جامبىل وبلىسى قازاقستان حالقى اسسامبلەياسىنىڭ «جاڭعىرۋ جولى» جاستار قوزعالىسىنىڭ «جاستار جىلىنا» ارنالعان ءىس-شارالار جوسپارىنا سايكەس وبلىستىڭ «جاڭعىرۋ جولى» جاستارى رەسپۋبليكالىق «ەلتانۋ» تۋريستىك-ولكەتانۋ ەكسپەديسياسى اياسىندا تۇركىستان وبلىسىنىڭ تاريحتان سىر شەرتەر كونە جەرلەرىنە ارالاۋعا باعىتتالعان ەكسكۋرسيانىڭ ەكىنشى بولىمىندە جاستاردى تۇركىستان كۇتىپ تۇرعان ەدى دەپ جازادى Qamshy.kz اقپارات اگەنتتىگى. ەكسكۋرسيانىڭ ەكىنشى كۇنى قوجا احمەت ياسساۋي، رابيعا-سۇلتان بەگىم كەسەنەلەرى، قوجا احمەت ياسساۋي كەسەنەسىنىڭ ماڭىنان ورىن تەپكەن ەمدىك قاسيەتكە يە شىعىس مونشاسى، حيلۆەت جەر استى مەشىتىنە، ءشاۋىلدىر اۋىلىنداعى ارىستان-باب كەسەنەسى (ق.ا. ءياسساۋيدىڭ ءمۇعالىمى جانە رۋحاني تالىمگەرى)، وتىرار قالاشىعى (ارحەولوگيالىق قازبالار)، وتىرار تاريحي-ولكەتانۋ مۇراجايىنا ساياحات جاساعان جاستار تاريحپەن بەتپە-بەت كەلگەندەي اسەر العاندارىن جاسىرمادى.

ق.ا.ياسساۋي كەسەنەسى XIV عاسىردىڭ سوڭىندا تۇرعىزىلعان ارحيتەكتۋرالىق عيمارات. قوجا احمەت ياسساۋي دۇنيە سالعاننان كەيىن حالىقتىڭ كوپ جيىلۋىمەن وزىنە ارناپ سوعىلعان كىشكەنە مازارعا جەرلەنەدى. كەيىن بۇل كەسەنە مۇسىلمانداردىڭ جاپپاي ءتاۋ ەتۋ ورنىنا اينالعان. مەكەمە قىزمەتكەرلەرى اسسامبلەيا جاستارىنا باسسۇققان ءار كيەلى ورىندى ءجىتى تانىستىردى. ولار تۋرالى كوپتەگەن اقپاراتتارمەن ءبولىسىپ، تاريح تۇنىعىنان سۋسىنداتتى.

ساياحات بارىسىندا شتابتىڭ بەلسەندى مۇشەسى ليگوستايەۆ ارتۋر:

- «قازاق دالاسىنىڭ ءار تاسىن تۇرتسەڭ تاريحىن كورەسىڭ. بۇل مەن ءۇشىن وتە قىزىقتى ساپار بولدى. سەبەبى، مۇنداي كورىنىستەر ءبىزدى سان عاسىرلارعا كوز جۇگىرتەدى. ال، وتكەنىمىز - تاريحىمىز. تاريحتا ءبىزدىڭ اتا-بابالارىمىزدىڭ ءىزى بار. بۇل ەكسكۋرسيا بىزگە تەك كوڭىلدى ساياحات قانا ەمەس، تۇنىپ تۇرعان رۋحانيات. مەن وسىندا كەلگەنىمە وتە قۋانىشتىمىن جانە وسى ساياحاتتى ۇيىمداستىرعان وبلىستىق اسسامبلەياعا العىسىمدى ايتامىن. الداعى ۋاقىتتا جاستارعا وسىنداي رۋحاني، مادەني، تاريحي ازىق سىيلايتىن ءوڭىرارالىق «ولكەتانۋ» تۋرلارى كوپ بولسا ەكەن. ءبىز ءبىر ءسات كۇندەلىكتى كۇيبەڭ تىرشىلىكتەن سەرگىپ، تاريحقا ساياحات جاساپ قايتتىق.» - دەپ ءوز ويىمەن ءبولىستى.

ساپار سوڭىندا اسسامبلەيا جاستارى تۇركىستاننان «تابارىك» رەتىندە تۋىستارى مەن تانىستارىنا ءتۇرلى سۋۆەنير-بازارلىقتار الىپ، كيەلى تۇركىستان كەسەنەلەرى ماڭىندا سۋرەتتەرگە ءتۇستى.