اتىراۋ قالاسىنداعى وبلىستىق پەريناتالدىق ورتالىق باسشىسى جاڭا تۋعان نارەستەنىڭ ولىمىنە قاتىستى كۇدىككە ءىلىندى. ديرەكتوردىڭ بۇيرىعى بويىنشا نارەستەنى توڭازىتقىشقا سالىپ قويعانى بەلگىلى بولدى. بۇل تۋرالى سىبايلاس جەمقورلىققا قارسى ءىس-قيمىل اگەنتتىگى ءتوراعاسىنىڭ ورىنباسارى شىڭعىس قابدولا مالىمدەدى. 

ش.قابدولانىڭ سوزىنشە، ارنايى شۇعىل امالداردىڭ بارىسىندا پەرزەنتحاناداعىلاردىڭ سالعىرتتىققا جول بەرىپ، جاڭا تۋعان نارەستەنى ءولى تۋىلدى دەپ راسىمدەگەنى انىقتالعان. الايدا بۇل كەزدە نارەستە ءتىرى بولعان ەكەن.

«نارەستەنىڭ ءتىرى ەكەنىن بىلگەنىمەن دارىگەرلەر مۇمكىندىگى بولا تۇرا شۇعىل شارالار قابىلداۋدىڭ ورنىنا، راسىمدەلگەن قۇجاتقا سايكەس ارەكەت ەتۋدى ۇيعارىپ، نارەستەنى ولىمگە قيعان. دارىگەر مۇنداي ارەكەتكە بازاداعى تولتىرىلىپ قويىلعان قۇجاتتاردى وزگەرتكىسى كەلمەگەندىكتەن بارعان. ونى قايتا تۇزەتۋگە بولمايدى ەكەن»، - دەدى سىبايلاس جەمقورلىققا قارسى ءىس-قيمىل اگەنتتىگى ءتوراعاسىنىڭ ورىنباسارى جيىن بارىسىندا.

قىلمىستىق كودەكستىڭ «مەديسينا نەمەسە فارماسيەۆتيكا جۇمىسكەرiنiڭ كاسiپتىك مiندەتتەرiن تيiسiنشە ورىنداماۋى» بابى بويىنشا ءىس قوزعالعان. ءىس بويىنشا پەرزەنتحانا باسشىسى مەن ايەلدى بوساندىرعان اكۋشەر-گينەكولوگ كۇدىككە ءىلىندى. نارەستەنىڭ ءولىمى تۋرالى تولىق دەرەكتەر تەرگەۋ بارىسىندا بەلگىلى بولدى.

ەستەرىڭىزگە سالساق، باستاپقىدا اتالعان پەرزەنتحانانىڭ باسشىسى سىبايلاس جەمقورلىق بويىنشا ايىپتالعان ەدى.

قابدولانىڭ مالىمەتىنە سۇيەنسەك، پەرزەنتحانا باسشىسى دەمەۋشىلەردىڭ اقشاسىنا شەتەلگە دەمالۋعا كەتكەن. شۇعىل امالدار كەزىندە پەرزەنتحانا باسشىسىنىڭ تەلەفون ارقىلى نارەستە تۋرالى ايتقانى انىقتالعان.

«ءبىز بىردەن وقيعا ورنىنا باردىق. الايدا ۋاقىتى بويىنشا ۇلگەرمەدىك. نارەستە توڭازىتقىشتا كوز جۇمعان. باستاپقىدا باسقا دەرەك بويىنشا جۇمىس ىستەگەن ەدىك، ءبىراق ارنايى شۇعىل شارالاردىڭ بارىسىندا وسى دەرەكتى انىقتادىق»، - دەيدى ول.

وسى ۋاقىتقا دەيىنگى ارالىقتا اتىراۋ وبلىسىندا پەريناتالدىق ورتالىق باسشىسى بوسانۋشى ايەلدىڭ ءولىمى دەرەگى بويىنشا وڭ ساراپتامالىق قورىتىندى بەرۋ ءۇشىن، اتىراۋ وبلىسىنداعى سوت-مەديسينالىق ساراپتاما ينستيتۋتى مەملەكەتتىك مەكەمەسىنىڭ باسشىلىعىنا 300 مىڭ تەڭگە كولەمىندە پارا بەردى دەپ كۇدىكتەلگەن بولاتىن.