ەلىمىزدەگى جەمىستى مەملەكەتتىك باعدارلامالاردىڭ بىردەن-بىرى - «باستاۋ بيزنەس » جوباسى ەكەنى داۋسىز. اتالعان باعىتتا بۇگىندە قىرۋار تىرلىكتەر اتقارىلىپ، ەل شاراپاتىن كورۋدە. بۇل ەڭ ءبىرىنشى مەملەكەت باسشىسى قاسىم-جومارت توقايەۆ حالىققا ارناعان جولداۋىندا باسا ايتقان شاعىن جانە ورتا بيزنەستى دامىتۋعا ولشەۋسىز ۇلەس قوسۋدا. جامبىل جەرىندە دە جوبانىڭ جەمىسى كورىنىپ جاتىر، دەپ جازادى Qamshy.kz اقپارات اگەنتتىگى. 

ماسەلەن قورداي اۋدانىندا «باستاۋ بيزنەس» جوباسى جۇزەگە اسىرىلا باستاعان ءۇش جىلدىڭ ىشىندە اۋىز تولتىرىپ ايتارلىقتاي تىرلىكتەر تىكتەلۋدە.

جالپى «باستاۋ بيزنەس» جوباسى ناتيجەلى جۇمىسپەن قامتۋدى جانە جاپپاي كاسىپكەرلىكتى دامىتۋ باعدارمالاسى اياسىندا جۇزەگە اسىرىلۋدا. باعدارلاما شارتىنا ساي اۋىلدىق جەرلەردە تۇراتىن جۇمىسسىز جانە ءوزىن-وزى قامتىعان ازاماتتار جوبا قاتىسۋشىلارى بولا الادى. ولار كاسىپكەرلىك قاسيەتتەردىڭ بار بولۋىنا پسيحولوگيالىق تەست وتكىزىپ، ارنايى دايارلانعان بيزنەس-ترەنەرلەر وكىزەتىن ءبىر ايلىق وقىتۋ كۋرسىنان ءوتۋى قاجەت. البەتتە، بيزنەستى ۇيرەنۋ مۇمكىن ەمەس، ول قاندا بولاتىن قاسيەت دەپ سەنىمسىزدىك تانىتاتىن ادامدار دا كەزدەسەدى. سونىمەن بىرگە كاسىپكەرلىك قىزمەتكە بارلىق ادامداردىڭ 2 پايىزىندا عانا گەنەتيكالىق بەيىمدىلىگى بار دەگەن عىلىمي مالىمەتتەر دە بار. دەگەنمەن، جوبا تۇلەكتەرىنىڭ ايتۋىنشا، اتالمىش وقۋ ارقىلى ولار ءبىلىم الىپ، كاسىپكەرلىكتىڭ قىر-سىرىن كەرەگىنشە ۇيرەنگەن.

بيىل «باستاۋ بيزنەس» جوباسىن وقىعان ادام سانى دا، ىسكە اسىرىلعان جوبالار سانى دا جەتكىلىكتى. اتاپ ايتساق، 2017 جىلى جوبا بويىنشا 192 ادام وقىپ، ونىڭ 106-سى جالپى سوماسى 381،54 ملن. تەڭگەگە نەسيە السا، 2018 جىلى 184 ادام وقىپ، ونىڭ 108ء-ى 376،53 ملن. تەڭگەگە نەسيە العان. ال، 2019 جىلدىڭ قىركۇيەگىنە 135 ادام وقىپ، 39 ادام جالپى سوماسى 152 ملن. تەڭگەگە نەسيە العان. وعان قوسا، «اتامەكەن» كاسىپكەرلەر پالاتاسىنىڭ اۋداندىق فيليالى قىزمەتكەرلەرىنىڭ ايتۋىنشا، بيىل وقۋ قىسقا دەيىن جالعاسىپ، ءالى 160 ادامدى وقىتۋ جوسپارلانعان. قولداعى بار مالىمەتكە سۇيەنسەك تىڭداۋشىلاردىڭ جارتىسى، اتاپ ايتقاندا 49،5 پايىزى نەسيە الىپ ۇلگەرگەن. ال، جوبامەن بارلىق وقىعانداردىڭ 25 پايىزىن عانا نەسيەلەندىرۋ جوسپارلانعانىن ەسكەرسەك، جوبا بەلگىلەنگەن مەجەنى اسىرا باعىندىردى دەگەن تۇجىرىم شىعادى.

بۇل ءسوز جوق، باس بارماقپەن باعالاۋعا تۇرارلىق جۇمىس. سوندىقتان وزگەلەردەن كوش ىلگەرى كەلە جاتقان قوردايلىقتار بۇدان دا بيىك بەلەستەردى باعىندىرادى دەپ سەنەمىز.