اۋليەاتانىڭ اكىمدەرى بۇگىندە بۇقارامەن بەرىك بايلانىس ورناتۋدىڭ شىنايى ۇلگىسىن كورسەتۋدە. وبلىس اكىمى اسقار مىرزاحمەتوۆتىڭ ءوزى تىكەلەي باستاپ ەل اراسىندا جۇرسە، اۋدان اكىمدەرى دە يگى ءىستىڭ جالعاسى رەتىندە جۇرتشىلىقپەن جۇزدەسۋدە. مىنە سونداي كوپكە ۇلگى بولار تىرلىكتىڭ ءبىر كورىنىسىن شۋ اۋدانىنىڭ اكىمى جارىلقاسىن ايتاقوۆ كورسەتۋدە، دەپ جازادى Qamshy.kz اقپارات اگەنتتىگى. جالپى جارىلقاسىن ايتاقوۆ شىرايلى شۋ وڭىرىنەن كەلگەلى جۇمىس كۇنىن كەڭسەدە ەمەس، ەل ىشىندە وتكىزۋدە. بۇل جولى اۋدان باسشىسى جايسان اۋىلىنىڭ تۇرعىندارىمەن كەزدەستى. اۋەلى اۋدان اكىمى جەرگىلىكتى حالىققا كەزدەسۋدىڭ ماقساتىن ءتۇسىندىرىپ وتكەن سوڭ، ەلدى مەكەندە قانداي جۇمىستار اتقارىلعاندىعى جانە شاعىن اۋىلداعى وزەكتى ماسەلەلەر جونىندە بايانداپ بەرۋى ءۇشىن العا اۋىلدىق وكرۋگىنىڭ اكىمى ب.ەسبەرگەنوۆكە ءسوز كەزەگىن بەردى. وكرۋگ اكىمىن مۇقيات تىڭداعان سوڭ ءوزى ءسوز الدى.

-مەن سىزدەردىڭ اۋىلدارىڭىزداعى پروبلەمالارمەن تانىستىم. ءيا، ءبىرىنشى كەزەكتە جاڭا مەكتەپ قۇرىلىسى ماسەلەسىن شەشۋ قاجەت. ءقازىر ءبىز كەزدەسۋ وتكىزىپ وتىرعان مەكتەپ عيماراتىنىڭ توزىعى جەتكەنى بىردەن بايقالىپ تۇر. تار جانە بەيىمدەلمەگەن. جاڭا مەكتەپتىڭ قۇرىلىسى كەلەسى جىلدىڭ جوسپارىندا بار. ال، ەسكى عيماراتتى بالاباقشا، ءبىر بولىگىن كلۋبقا اينالدىرۋعا بولادى. بۇل ماسەلەلەردىڭ بارلىعى ۋاقىت ەنشىسىندە. جالپى، سىزدەردىڭ شاعىن اۋىلدارىڭىزعا كۇتىم جاسالعاندىعى كورىنىپ تۇر. سىزدەردىڭ ەندىگى مىندەتتەرىڭىز – اۋىلدى وسى قالپىندا ساقتاۋ، ال ءبىزدىڭ مىندەتىمىز – ورىن العان ماسەلەلەردىڭ شەشىمىن تابۋعا كومەكتەسۋ،-دەپ ءسوزىن اياقتادى جارىلقاسىن ءابدىعاپار ۇلى.

سونىمەن قاتار، جيىن بارىسىندا قاتىسۋشىلار تاراپىنان كوتەرىلگەن سۇراقتارعا اۋدان اكىمى ءتيىستى ءبولىم جانە مەكەمە باسشىلارىمەن بىرلەسە وتىرىپ، تۇششىمدى جاۋاپتار بەردى.

كەڭەستىك كەزەڭدە بولىستىڭ مىندەتى كولحوزداعى مالدى ساناپ، ەل ىشىندەگى دۇنيەنى ورتالىق اپاراتقا جەتكىزىپ وتىرۋ بولسا، ەل ەگەمەندىگىن العالى بەرۋ بۇقارا اكىمدەرمەن تىكەلەي سويلەسىپ، وتىنىش-تىلەكتەرىن جەتكىزۋ قۇقىعىنا يە بولدى. پرەزيدەنت تىلگە تيەك ەتىپ جۇرگەن جۇرتشىلىقپەن كەرى بايلانىس دەگەن وسى. ەڭ باستى مىندەت – ول تۇرعىنداردىڭ تۇرمىسىن تۇزەپ، الەۋمەتتىڭ الەۋەتىن ارتتىرۋ. بۇل سەنىم ۇدەسىنەن شۋ اۋدانىنىڭ اكىمى جارىلقاسىن ايتاقوۆ ازىرگە شىعىپ جاتقانداي. دەسە دە ءبىز اۋدان باسشىسىنان الداعى ۋاقىتتا دا وسىنداي جانعا جىلۋ بەرەرلىك جۇمىستاردى كۇتەمىز.