«ادال جۇرەك» جالپىرەسپۋبليكالىق قايىرىمدىلىق ناۋقانى اياسىندا «جامبىل-ادالدىق الاڭى» جوباسى شەڭبەرىندە 600 جۇزگە جۋىق قۇقىق قورعاۋ ورگاندارى مەن مەملەكەتتىك قىزمەتشىلەردىڭ قاتىسۋىمەن سالاۋاتتى ءومىر ءسۇرۋ سالتى مەن مەيىرىمدىلىكتى جانە پاراساتتىلىقتى ناسيحاتتاۋ، الەۋمەتتىك كومەككە مۇقتاج جاندارعا قولداۋ كورسەتۋ ماقساتىندا قايىرىمدىلىق مارافونى ءوتتى. مارافوندى جامبىل وبلىسى اكىمىنىڭ ءبىرىنشى ورىنباسارى بەكبولات ورىنبەكوۆ اشىپ، قاتىسۋشىلارعا ساتتىلىك تىلەدى. بۇدان كەيىن تاراز قالاسىنىڭ دوستىق داڭعىلىنان باستاپ تولە بي كوشەسىنىڭ بويىمەن قازاقستان رەسپۋبليكاسىنىڭ تۇڭعىش پرەزيدەنتى ساياباعىنا دەيىن 2400 مەتر جەردى قۇقىق قورعاۋ ورگاندارى مەن مەملەكەتتىك قىزمەتشىلەر جۇگىرىپ ءوتتى. ءاربىر قاتىسۋشى مارافوننىڭ باستالۋى الدىندا ەرىكتى تۇردە قايىرىمدىلىق جارناسىن تولەگەنىن دە ايتا كەتكەن ءجون. شارا سوڭىندا قاتىسۋشىلار مەن جەڭىمپازداردى ۇيىمداستىرۋشىلار كۋبوك جانە ديپلومدارمەن ماراپاتتادى. ال مارافونعا قاتىسپاعاندار وبلىستىق قان ورتالىعىندا قان تاپسىرىپ، قايىرىمدى ءىس جاسادى.

بۇگىنگى كۇنگە وبلىستا دەنە شىنىقتىرۋ جانە سپورتپەن جۇيەلى تۇردە شۇعىلدانۋشىلار قاتارى 333،9 مىڭنان استام ادامعا نەمەسە 29،6 پايىزعا جەتتى. سونىڭ ىشىندە دەنە شىنىقتىرۋ جانە سپورتپەن جۇيەلى تۇردە شۇعىلداناتىن 14 جاستان 29 جاسقا دەيىنگى جاستار سانى 147،4 مىڭ ادامدى قۇراپ وتىر. سونىمەن قاتار سپورتپەن تۇراقتى شۇعىلداناتىن دەنە مۇمكىندىگى شەكتەۋلى ادامدار قاتارى 2746 ادام نەمەسە 7،9 پايىزدى مەجەلەۋدە.

قازىرگى كەزدە وڭىردە وبلىستىڭ باي سپورتتىق ءداستۇرىن تابىستى جولعا قويۋعا بارىنشا ىقپال ەتىپ وتىرعان 48 سپورت مەكەمەسى بار. ولاردىڭ قاتارىندا، سپورت تۇرلەرى بويىنشا 6 سپورت كلۋبى، «بۇقارالىق-سپورتتىق شارالار وتكىزۋ ورتالىعى»، «جوعارى سپورت شەبەرلىگى مەكتەبى»، «وليمپيادا جەتكىنشەكتەرىن دايارلاۋ ورتالىعى»، «تاراز-ارەنا» سپورت سارايى، «وبلىستىق مامانداندىرىلعان دارىندى بالالار مەكتەپ-ينتەرناتى»،تالاس اۋدانىنداعى «دەنە شىنىقتىرۋ-ساۋىقتىرۋ كەشەنى»، قورداي اۋدانىنداعى «بۇقارالىق سپورتتىق ءىس-شارالار وتكىزۋ ورتالىعى» جانە 35 بالالار-جاسوسپىرىمدەر سپورت مەكتەپتەرى تۇر. ولاردىڭ 30-ى اۋدان اكىمدىكتەرىنىڭ قۇزىرىندا.

جالپى، وبلىستىڭ سپورت مەكەمەلەرىندە سپورتتىڭ 43 ءتۇرى قامتىلعان. ونىڭ ىشىندە 24 وليمپيادالىق، 12 وليمپيادالىق ەمەس جانە 7 ۇلتتىق سپورت تۇرلەرى.

بۇگىنگىكۇنگە وبلىستا سپورت نىساندارىنىڭ جالپى سانى 2 364-كە جەتسە، ونىڭ ىشىندە اۋدانداردا 1 856 سپورت نىسانى ورنالاسقان. سپورت نىساندارىنىڭ 98 پايىزى حالىققا قولجەتىمدى. جىل سوڭىنا دەيىن قولجەتىمدىلىكتى 100 پايىزعا جەتكىزۋ كوزدەلىپ وتىر.