قاراتاۋ جوتاسىنداعى سارى فوسفوردىڭ مول كەنىن يگەرۋ ماقساتىندا قۇرىلعان «ەۆروحيم-كاراتاۋ» جاۋاپكەرشىلىگى شەكتەۋلى سەرىكتەستىگى وندىرىسكە قاجەتتى مامانداردى شەتەلدە دايىنداۋ، ولاردى باسپانامەن قامتۋ ءىسىن ءوز كۇشىمەن شەشۋگە دايىن. سونداي-اق بۇل ىسكە جەرگىلىكتى اكىمدىك تە بەلگىلى ءبىر دەڭگەيدە ۇلەس قوسۋعا دايىن. بۇل جايىندا جامبىل وبلىسى اكىمى اسقار مىرزاحمەتوۆ پەن اتالعان سەرىكتەستىكتىڭ باس ديرەكتورى دميتريي ۆالىشيەۆپەن كەزدەسۋىندە ايتىلدى، دەپ جازادى Qamshy.kz اقپارات اگەنتتىگى.
بۇل كەزدەسۋدە تاراپتار وندىرىسكە قاجەتتى كادرلاردى دايىنداۋ جانە ولاردىڭ الەۋمەتتىك-تۇرمىستىق ماسەلەلەرىن بىرلەسە شەشۋ مۇمكىندىكتەرىنە باسا نازار اۋداردى.
سەرىكتەستىكتىڭ باس ديرەكتورى دميتريي ۆالىشيەۆ وندىرىسكە قاجەتتى كاسىبي مامانداردى دايارلاۋ ءۇشىن رەسەيدەگى جوعارعى جانە ارناۋلى ورتا وقۋ ورىندارىمەن تىعىز قارىم-قاتىناستا ورناتىلعانىن جەتكىزدى.
– بۇل ماقساتقا قول جەتكىزۋ ءۇشىن رەسەيلىك جوعارى جانە ارناۋلى وقۋ ورىندارىنىڭ ارنايى جىلجىمالى قابىلداۋ كوميسسياسى ۇيىمداستىرىلدى. كۇنى بۇگىنگە دەيىن جاڭاتاس قالاسىنان 12 ادام وقۋعا جىبەرىلگەن. ءبىزدىڭ سەرىكتەستىكتە الداعى ۋاقىتتا ءوز ەسەبىنەن وندىرىسكە قاجەتتى مامانداردى وقىتىپ، بىلىكتىلىگىن ارتتىرۋدى جالعاستىرا بەرەدى، –دەدى سەرىكتەستىكتىڭ باس ديرەكتورى دميتريي ۆالىشيەۆ،
ءوز كەزەگىندە اسقار يسابەك ۇلى ءوندىرىس وشاعىنا قاجەتتى كادرلاردى جەرگىلىكتى تۇرعىندار اراسىنان الىپ قايتا دايارلاۋدىڭ ماڭىزدىلىعىنا نازار اۋدارىپ، وعان اكىمدىك تاراپىنان قولداۋ بىلدىرەتىنىن ايتىپ ەتتى. ءوڭىر باسشىسى ايماقتا كاسىپتىك ءبىلىم بەرۋدە گرانت ءبولۋ ەرەجەلەرى ءتيىستى زاڭ تالاپتارىنا ساي بەكىتىلگەنىن تىلگە تيەك ەتىپ، كاسىپورىن مۇمكىندىگى شەڭبەرىندە جاستاردى رەسەي جانە باسقا دا ەلدەردە بىلىكتىلىگىن جەتىلدىرۋگە ىقپال ەتۋگە شاقىردى.
«ەۆروحيم-كاراتاۋ» جاۋاپكەرشىلىگى شەكتەۋلى سەرىكتەستىگىنىڭ باس ديرەكتورى ءوڭىر باسشىسىنىڭ بۇل ويىن قۇپتاپ، سول باعىتتا شارالاردىڭ جالعاسا بەرەتىندىگىنە نازار اۋداردى. سونداي-اق ءوندىرىس ورنى مامانداردى تۇرعىن ۇيمەن قامتۋ ماسەلەسىن شەشۋدىڭ جولىنا توقتالىپ، بۇل باعىتتا جاڭاتاستاعى ەسكى تۇرعىن ۇيلەردى قايتا جاڭعىرتۋدان وتكىزۋدىڭ تيىمدىلىگىن ءسوز ەتتى. سايكەسىنشە بۇل جوسپارعا جەرگىلىكتى بيلىك قولداۋ بىلدىرۋگە دايار
كەزدەسۋ سوڭىندا ەۆروحيم-كاراتاۋ» جاۋاپكەرشىلىگى شەكتەۋلى سەرىكتەستىگىنىڭ باس ديرەكتورى كاسىپورىن تاراپىنان جۇمىسشىلاردى تۇرعىن ۇيمەن قامتۋ ءىسىن جولعا جۇيەلى قويۋ جايىنا توقتالدى.
پىكىر قالدىرۋ