بۇگىندە «نۇرلى جەر» تۇرعىن ءۇي قۇرىلىسى باعدارلاماسى اياسىندا تاراز قالاسىندا قىرۋار جۇمىس اتقارىلۋدا. ءبىر عانا مىسال، سۇلەيمەنوۆ كوشەسىنىڭ سوڭىنداعى 362 گەكتاردا 10 مىڭ 300 وتباسىنا ارنالعان 280 كوپقاباتتى ۇيلەردى قۇرايتىن 15ء-شى مولتەك اۋدانىڭىڭ قۇرىلىسى قارقىندى جۇرگىزىلۋدە. القاپتىڭ بايلانىس، كارىز، سۋ جانە گاز قۇبىرلارى جەلىلەرىنىڭ قۇرىلىستارى اياقتالىپ، ەلەكترمەن قامتۋ، ىشكى كۆارتالدىق كولىك جولىنىڭ جانە جىلۋ جەلىلەرىنىڭ قۇرىلىسى ىسكە اسىرىلۋدا. قازىرگى تاڭدا 80 پاتەرلى 19 تۇرعىن ءۇي پايدالانۋعا بەرىلىپ، بۇدان باسقا 80 جانە 60 پاتەرلى 16 تۇرعىن ءۇيدىڭ قۇرىلىسى جاندانۋدا. سونىمەن قاتار، 80 پاتەرلى ارەندالىق 11 تۇرعىن ءۇيدىڭ قۇرىلىسىن باستاۋعا قالا بيۋدجەتىنەن 22،0 ميلليون تەڭگە قارجى قاراستىرىلدى.

اتالعان باعدارلاما اياسىندا، «اۆتوبەكەت» اۋماعىنداعى 100 گەكتاردا بولاشاقتا سوعىلاتىن 14ء-شى مولتەك اۋدانىندا 5 460 وتباسىنا ارنالعان 9 جانە 12 كوپقاباتتى 49 تۇرعىن ءۇي جوسپارلانۋدا. قازىرگى تاڭدا اتالعان القاپ گاز جانە بايلانىس جەلىلەرىمەن قامتاماسىز ەتىلسە، جىلۋمەن قامتۋ جۇمىستارى 2019 جىلدىڭ قىركۇيەك ايىندا اياقتالاتىن بولادى. جالپى ينجەنەرلىك ينفراقۇرىلىمدارىنىڭ قۇرىلىس جۇمىستارىن 2021 جىلى تولىعىمەن اياقتاۋ جوسپارلانۋدا.

ال، اۋماقتاردى دامىتۋ باعدارلاماسى شەڭبەرىندە قالانى كوركەيتۋ مەن ءتۋريزمدى دامىتۋ ماقساتىندا ءبىرقاتار جۇمىستار ىسكە اسىرىلۋدا. اتاپ ايتقاندا، بۇرىنعى «اتشابار» اللەياسى «جاستار اللەياسى» بولىپ وزگەرتىلىپ، اتالعان اللەيادا «ءبىلىم»، «قاراحان – ايشا ءبيبى» ستەللالارى جانە زاماناۋي سۋ بۇرقاقتار ورناتىلدى. سونداي-اق، اللەيانىڭ ورتاڭعى بولىگىندە عالامتور جەلىسىنە ۇزدىكسىز قوسىلۋعا مۇمكىندىك بەرەتىن ينتەرنەت-كافە بوي كوتەرسە، اللەياعا ۇلكەن LED-ەكران قويىلىپ، جاز مەزگىلىندە كونسەرتتەر مەن كينو كورسەتىلەتىن بولادى. سونىمەن قاتار، جەڭىس مەيرامى قارساڭىندا ب.مومىش ۇلى اتىنداعى «جەڭىس» ساياباعىندا «داڭق زالىنىڭ» قۇرىلىسى اياقتالىپ، حالىق يگىلىگىنە پايدالانۋعا بەرىلدى.

قالانى كوركەيتۋ جۇمىستارىن جالعاستىرۋ ماقساتىندا، ۇستىمىزدەگى جىلى تولە بي داڭعىلى بويىمەن سىپاتاي باتىر كوشەسىنەن باستاپ «قاراحان» كەسەنەسىنە دەيىنگى سكۆەرى، جاياۋ جۇرگىنشىلەر ايماعى مەن اللەياسىن (اربات) اباتتاندىرۋ مەن «كونە-تاراز» كەشەنىنىڭ ماڭىندا بيىكتىگى 40 مەتردەن تۇراتىن «ساعات» ستەللاسى ورناتىلاتىن بولادى.

بۇدان بولەك، شاحريستان» تاريحي كەشەنىندە ولكەتانۋ مۇراجايىنىڭ، كورمە پاۆيلونىنىڭ، «رۋحانيات» ورتالىعىنىڭ، كوركەمدىك بەينەلەۋ ونەرى، قول-ونەر شەبەرلەرى گالەرەياسىنىڭ جانە «رەترو-فەستيۆال» امفيتەاترىنىڭ قۇرىلىس جۇمىستارى جۇرگىزىلۋدە. وسى نىساندارمەن قاتار، تاريحي كەشەننىڭ اباتتاندىرىلۋى مەن ينجەنەرلىك كوممۋنيكاسيالىق ينفراقۇرىلىم جەلىلەرىنىڭ قۇرىلىس جۇمىستارى باستالادى.