مەملەكەت باسشىسى قاسىم-جومارت توقايەۆتىڭ «سىندارلى قوعامدىق ديالوگ-قازاقستان تۇراقتىلىعى مەن وركەندەۋىنىڭ نەگىزى» اتتى قازاقستان حالقىنا جولداۋى مادەنيەت سالاسىنىڭ قىزمەتكەرلەرىنە دە سەرپىلىس سىيلادى. ويتكەنى، جىلدىڭ باستى قۇجاتىندا اتالمىش سالانىڭ وكىلدەرىن قولداۋعا قاتىستى ناقتى تاپسىرمالار بەرىلدى.

مەملەكەت باسشىسى: «ءبىز مادەنيەت سالاسىندا جۇمىس ىستەيتىن ازاماتتارعا جەتكىلىكتى تۇردە كوڭىل بولمەي وتىرمىز.

بۇل – ەڭ الدىمەن، كىتاپحانا، مۋزەي، تەاتر قىزمەتكەرلەرىنە قاتىستى ماسەلە.

ولاردىڭ ەڭبەكاقىسى سوڭعى جىلدارى مۇلدە كوبەيگەن جوق.

سونىڭ سالدارىنان مادەنيەت قىزمەتكەرلەرى، اسىرەسە جاس ماماندار جەڭىلدىگى بار تۇرعىن ءۇي باعدارلامالارىنا قاتىسا المايدى.

مۇنداي احۋال وسى كاسىپتىڭ بەدەلىن ءتۇسىرىپ، لايىقتى كادرلاردىڭ تاپشىلىعى ايقىن سەزىلۋدە.

كەلەسى جىلدان باستاپ ۇكىمەت مادەنيەت قىزمەتكەرلەرىنىڭ ەڭبەكاقىسىن كوبەيتۋى ءتيىس» دەي كەلە بۇل باعىتتاعى ءبىرقاتار مىندەتتەردى ايقىنداپ بەردى.

راسىندا دا رۋحاني جاڭعىرۋعا بەت بۇرعان كەزەڭدە مادەنيەت سالاسىنىڭ قىزمەتكەرلەرىنە ارتىلار جاۋاپكەرشىلىك تە جوعارى. ءوز كەزەگىندە سالا ماماندارى ءوز جۇمىستارىن جۇيەلى جالعاستىرۋدا.

بۇگىندە تاراز قالاسىندا ەڭبەك ەتەتىن مادەنيەت قىزمەتكەرلەرى ءوز جۇمىستارىن جانداندىرا تۇسۋدە. مىسالى، 2019 جىلدىڭ 8 ايىندا 206 مادەني كوپشىلىك ءىس-شارالار ۇيىمداستىرىلىپ، ولارعا 133 مىڭنان استام ادام قاتىستى. سونىمەن قاتار، ورتالىقتاندىرىلعان كوپشىلىك كىتاپحانالار جۇيەسى بويىنشا 1061 مادەني ءىس-شارا وتكىزىلدى، قاتىسقان وقىرماندار سانى 62 644 ادامعا جەتتى.

قازىرگى تاڭدا قالالىق مادەنيەت ۇيىندە 25 ۇيىرمە جۇمىس ىستەيدى. ونىڭ ىشىندە 19 ۇجىمنىڭ «حالىقتىق»، «ۇلگىلى» اتاقتارى بار. قاتىسۋشىلار سانى 823 ادامدى قۇرايدى. ولاردىڭ قاتارىندا «جاس داۋرەن» ۇلگىلى بي ءانسامبلى، «كراسنايا گۆوزديكا» حالىقتىق ارداگەرلەر حور ۇجىمى، «قاراحان» ۇلت-اسپاپتاپ ءانسامبلى، «بوزتورعاي» ءان-بي ءانسامبلى، «جىبەك جولى» حالىقتىق ەسترادالىق وركەسترى، «ورلەۋ» قازاق ۇلت-اسپاپتار وركەسترى، «ريۆەر-دانس» بالدىق بي ءانسامبلى، «دۋلاتي» حالىقتىق جاستار تەاترى سىندى ۇجىمداردىڭ جەتىستىكتەرى جەتەرلىك. سونىمەن قاتار «اسىل-انالار» حالىقتىق اجەلەر ءانسامبلى، «كامەرتون» ۆوكالدى توبى، «مەرەي» حالىقتىق ۆوكالدى توبى، «ۆوياج» بالەتى، «پلانەتا» حالىقتىق تەاترى، «ماريچكا» حالىقتىق ۋكراين ۆوكالدى توبى، «جانساراي» حالىقتىق تەاترى دا تالايدى ءتانتى ەتىپ ءجۇر. «شاتتىق» ۇلگىلى حور ۇجىمى، «نۇرشاشۋ» ۇلگىلى كامەرالىق وركەسترى، «جاس تولقىن» ۇلگىلى سينتيزاتور ءانسامبلى، «اللەگرو» ۇلگىلى سكريپكاشىلار انسامبلدەرى دە تالاي دودالاردا دارىنىمەن دارالانۋدا.