مەملەكەت باسشىسى ق.توقايەۆتىڭ قازاقستان حالقىنا جولداۋىندا ايقىندالعان شاعىن جانە ورتا كاسىپكەرلىكتى دامىتۋ تۋرالى مىندەتتەردى ساپالى ورىنداۋ ماقساتىندا اۋليەاتا وڭىرىندە تىڭ باستامالار قولعا الىنىپ، جارقىن جوبالار جۇزەگە اسۋدا. الداعى ماقساتتاردىڭ دا اۋقىمى ۇلكەن. وسى ورايدا جامبىل وبلىسىنىڭ اكىمى اسقار مىرزاحمەتوۆ ۇسىنىپ وتىرعان قوسالقى شارۋاشىلىقتاردى دامىتۋ پيلوتتىق جوباسىنىڭ بەرەرى مول بولماق. وعان نەگىز دە جوق ەمەس. ويتكەنى، ايماق باسشىسى ءاربىر اۋدانعا ارنايى ات باسىن بۇرىپ، جەكەلەگەن اۋلالاردى ءوزى ارالادى. جەرگىلىكتى جۇرتشىلىقپەن جۇزدەسىپ، ولاردىڭ مۇڭ-مۇقتاجىن تىڭدادى. جاڭا جوبانىڭ ۇيىمداستىرىلۋ ماسەلەسى بويىنشا ءتيىستى ماماندارمەن جان-جاقتى اقىلداستى. سونىڭ ناتيجەسىندە ومىرگە كەلگەن جوبا كۇنى كەشە ۇكىمەت تاراپىنان دا قولداۋ تاپتى.

قازىرگى تاڭدا تاراز قالاسىندا دا جەكە كاسىپكەرەر ءبىرقاتار جاڭا جوبالاردى ۇسىنىپ، تابىستى ەسەلۋگە بەت بۇرۋدا. مىسالى، "تاناش" جەكە كاسىپكەرلىگى 2 گا جەرگە كوكونىس قويماسىن، قۇرىلىس قولعاپتارىن، ءوزى كەسەتىن (سامورەز) جانە شەگە شىعاراتىن سەح سالۋدى كوزدەپ وتىر. جوبانىڭ جوسپارلانعان قۇنى 105 ميلليون تەڭگە. جوبا جۇزەگە اسقاندا 35 جاڭا جۇمىس ورىندارى اشىلادى دەپ كۇتىلۋدە.

ال "KAZPLAST" ج ش س 2 گەكتاردا تىگىن فابريكاسىنىڭ قۇرىلىسىن جوسپارلاپ وتىر. جوبانىڭ قۇنى 1 500 ملن. تەڭگە. مۇندا جۇمىس ورىندارىنىڭ سانى 250 ادامدى قۇرايتىن بولادى.

سول سياقتى "الەل اگرو" اكسيونەرلىك قوعامى 5 گەكتاردا مال ازىعى زاۋىتىنىڭ قۇرىلىسىن سالۋدى ويلاستىرۋدا. جوبانىڭ قۇنى 2 600 ملن. تەڭگە. ال ول ىسكە اسقاندا 60 ادام تۇراقتى جۇمىسپەن قامتىلاتىن بولادى.

سونىمەن قاتار "Everlight Alto" ج ش س 2 گەكتاردا سىرتقى جارىقتاندىرۋ قۇرىلعىلارىنىڭ ءوندىرىسىن سالۋدى جوسپارلاۋدا. جوبانىڭ قۇنى 400 ميلليون تەڭگە.

بۇگىندە قالا اۋماعىندا جىلىجاي شارۋاشىلىعىمەن جالپى اۋماعى 0،87 گەكتاردى قۇرايتىن «رامازان» شارۋا قوجالىعى اينالىسادى. قازىرگى تاڭدا شارۋا قوجالىعى قىزاناق پەن قيار كوشەتىن وتىرعىزىپ، كۇزدىك ءونىم الۋ جۇمىستارىن جۇرگىزۋدە. كەلەشەكتە شارۋاشىلىق باسشىلىعى جىلىجاي اۋماعىن 1 گەكتارعا دەيىن ۇلعايتۋدى جوسپارلاپ وتىر.

تاعى ءبىر ايتا كەتەرلىگى، قازىرگى كەزدە قالادا اۋىل شارۋاشىلىعى ءونىمىن قايتا وڭدەۋ باعىتىندا 98 سەح پەن كاسىپورىندار جۇمىس ىستەۋدە. ولاردىڭ باسىم بولىگى شۇجىق، كونديتەرلىك جانە ناۋبايحانا سەحتارىنا تيەسىلى. بۇل سالادا جۇمىسپەن قامتىلعاندار سانى 2158 ادامدى قۇرايدى.