جامبىل اۋدانىنداعى اقبۇلىم اۋىلى ماڭىنداعى قامىستىبۇلاق شاتقالىندا قولا داۋىرىنەن ورتا عاسىرعا دەيىنگى ارالىقتى قامتيتىن ارحەولوگيالىق ەسكەرتكىش ورنالاسقان. «قازاقستاننىڭ كيەلى جەرلەرى گەوگرافياسى» جوباسىنا وڭىرلىك ماڭىزعا يە نىسان رەتىندە ەنگەن بۇل ورىندا 50-گە جۋىق جارتاسقا قاشالىپ سالىنعان پەتروگليف بار، دەپ جازادى Qamshy.kz اقپارات اگەنتتىگى.
كونە زاماننىڭ كوزىندەي جارتاستارعا بەينەلگەن سۋرەتتەر قالعان قامىستىبۇلاق شاتقالى بەس تاۋ قىراتىنان تۇرادى. ەل اراسىندا ەرتەرەكتە بۇل شاتقالدىڭ ىشىندە بۇلاق سۋىنان اققان سۋدىڭ وزەنگە اينالىپ، ونىڭ جاعاسىنا قالىڭ قامىستىڭ قاۋلاي وسكەنىنە وراي شاتقالدىڭ قامىستىبۇلاق اتالعانى ايتىلادى. دەگەنمەن ءقازىر بۇل شاتقالداعى بۇلاق سۋى تارتىلىپ، وزەن كولشىككە اينالعان، جاعاسىنداعى قامىستارى قۋراپ كەتكەن.
شاتقالدىڭ كۇنەگەي قاپتالىنداعى قارا گرانيت تاستار بىردەن كوزگە تۇسەدى. وسى تاستاردىڭ بەتىندە شەكىپ سالعان ونەر تۋىندىلارىن كەزدەستىرۋگە بولادى. پەتروگليفتەر شاتقالدىڭ بويىنداعى 1 شاقىرىم ارالىقتاعى جارتاستاردىڭ كوبىندە كەزدەسەدى. قازىرگى تاڭدا بۇل جارتاستارداعى ەلۋدەن استام سۋرەتتەر بەلگىلى. ولاردا تاۋەشكى، تۇيە، بۇقا سياقتى جانۋارلار جانە اڭشىلار مەن جاۋىنگەرلەر بەينەلەنگەن. پەتروگليفتەردە تاۋەشكى بەينەسىنىڭ جاي سۇلباسى عانا بەرىلسە، بۇقا مەن تۇيەلەردىڭ بەينەلەرى نۇكتەلەرمەن تولىقتىرىلىپ تۇسىرىلگەن. ال ادام بەينەلەرىنەن قولىنا كۇن ۇستاپ بەينەلەگەن. كەيبىرىندە ساداق اتقان اڭشى، نايزاسىن كولدەنەڭ ۇستاعان جاۋىنگەر، بي ۇستىندەگى ەكى ادامدى كورۋگە بولادى. سونداي-اق قولىنا قايقى قىلىش ۇستاعان سالت اتتى ادامنىڭ بەينەسى ورتاعاسىرلار كەزەڭىنە جاتاتىن بولسا كەرەك. نەگىزىنەن بۇل سۋرەتتەردە كونە زامانداعى تايپالاردىڭ تىرشىلىگى مەن سالت-ساناسىنداعى نىشاندار بەينەلەنگەن. ءارى پەتروگليفتەر ارقىلى سول زامانداعى تايپالاردىڭ تىنىس – تىرشىلىگىن تانۋعا بولادى. مۇنداعى اڭشىلىق پەن قارۋلى سارباز بەينەسى قازاقتىڭ اتتىڭ جالىندا، تۇيەنىڭ قومىنداعى جاۋگەرشىلىك زامانىنان حابار بەرەدى. تاۋتەكەنىڭ ءمۇيىزى مەن كۇننىڭ بەينەسى بۇگىنگى مەملەكەتتىك رامىزدەرگە تاڭبالانعان قاستەرلى نىشاندار
عالىمدار بۇل جارتاستارداعى بەينەلەردى كونە تاريحتان سىر شەرتەتىن قۇندى دەرەك كوزى ءارى «اشىق اسپان استىنداعى گالەرەيا» دەپ تانيدى.ءوز كەزەگىندە مۇندا جەرگىلىكتى جەردەگى مەكتەپ وقۋشىلارى ءجيى كەلىپ، ونداعى تاريحي جادىگەرلەرمەن تانىسىپ تۇرادى.
پىكىر قالدىرۋ