جامبىل وبلىسىندا «اۋىل–ەل بەسىگى» جوباسى اياسىندا اۋىل شارۋاشىلىعى ونىمدەرىن وندىرۋدە جوعارى جەتىستىكتەرگە قول جەتكىزگەن اگروقۇرىلىمداردىڭ تابىسقا جەتۋ سىرلارى، جۇمىس جاساۋ جۇمىسىن نسيحاتتاۋ شارالارى ءوز دەڭگەيىندە ناسيحاتتاۋ قولعا الىنۋدا، دەپ جازادى Qamshy.kz اقپارات اگەنتتىگى. 

بۇل جوبا ەلباسى-تۇڭعىش پرەزيدەنت نۇرسۇلتان نازاربايەۆتىڭ وتكەن جىلعى «قازاقستاندىقتاردىڭ ءال-اۋقاتىنىڭ ءوسۋى: تابىس پەن تۇرمىس ساپاسىن ارتتىرۋ» اتتى قازاقستان حالقىنا جولداۋىندا اۋىل ەڭبەككەرلەرىن ناسيحاتتاۋ، شالعاي ەلدى مەكەندەردەگى الەۋمەتتىك ورتانى جاقسارتا ءتۇسۋ ماقساتىندا جۇزەگە اسىرىلىپ وتىر.

–ەلباسى تاپسىرماسىمەن ىسكە قوسىلعان بۇل جوبا اۋىلدىق اۋماقتاردىڭ ونداعى ەڭبەك ادامدارى مارتەبەسىنىڭ جوعارى ەكەنىن تانىتۋدى ماقسات ەتەدى. سونداي-اق جالپى قوعامنىڭ اۋىلعا دەگەن كوزقاراسىن وزگەرتۋ ارقىلى اگروونەركاسىپ كەشەنىنىڭ تابىستىلىعىن ارتتىرۋدى كوزدەيدى. اتالعان جوبانى ىسكە اسىرۋ بارىسىندا «قارقىندى باقتار ءبىزدىڭ بولاشاق»، «ەكولوگيالىق تازالىق» دەپ اتالاتىن شارالار دا وتكىزىلدى. بۇل شارالار اياسىندا كوكتەم ايلارىندا اۋىلدىق جەرلەردە باقتاردى وتىرعىزۋ جانە كۇزدە جيناۋ اكسيالارى جانە ەكولوگيالىق تازالاۋ اكسيالارى جۇزەگە اسىرىلادى. سونداي-اق «اۋىل–ەل بەسىگى» جوباسى اياسىندا الداعى ۋاقىتتا وڭىردەگى اۋىل شارۋاشىلىق ونىمدەرىن ءوندىرۋ بويىنشا تابىستى شارۋا قوجالىقتاردى «ۇزدىك فەرمەر» جانە «100 جاڭا فەرمەر» بايقاۋى ارقىلى كەڭىرەك ناسيحاتتالاتىن بولادى. ەڭ ۇزدىك اۋىل شارۋاشىلىق قۇرىلىمدارىن تانىتۋدى ماقسات ەتكەن بايقاۋ اۋدان، وبلىس، رەسپۋبليكا دەڭگەيىندە وتكىزىلەدى. مۇنان بولەك رەسپۋبليكا كولەمىندە «جىل فەرمەرى» انىقتالادى. اۋىل شارۋاشىلىق قۇرىلىمدارىنىڭ ەڭبەككەرلەرىنە ارناۋلى مەملەكەتتىك ماراپاتتار تابىستالىپ، ىنتالاندىرۋلار شارالارىنا تارتىلادى.

بۇل جوبانى تابىستى ىسكە اسىرۋدىڭ ءبىر كورىنىس اۋىل تاقىرىپتارىندا سەريالدار مەن كوركەمدىك فيلمدەردى ءتۇسىرىپ، پروكاتقا بەرۋدەن كورىنبەك، –دەيدى جامبىل وبلىسىنىڭ «رۋحاني جاڭعىرۋ» جوبالىق ءوفيسىنىڭ جەتەكشىسى سەرىكبول بەرىكقوجا.

راسىندا تۇرعىندارىنىڭ جارتىسىنان كوبى اۋىلدىق ەلدى مەكەندەردە تۇراتىن قازاقستان ءۇشىن اۋىل ەڭبەككەرلەرىنىڭ ءومىرىن ناسيحاتتاۋ، ولاردىڭ جەتىستىكتەرىن كوپكە ۇلگى ەتۋ يدەولوگياسىنىڭ ءتيىمدى تۇسى كوپ-اق. سايكەسىنشە اگرو سالاسى جاقسى دامىپ كەلە جاتقان ءبىزدىڭ وڭىردە دە بۇل جوبا اياسىندا ءىسى كوپكە ۇلگى ەتىلەتىن تۇلعالار تابىلارى انىق.