ماسااكي يماي (جاپون تىلىندە 今井 正明 يماي ماسااكي، 1930 جىلى توكيودا دۇنيەگە كەلگەن) — «lean-گۋرۋ»، ۇزدىكسىز جەتىلدىرۋ (كايدزەن) كونسەپسياسىنىڭ نەگىزىن قالاۋشى (اعىلش. Continuous Improvement).
1955 جىلى توكيو جوعارى وقۋ ورنىندا باكالاۆر دارەجەسىن العاننان كەيىن، حالىقارالىق قاتىناستار سالاسىندا قىزمەتىن جالعاستىرۋ ءۇشىن سوندا قالادى.
1962 جىلى ماسااكي يماي Cambridge Corporation — كونسالتينگتىك كومپانيا نەگىزىن قالايدى. ول باسقارۋشىلىق كەڭەس بەرۋگە مامان دايىندايتىن جانە جوعارى ساناتتى مەنەدجەرلەر تاڭداۋعا ۇيرەتەتىن كومپانيا. رەكرۋتينگ، قىزمەتكەرلەردى باسقارۋ، ۇيىمدىق زەرتتەۋ سالاسىنداعى كەڭەسشى رەتىندە يماي مىرزا جاپونياداعى 200-دەن استام شەتەلدىك جانە بىرىككەن كاسىپورىندارعا كوپ كومەگىن تيگىزگەن. 1976-ىنشى جىلدان باستاپ، 1986-ىنشى جىلعا دەيىن ماسااكي جاپونيانىڭ رەكرۋتينگ جانە كادرلىق اگەنتتىك فەدەراسياسىنىڭ پرەزيدەنتى بولعان.
ماسااكي يماي «كايدزەن: جاپون كومپانيالارىن جەتىستىككە جەتكىزگەن كىلت»(1986)، «گەمبا كايدزەن: شىعىندى ازايتىپ، ساپانى ارتتىراتۋدىڭ جولى» (1997) كىتاپتارىنىڭ اۆتورى. ەڭبەكتەرى فرانسۋز، گوللاند، پورتۋگال، نەمىس، يسپان، يندونەزيا، جۇڭگو، ورىس جانە وزگە دە تىلدەرگە اۋدارىلعان.
1985 جىلى كومپانيالارعا كايدزەننىڭ كونسەپسياسىن، جۇيەسىن، كەرەك ادىستەرىن ەنگىزۋ ءۇشىن ماسااكي يماي KAIZEN Institute Consulting Group كومپانياسىن اشتى. ول — الەم بويىندا وتىز شاقتى ەلدە كەڭسەسى بار كونسالتينگتىك كومپانيا. سوڭعى وتىز جىلدان استام ۋاقىت ىشىندە ماسااكي يماي ارىپتەسى پروۆەل دايسۋكە ناروتانمەن بىرگە كايدزەن، ۇنەمدى ءوندىرىس جانە باسقارۋ ءىسى تۋرالى كوپتەگەن ءدارىس وقىعان. سونىمەن قاتار، ءارتۇرلى ۇيىمدارعا كاسىپ جۇيەسىن دامىتۋ جونىندە كەڭەس بەرگەن.
وقىرماندار نازارىنا ماسااكي ءيمايدىڭ ەڭبەگىنەن سيتاتالار ۇسىنامىز.
***
1. ساپانى جاقسارتىڭدار. 2. ونىمدىلىكتى جاقسارتىڭدار. 3. قوردى ازايتىڭدار. 4. وندىرىستىك جەلىنى قىسقارتىڭدار. 5. قۇرىلعىنىڭ قولدانۋ ۋاقىتىن ازايتىڭدار. 6. وندىرىستىك الاڭداردى كىشىرەيتىڭدەر. 7. سيكل ۋاقىتىن ازايتىڭدار.
***
وندىرىستىك جەلىدەگى قىزمەتكەرلەردى قىسقارتىڭدار: ادام قانشالىقتى از بولسا، سونشالىقتى جاقسى. ول شىعىندى عانا ەمەس، سونىمەن قاتار، ساپا تۇرعىسىنان كەزدەسەتىن قيىندىقتى دا ازايتادى. سەبەبى، قانشالىقتى قول از بولسا، قاتەلىك جىبەرۋ مۇمكىندىگى سونشالىقتى از بولادى.
***
كايدزەن ادىسىندە ەڭ ءبىرىنشى كەرەگى – «جوسپارلا-جاسا-تەكسەر-ىسكە اسىر» (PDCA) سيكلى.
***
شىرىگەن جۇمىرتقادان جاقسى قۇيماق شىقپايدى.
***
باسشىلىقتىڭ مىندەتى – ستاندارت ورناتۋ. سوسىن سول ستاندارتتىڭ ساقتالۋىن قاداعالايتىن ءتارتىپتى باقىلاۋ. تەك وسى ەرەجە ورىندالعاندا عانا ستاندارتتى كوتەرۋ ءۇشىن كايدزەن ءادىسىن قولدانۋعا بولادى.
***
ادامعا ءوزىن تابۋعا كومەكتەسۋ ءۇشىن وعان جۇمىس بارىسىندا قارىم-قاتىناس جاسايتىنداردىڭ ءبارىنىڭ پىكىرىن، ولاردىڭ ونى قالاي قابىلدايتىنىن جەتكىزىپ، ايتىپ تۇرۋ كەرەك.
***
كايدزەن — بۇل تۇتىنۋشىعا باعىتتالعان جەتىلۋدىڭ ستراتەگياسى. ونىڭ ايتپاعى: ياعني، كەز كەلگەن كومپانيا تۇبىندە تۇتىنۋشىنى قاناعاتتاندىرۋ جولىندا جۇمىس ىستەۋى كەرەك.
***
ەگەر جۇمىسىڭدى جارتى جىل بويى ءبىرقالىپتا ىستەي بەرەتىن بولساڭ، جەتىستىككە جەتپەيسىڭ.
پىكىر قالدىرۋ