سپورتسۇيەر قاۋىم بيىلعى قىركۇيەك ايى سپورتتىق جارىستارعا تولى بولعانىن جاقسى بىلەدى. تاياۋدا عانا جامبىل وبلىسى، جامبىل اۋدانىنىڭ اكىمى باقىت قازانباسوۆتىڭ كۋبوگىن ساراپقا سالعان بالعىن بالۋاندارىمىز وبلىستىق دەڭگەيدە وتكەن جارىستا اتوي سالسا، حالىقارالىق دودالاردا دا دارا شىعىپ جۇرگەن جامپوزدارىمىز از ەمەس. سونىڭ ءبىرى – جەرلەسىمىز، قاراكەمەرلىك 20 جاسار جانسەرىك جۇماباي سامبو كۇرەسىنەن ءۇندىستاندا وتكەن ازيا چەمپيوناتىندا جەڭىمپاز اتانىپ، ابىرويىمىزدى اسقاقتاتتى، دەپ جازادى Qamshy.kz اقپارات اگەنتتىگى. 

بايراقتى باسەكەدە ەلىمىزدىڭ كوك تۋىن كوككە كوتەرىپ، ءانۇرانىمىزدى شىرقاتقان جانسەرىكپەن جارىستان كەيىن تىلدەسۋدىڭ ءساتى ءتۇستى.

– مۇنداي ايتۋلى جارىسقا العاش رەت قاتىسىپ وتىرمىن. قارسىلاستارىم وسال ەمەس ەدى. ءبارى دە چەمپيوندىقتان دامەلى. ارينە، جارىسقا ەشكىم جەڭىلەمىن دەپ كەلمەيدى. سوندىقتان مەندە ازيا چەمپيوناتىنا ۇلكەن دايىندىقپەن كەلدىم. 100 كەلىدە وزكىلەمگە العاش قىرعىز بالۋانىمەن شىقسام، ەكىنشى قارسىلاسىم اۋعان ەلىنىڭ الىپ جىگىتى بولدى. ءۇشىنشى قارسىلاسىم ءۇندى ەلىنىڭ ءۇمىتى. ءبارىن دە بەلگىلەنگەن ۋاقىتتان بۇرىن جەڭدىم. اقتىق باسەكەنى وزبەكتىڭ بالۋانىمەن بەلدەسىپ، ودان ايلامدى اسىردىم. مەنىڭ بيىكتەن كورىنۋىم ءبىرىنشى اللانىڭ، ەكىنشى باپكەرلەرىم مەن جانكۇيەرلەرىمنىڭ ارقاسى.

مەنىڭ تۇسىنگەنىم، باپ پەن ب ا ق قاتار شاپسا، باعىندىرا المايتىن بيىگىڭ بولمايدى ەكەن. بارشا قازاقستاندىقتارعا قولداۋلارى ءۇشىن ايتار العىسىم شەكسىز. مەنىڭ كۇرەسپەن اينالىسۋىما شەكتەۋ قويماعان اكەم جانبولات پەن انام گۇلنۇرعا، تولە بي اتىنداعى ورتا مەكتەپ مۇعالىمدەرىنە، سىنىپ جەتەكشىمە راقمەتتەن باسقا ايتارىم جوق.

بەلدەسۋدى مۇنىمەن شەكتەۋ ويىمدا جوق. الداعى قازان ايىنىڭ 10-14 كۇندەرى وزبەكستاندا سامبودان جاستار اراسىندا وتەتىن الەم چەمپيوناتىنا قاتىسىپ، باعىمدى سىناپ كورمەكپىن. بۇل دودادا دا جۇزدەن جۇيرىك شىعۋعا بارىمدى سالامىن، – دەيدى تولاعايىمىز.

ايتا كەتەيىك جانسەرىك قاراكەمەر اۋىلىنىڭ تۋماسى بولعانىمەن، ءقازىر الماتى قالاسىنداعى قازاقتىڭ تۋريزم جانە سپورت اكادەمياسىنىڭ 4-كۋرس ستۋدەنتى. سوندىقتان دا الماتى وبلىسىنىڭ اتىنان ونەر كورسەتۋدە. الايدا قاي ءوڭىردىڭ اتىنان شىقسا دا ەڭ باستىسى ەلىمىزدىڭ اتىن الەمدىك ارەنادا تانىنىپ جۇرگەن باتىر ۇلىمىز.

جانسەرىكتىڭ الەم چەمپيوناتىندا دا ەل نامىسىن ابىرويمەن قورعايتىنىنا بەك سەنىمدىمىز.

بالۋانعا وڭ-سولى ءبىر ەكەنىن دالەلدەي بىلگەن جانسەرىك سامبومەن قاتار قازاق كۇرەسى، دزيۋدونى دا قاتار الىپ ءجۇر. ول قازاق كۇرەسىنەن دە، دزيۋدودان دا قازاقستان رەسپۋبليكاسىنىڭ ەكى دۇركىن چەمپيونى.

اعاعا قاراپ ءىنى وسەر دەسەك، جانسەرىكتىڭ ءىنىسى جانتورە دە قازاق كۇرەسىنەن ەل چەمپيونى. 9 جاستاعى قاسىمحان، ەسىمحان ەسىمدى ىنىلەرى دە كۇرەسپەن اينالىسىپ جۇرگەن بالعىندار.

ەندەشە بالۋاندار وتباسىنىڭ ءاردايىم ايى وڭىنان تۋسىن دەپ تىلەيىك. جانە الداعى الەم چەمپيوناتىندا جانسەرىكتىڭ جەڭىستى جورىعى جالعاسا ءتۇسسىن.