سەمەيگە گاسترولدىك ىس-ساپارمەن كەلگەن مۇحتار اۋەزوۆ اتىنداعى  قازاق مەملەكەتتىك اكادەميالىق دراما تەاتر ۇجىمى شاكارىم اتىنداعى مەملەكەتتىك ۋنيۆەرسيتەتىنىڭ ستۋدەنتتەرىمەن كەزدەستى.

"تەاتر جانە كينو"  تاقىرىبىندا وتكەن كەزدەسۋدىڭ ماقساتى – ونەر جولىنىڭ قيىندىعى مەن قىزىعىن جاستار بويىنا ءسىڭىرۋ.  شارا بارىسىندا جاستار كوكەيدە جۇرگەن سۇراقتارىن قويىپ، ونەرمايتالماندارىنان تۇشىمدى جاۋاپ الا الدى. دۋلات باباتاي ۇلى اتىنداعى اقىندار مەكتەبىنىڭ تاربيەلەنۋشىلەرى ولەڭدەرىن وقىپ، ءدۇيىم كوپشىلىكتى ءتانتتى ەتتى.

–  بۇگىندە تەاتر جانە كينو ونەرى دامىپ كەلەدى. الايدا، ەكەۋىن بىرگە قاراستىرۋعا بولمايدى. ساحنانىڭ كيەسى بار. كوپتىڭ الدىندا ونەر كورسەتۋ ۇلكەن جاۋاپكەرشىلىكتى تالاپ ەتەدى. سوندىقتان دا، ءبىر ءرولدى سومداپ، ءوزىن جۇلدىز سانايتىن جاندار ونەردىڭ اۋىر سالماعىن سەزىنبەي، كەرىسىنشە تومەندەتىپ الىپ جاتىر. مەن كۇنى بۇگىنگە  ساحنادا  بىردە قوجاناسىر، بىردە باستىق بولىپ وينايمىن. شىنايى ماماندىققا دەگەن سۇيىسپەنشىلىك پەن تاباندىلىق قانا ونەر ادامىن شىڭدايدى، – دەدى تانىمال كينو جانە تەاتر اكتەرى بەكجان تۇرىس.

ايتا كەتەيىك،  ونەر ۇجىمى 30 قىركۇيەك-3 قازان ارالىعىندا سەمەيىكتەرگە قويىلىمدارىن قويىپ، قالىڭ كوپشىلىكتىڭ قوشەمەتىنە بولەنبەك.