ينۆەستيسيا تارتۋ، سول ارقىلى سالىقتىق تۇسىمدەردى ارتتىرۋ- مەملەكەت قولعا العان دامۋ ستراتەگياسىنىڭ باستى باعدارى. بۇل تۇرعىدا تاراز قالاسىندا دا تىندىرىمدى تىرلىكتەر تىكتەۋدە. مەملەكەت قولداۋىنىڭ ناتيجەسىندە كوپتەگەن كاسىپورىندار ءوز شارۋالارىن شيراتىپ، تابىسقا كەنەلىپ وتىر.
مىسالى، تاماق ونەركاسىبى سالاسىنداعى "ورتا ازيالىق قانت كورپوراسياسى" اكسيونەرلىك قوعامى ەسەپتى كەزەڭدە 22 ميلليارد 890،1 ميلليون تەڭگەگە 124،3 مىڭ توننا ءونىم ءوندىرىپ، وندىرىلگەن ءونىمنىڭ ناقتى كولەمى 55،5 پايىزعا ءوسىپ وتىر. ال 2018 جىلى كورسەتكىش 12 034،3 ميلليون تەڭگەنى قۇراعان بولاتىن. سايكەسىنشە بىلتىر 79،9 مىڭ توننا ءونىم ءوندىرىلدى.
جالپى ونەركاسىپ سالاسى بويىنشا سالىق تۇسىمدەرى مەن باسقا دا مىندەتتى تولەمدەردىڭ مەملەكەتتىك بيۋدجەتتەگى ۇلەسى 15،8 پايىزدى نەمەسە 4 ميلليارد 776،1 ميلليون تەڭگەنى قۇرادى. بۇل كورسەتكىش 2018 جىلى 22،6 پايىز نەمەسە 6 ميلليارد 098،5 ميلليون تەڭگە دەڭگەيىندە قالىپتاسقان بولاتىن. ال بيىلعى 8 ايدا قالا دەڭگەيىندەگى بيۋدجەت بويىنشا ونەركاسىپ سالاسىنىڭ ۇلەسى 12،8 پايىزدى نەمەسە 1 ميلليارد 405،6 ميلليون تەڭگەنى قۇرادى
2010-2014 جىلدارعا ارنالعان قازاقستان رەسپۋبليكاسىنىڭ ۇدەمەلى يندۋستريالىق - يننوۆاسيالىق دامۋ مەملەكەتتىك باعدارلاماسى اياسىندا، جالپى قۇنى 35 ملرد. 479،6 ملن. تەڭگەنى قۇرايتىن 11 جوبا ىسكە اسىرىلىپ، 1861 جاڭا جۇمىس ورىندارى اشىلدى.
ال، اتالعان باعدارلامانىڭ 2015-2019 جىلدارعا ارنالعان ەكىنشى كەزەڭىندە 2015-2018 جىلدارى 20 ملرد. 124،5 ملن. تەڭگەنى قۇرايتىن 10 جوبا ىسكە اسىرىلىپ، 360 جاڭا جۇمىس ورىندارى اشىلدى.
ەسەپتى كەزەڭدە تاراز قالاسىندا «قازاقستان رەسپۋبليكاسىنىڭ 2015-2019 جىلدارعا ارنالعان يندۋستريالدى-يننوۆاسيالىق دامۋ» مەملەكەتتىك باعدارلاماسى اياسىندا، 2019 جىلى جالپى قۇنى 4 ملرد. 47،0 ملن. تەڭگەنى قۇرايتىن 2 ينۆەستيسيالىق جوبا ىسكە اسىرىلۋدا. بۇل جوبالاردا قوسىمشا 447 جاڭا جۇمىس ورنى اشىلۋى كوزدەلۋدە.
اتاپ ايتقاندا «KISC» ج ش س – بولات، شويىن بالقىتۋ سەحىن قايتا جاڭعىرتۋ جۇمىستارىن جۇرگىزۋدە. جوبانىڭ قۇنى 1 ملرد. 870 ملن. تەڭگە، قۋاتتىلىعى جىلىنا 24 مىڭ توننا، 150 جاڭا جۇمىس ورىندارى اشىلادى دەپ كۇتىلۋدە.
ال «تاراز ارماتۋرا زاۋىتى» ج ش س – قۇرىلىس ارماتۋراسىن شىعارۋعا ارنالعان جاڭا سەحتىڭ قۇرىلىسىن جۇرگىزۋدە. جوبانىڭ قۇنى 2 ملرد. 177 ملن. تەڭگە، قۋاتتىلىعى جىلىنا 200 مىڭ توننا، 297 جۇمىس ورىندارى اشىلۋى كۇتىلۋدە.
پىكىر قالدىرۋ