بۇقارانى باسپانامەن قامتۋ- مەملەكەت باسشىسى ق.توقايەۆتىڭ جولداۋىندا ايقىندالعان مىندەتتەردىڭ ءبىرى. وسى ورايدا پرەزيدەنت: «مەنىڭ ۇكىمەتكە تاپسىرمام – كەزەكتە تۇرعان از قامتىلعان كوپ بالالى وتباسىلارعا باسپانا بەرۋ ماسەلەسىن ءۇش جىل ىشىندە شەشۋ كەرەك. بۇگىندە ولاردىڭ سانى 30 مىڭعا جۋىق.

باسپانا ساتىپ الۋعا جاعدايى جوق ازاماتتارعا الەۋمەتتىك جالعا الۋ تارتىبىمەن قونىستانۋ ءۇشىن مۇمكىندىك بەرۋ قاجەت». دەپ ناقتى مىندەتتەر جۇكتەدى.

بۇگىندە بۇل باعىتتا تاراز قالاسىندا قارقىندى جۇمىستار جۇرگىزىلۋدە. الداعى ماقساتتار دا اۋقىمدى. مىسالى، 2020-2021 جىلدارى 80 پاتەرلى 23 تۇرعىن ۇيلەردىڭ قۇرىلىستارىن جۇرگىزۋ جوسپارلانۋدا.

ال جەكە تۇرعىن ۇيلەر قۇرىلىسى بويىنشا سۇلەيمەنوۆ كوشەسىنىڭ سوڭىنداعى القاپتا 555 جەر تەلىمىندە جەكە ينۆەستورلار تاراپىنان نەسيەگە بەرىلەتىن ءبىرىڭعاي ساۋلەتتىك ستيلدەگى كوتتەدجدىك ۇيلەردىڭ قۇرىلىستارىن جۇرگىزۋ ءۇشىن جەر تەلىمدەرى بەلگىلەنگەن. ونىڭ 255-نە 4 مەردىگەر كەلىسىم شارتقا تۇردى. قازىرگى تاڭدا 14 ءۇيدىڭ قۇرىلىستارى اياقتالىپ، 4 ۇيگە الەۋەتتى ساتىپ الۋشى انىقتالدى. بۇدان بولەك، قوسىمشا 26 ءۇيدىڭ قۇرىلىسى جۇرگىزىلۋدە. وسى ۇيلەردى ساتۋ ماقساتىندا 2006 جىلى جەر ۋچاسكەسىن الۋعا كەزەكتە تۇرعان ازاماتتارعا ءتۇسىندىرۋ جۇمىستارى اياقتالۋدا. وسى جۇمىستار كەزەڭ -كەزەڭىمەن ءوز جالعاسىن تاباتىن بولادى.

ەسەپتى كەزەڭگە جەكە تۇرعىن ءۇي قۇرىلىسىن جۇرگىزۋ ءۇشىن جەر تەلىمدەرىن الۋعا 72 250 ازامات كەزەكتە تۇر. وسى ماقساتتا جەر كەزەگىندە تۇرعان ازاماتتارعا الداعى ۋاقىتتا جەر تەلىمدەرىن بەرۋ ءۇشىن 4 الاڭ دايىندالۋدا.

ولار، اسقاروۆ كوشەسىنىڭ سوڭىندا، «حامۋكات»، «قاراساي»، «قۇمشاعال» جانە «شالعاي قاراسۋ» القاپتارىنداعى 932،6 گەكتار. بۇل جەردە بارلىعى 3752 كەزەكتە تۇرعان ازاماتتاردى جەرمەن قامتۋ جوسپارلانۋدا. القاپتاردا ينجەنەرلىك ينفراقۇرىلىم جەلىلەرىن جۇرگىزۋگە جوبالاۋ سمەتالىق قۇجاتتامالارىن ازىرلەۋ قالا بيۋدجەتىنەن ىسكە اسىرىلىپ جاتسا، قۇرىلىس جۇمىستارىن جۇرگىزۋدى جوعارى تۇرعان بيۋدجەتتەر ەسەبىنەن جۇرگىزۋ كوزدەلۋدە.

بۇدان بولەك، 2012 جىلدان بەرى «كولتوعان» القابىنىڭ ماڭىنداعى 250 گەكتار الاڭىندا بولىنگەن 1232 جەر تەلىمدەرىن تۇگەندەۋ جۇمىستارى جۇرگىزىلىپ، ناتيجەسىندە پايدالانۋ مەرزىمى وتكەن 127 جەر ۋچاسكىلەرى مەملەكەت مەنشىگىنە قايتارىلدى. وسى جەرلەر كەزەكتە تۇرعان ازاماتتارعا قايتا بەرىلەتىن بولادى.