جامبىل وبلىسىندا مۇمكىندىگى شەكتەۋلى جانداردى جۇمىسپەن قامتۋ ماسەلەسى ءجىتى نازاردا. اعىمداعى جىلى بۇل ماقساتقا قازىنادان 1 ميلليارد 600 ميلليون تەڭگە قارجى قاراستىرىلىپ وتىر، دەپ جازادى Qamshy.kz اقپارات اگەنتتىگى. 

ناتيجەسىندە جىل باسىنان بەرى 237 مۇگەدەك ۋاقىتشا قوعامدىق جۇمىسپەن قامتىلعان. ونىڭ 37ء-سى تاراز قالاسىنىڭ تۇرعىنى بولسا، قالعان 200ء-ى اۋدانداردا تۇرادى. سول سەكىلدى، الەۋمەتتىك جۇمىس ورىندارىن ءدال وسى وسى ساناتقا جاتاتىن 39 ازامات ۋاقىتشا جۇمىسپەن قامتىلعان.

وبلىس اكىمدىگى جۇمىسپەن قامتۋدى ۇيلەستىرۋ جانە الەۋمەتتىك باعدارلامالار باسقارماسىنىڭ باسشىسى تيمۋرجان نۇرىمبەتوۆ ءوڭىر باسشىسىنىڭ تاپسىرماسىنا ساي مۇمكىندىگى شەكتەۋلى ازاماتتاردى جۇمىسپەن قامتۋ جوسپارىنىڭ ءتارتىبى مەن ەرەجەسىن بەكىتۋدە ماسەلەنىڭ بارلىعى قىرى مۇقيات زەردەلەنەتىن ايتادى.

– الەۋمەتتىك باعدارلامالار ارقىلى ەڭ الدىمەن مۇمكىندىك شەكتەۋلى جانداردى جۇمىسپەن قامتۋ ىسىنە باسىمدىق بەرىلەدى. بۇل اتالعان توپقا جاتاتىن ازاماتتاردىڭ الەۋمەتتىك جاعدايىن جاقسارتۋعا باعىتتالىپ وتىر.

بۇگىندە وبلىس اۋماعىندا 45 260 مۇگەدەك تۇرادى. ونىڭ ىشىندە 15 000 مۇگەدەكتى كۇندەلىكتى تۇرمىسقا قاجەتتى قۇرىلعىلارمەن قامتاماسىز ەتۋگە 2 ميلليارد تەڭگە قارالدى. مۇمكىندىگى شەكتەۋلى جانداردى جۇمىسپەن قامتۋدا ماڭىزدى شارا. بيىل 2528 مۇگەدەك جۇمىسقا ورنالىستى.بۇل ماقساتتا مۇمكىندىگى شەكتەۋلى جاندارعا ارنالعان بوس جۇمىس ورىندارى جارمەڭكەسى تۇراقتى وتكىزىلىپ كەلەدى، – دەيدى تيمۋرجان بيدايبەك ۇلى.

جالپى وبلىستا بيىل حالىقتى جۇمىسپەن قامتۋ شارالارىنا 11،2 ميلليارد تەڭگە قارجى قاراستىرىلعان. اتالعان قارجىنى ماقساتتى يگەرۋ ناتيجەسىندە كۇنى بۇگىنگە دەيىن جۇمىسپەن قامتۋدىڭ بەلسەندى شارالارىنا 29 920 جامبىلدىق تارتىلعان. سونداي-اق 3883 ادام كاسىپتىك وقىتۋمەن قامتىلسا، 3103 ادام قىسقارتىلعان وقىتۋ كۋرستارىنا جىبەرىلدى. وقۋدى ءتامامداعان سوڭ ولارعا ارنايى سەرتيفيكاتتار دا تابىستالادى. ءتىپتى وسىنداي كۋرستاردان وتكەن كەيبىر جامبىلدىقتار وزدەرىنىڭ شاعىن جانە ميكرو بيزنەستەرىن دامىتۋعا 505 مىڭ تەڭگە كولەمىندە گرانتتى يەلەنۋ كونكۋرسىنا دا بەلسەنە قاتىسىپ جاتىر. سونىمەن قاتار جاستار جىلى اياسىندا جاس كاسىپكەرلەردىڭ وزىق بيزنەس يدەيالارىن جۇزەگە اسىرۋ ءۇشىن 166 ميلليون تەڭگە كولەمىندە 329 گرانت بولىنگەنىن دە ايتا كەتۋ كەرەك. بۇعان قوسا كوپ بالالى انالاردىڭ كاسىپكەرلىك يدەيالارىن ىسكە اسىرۋ ءۇشىن 611 گرانت ءبولىندى.