مەملەكەتتىك باعدارلامالاردىڭ ناتيجەسىندە تاراز قالاسىندا دا تالاي تىرلىك تىكتەلۋدە. اسىرەسە، ينفراقۇرىلىمدى دامىتۋ، ونىڭ ىشىندە كوشەلەردى جارىقتاندىرۋ، ەلەكتر جەلىلەرىن جاڭعىرتۋ سىندى جۇمىستار جۇيەلى جۇيەى جۇزەگە اسۋدا.

ايتا كەتۋ كەرەك، قالاداعى كوشەلەردى جارىقتاندىرۋ جانە ەلەكتر جەلىلەرىنە قىزمەت كورسەتۋ جۇمىستارى تۇراقتى قامتاماسىز ەتىلۋدە. 2019 جىلعا وسى سالاعا 605،8 ميلليون تەڭگە قاراستىرىلعان.

كوشەلەردى جارىقتاندىرۋ بويىنشا اعىمداعى جىلى 2 داڭعىل مەن 27 كوشەلەردە تەمىر بەتون باعانالاردى مەتالدىق باعانالارعا اۋىستىرۋ، سۆەتوديودتىق شامدارىن ورناتۋ جانە كابەلدەردى جەر استىمەن جۇرگىزۋ جۇمىستارى اتقارىلاتىن بولادى.

بۇدان باسقا، قالانىڭ 99 قيىلىسىنداعى جول بەلگىلەرى مەن باعدارشامداردىڭ باعانالارىن اۋىستىرۋ جۇمىستارى جۇرگىزىلۋدە. بۇل باعانالاردا قوسىمشا ۋاقىتتى كەرى ەسەپتەگىش جانە كوشە اتاۋلارىن باعىتتايتىن بەلگىلەر ورناتىلۋدا.

قالاداعى جارىقتاندىرىلعان كوشەلەردىڭ جالپى سانى - 170، بۇرىلىستار - 50، مولتەك اۋداندار - 13، تۇرعىن القاپتار - 5، جالپى ۇزىندىعى - 476،82 شاقىرىمدى قۇرايدى.

سونىمەن قاتار كونە شاھارداعى كولىك كەپتەلىسىن ازايتۋ جانە كولىك قوزعالىسىن ىڭعايلاندىرۋ ماقساتىندا، تەحنيكالىق قاداعالاۋ ينسپەكسياسىنىڭ قىزمەتكەرلەرىمەن بىرلەسە، قالاداعى بىرنەشە كوشەنىڭ قيىلىستارىنداعى باعدارشامدار ۋاقىتشا ءوشىرىلىپ، ناتيجەسى زەردەلەنۋدە.

اتاپ ايتقاندا: سۇلەيمەنوۆ - جالايري، سۇلەيمەنوۆ - كرۋپسكايا، بالۋان شولاق - م.مامەتوۆا، اباي - سۋحامبايەۆ، سۋحامبايەۆ - №5 ورتا مەكتەپ الدىنداعى باعدارشام، جامبىل-سەنكىباي، تولە بي –«حروم زاۋىت» ايالداماسى الدىنداعى باعدارشامدار.بويىنشا ناقتى جۇمىستار جۇرگىزىلۋدە.

سونداي-اق، اباي داڭعىلى مەن پەتروۆ كوشەسىنىڭ قيىلىسى ماڭىنداعى باعدارشام الىنىپ تاستالدى.

تاعى ءبىر ايتا كەتەرلىگى، تاراز قالاسىنداعى 10 كوشە قيىلىستارىندا «اقىلدى باعدارشام» كولىك قوزعالىسىن ينتەللەكتۋالدى باسقارۋ جۇيەسى ەنگىزىلگەن. اتاپ ايتقاندا مۇنداي قوندىرعىلار بۇگىندە تولە بي داڭعىلى - ءال-فارابي كوشەسى قيىلىسى؛ جىبەك جولى كوشەسى - سامارقاند كوشەسى قيىلىسى؛ جىبەك جولى كوشەسى - بالۋان شولاق كوشەسى قيىلىسى؛ تاۋكە حان كوشەسى - ساڭىراق باتىر كوشەسى قيىلىسى؛ جامبىل داڭعىلى - كوشەنەي كوشەسى قيىلىسى؛ تولە بي داڭعىلى - اققوزييەۆ كوشەسى قيىلىسى؛ اباي داڭعىلى - تاشكەنت كوشەسى قيىلىسى)،جامبىل داڭعىلى - ساتپايەۆ كوشەسى قيىلىسى؛ جامبىل داڭعىلى - نيەتقالييەۆ كوشەسى قيىلىسى جانە جامبىل داڭعىلى - سۇلەيمەنوۆ كوشەسى قيىلىسىندا ىسكە قوسىلعان.