ەلىمىز ەگەمەندىك العالى بەرى اۋىل شارۋاشىلىعىن دامىتۋ ماسەلەسى كۇن تارتىبىنەن تۇسكەن ەمەس. ەلباسى-قازاقستان رەسپۋبليكاسىنىڭ تۇڭعىش پرەزيدەنتى ن.نازاربايەۆ قازاقستان حالقىنا جىل سايىنعى جولداۋلارىندا اگروونەركاسىپ كەشەنىن دامىتۋ ماسەلەسىن نازاردان تىس قالدىرعان جوق. مەملەكەت باسشىسى قاسىم-جومارت توقايەۆ تا سالاعا سەرپىلىس سىيلاۋ ماقساتىندا ستراتەگيالىق ماقساتتار قويىپ وتىر.

اۋىل شارۋاشىلىعىن دامىتۋ ماسەلەسى ايتىلعان جەردە ۆەتەريناريالىق قاۋىپسىزدىكتىڭ دە قاتار جۇرەتىندىگى داۋسىز. ويتكەنى، توسكەيدى ءتورت تۇلىكپەن تولتىرۋ تۇرعىسىندا مال دارىگەرلەرىنە ارتىلاتىن مىندەت تە زور. سوندىقتان دا مەملەكەت كەيىنگى جىلدارى ۆەتەريناريالىق نىسانداردىڭ سانىن ارتتىرۋمەن قاتار سالا ماماندارىن ىنتالاندىرۋعا باعىتتالعان كەشەندى شارالاردى جۇزەگە اسىرۋدا.

بۇگىندە تاراز قالاسىندا ۆەتەريناريا سالاسى بويىنشا تىندىرىمدى تىرتىكتەر تىكتەلۋدە. 2019 جىلدىڭ باسىنان 4250 باس ءمۇيىزدى ءىرى قارا، 6800 باس ۋاق مال، 950 باس شوشقا، 600 باس جىلقى، 22500 باس يت، 2200 باس مىسىق جانە 31000 باس ءۇي قۇستارى تىركەۋگە الىنىپ، ولارعا ەپيزووتياعا قارسى جۇمىستار جۇرگىزۋ ءۇشىن بيۋدجەتتەن 32،0 ميلليون تەڭگە ءبولىندى. ەسەپتى كەزەڭدە ونىڭ 21،0 ميلليون تەڭگەسى يگەرىلىپ، بۇل قاراجاتقا جانۋارلاردى ءقاۋىپتى اۋرۋلارعا قارسى ۆاكسينالاۋ جانە دياگنوستيكالىق جۇمىستارعا كەرەكتى ۆاكسينالار الىنىپ، جۇمىستار جۇرگىزىلۋدە.

قازىرگى ۋاقىتتا شاھاردا ءسىبىر جاراسى اۋرۋىنا قارسى 3300 باس سيىر، 5000 باس قوي-ەشكى، 400 باس جىلقى، 800 باس شوشقا، اۋسىل اۋرۋىنا قارسى 4700 باس ءمۇيىزدى ءىرى قارا، 9000 باس ۋاق مال، 1000 باس شوشقا ەگىلدى. سونىمەن قاتار لەپتوسپيروز، قاراسان، تۋبەركۋلەز، ماڭقا، وبا، كۇل، سۇيەل، ەحينوكوككوز اۋرۋلارىنا قارسى دا ءتيىستى شارالار قولدانىلدى.

بيىل سونداي-اق ەگەۋقۇيرىقتاردى جويۋ جۇمىستارىنا 11،7 ميلليون تەڭگە قاراجات ءبولىندى. ەگەۋقۇيرىقتاردى جويۋعا وتكىزىلەتىن مەملەكەتتىك ساتىپ الۋ كونكۋرسى جاريالانىپ، «گارانت» دەزينفەكسيالىق ورتالىعى جشس-گى ەلەكتروندى ساتىپ الۋ كونكۋرسى بويىنشا جەڭىمپاز بولىپ انىقتالعان. بولىممەن كەلىسىم-شارتقا وتىرىپ، قازىرگى تاڭدا تاراز قالاسى اۋماعىنداعى كوپقاباتتى ۇيلەردىڭ جەرتولەلەرى مەن قوقىس تاستايتىن كونتەينەرلەرگە دەراتيزاسيالاۋ جۇمىستارىن جۇرگىزۋدە.

2019 جىلعا قاڭعىباس يتتەر مەن مىسىقتاردى ۇستاپ جويۋعا جەرگىلىكتى بيۋدجەتتەن 20،4 ميلليون تەڭگە قاراجات بولىنسە، ەسەپتى كەزەڭدە 16،3 ميلليون تەڭگەسى يگەرىلگەن. ناتيجەسىندە 7571 باس قاڭعىباس يتتەر مەن مىسىقتار ۇستالىپ جويىلعان.

ال «كونگو-قىرىم گەمورراگيالىق قىزباسىنىڭ» اۋرۋىنىڭ الدىن-الۋ ماقساتىندا قاجەتتى پرەپاراتتاردى الۋ ءۇشىن قالالىق بيۋدجەتتەن 7،3 ميلليون تەڭگە قاراجات قاراستىرىلعانىن ايتا كەتۋ كەرەك. اعىمداعى جىلدىڭ «كونگو-قىرىم گەمورراگيالىق قىزباسىنىڭ» اۋرۋىنىڭ الدىن-الۋ ماقساتىندا قاجەتتى پرەپاراتتار الىنىپ، بولىنگەن قارجى تولىعىمەن يگەرىلدى.