەشۋ بولجامدانىپ، بۇگىندە ءى كەزەڭ بويىنشا وتار اۋماعىنداعى ەلدى مەكەندەردى گازداندىرۋ ءۇشىن جوبالىق-سمەتالىق قۇجاتتاماسىن ازىرلەۋگە اۋداندىق بيۋدجەتتەن 28،5 ميلليون تەڭگە ءبولىنىپتى.

جول جوندەۋ جۇمىستارى دا جەرگىلىكتى بيلىكتىڭ ءجىتى نازارىندا. اۋدان بويىنشا جالپى 583،8 شاقىرىم جولدار بار. ولاردىڭ 263 شاقىرىمى رەسپۋبليكالىق ماڭىزى بار جولدار. سونداي-اق وبلىستىق ماڭىزى بار 105 شاقىرىم جانە اۋداندىق ماڭىزى بار 215،8 شاقىرىم بار.

ەسەپتى كەزەڭدە نوعايباي-سارىباستاۋ اۋىلدارى ارالىعىنداعى 2،5 شاقىرىم جانە بەتقاينار-سوعاندى ارالىعىنداعى 3 شاقىرىم جولعا جوندەۋ جۇمىستارى اياقتالىپ، ناتيجەسىندە ينديكاتور 78 پايىزدى قۇرادى. ال وتەگەن-بايتەرەك اۋىلدارى ارالىعىنداعى ۇزىندىعى 8 شاقىرىم جولدىڭ جوندەۋ جۇمىستارى اياقتالعان سوڭ ينديكاتور 100 پايىز ورىندالىپ، بىلتىرعى جىلمەن سالىستىرعاندا 4 پايىزعا ارتادى دەپ كۇتىلۋدە.