مەملەكەت باسشىسى قاسىم-جومارت توقايەۆتىڭ حالىققا ارناعان جولداۋىندا ەسىرتكى بيزنەسىنە قارسى كۇرەسكە ايرىقشا باسىمدىق بەرىلگەنى بەلگىلى. پرەزيدەنت وسىناۋ كولەڭكەلى كاسىپپەن اينالىسىپ جۇرگەندەر مەن سيتەتيكالىق ەسىرتكى ساۋداسىنا توسقاۋىل قويۋدى سالا ماماندارىنا شەگەلەپ تۇرىپ تاپسىردى. ال جامبىل وبلىسى شۋ اۋدانىندا اتالعان ىندەت تالاي جەردى دەندەپ كەتكەنى بەلگىلى. سوندىقتان جەرگىلىكتى بيلىك تۇرعىندار مەن جاستاردى ەسىرتكىدەن الشاق بولۋعا شاقىراتىن ءتۇرلى شارالاردى ءداستۇرلى ۇيىمداستىرۋدا، دەپ جازادى Qamshy.kz اقپارات اگەنتتىگى. شۋداعى شارانىڭ اشىلۋ سالتاناتىندا قاتىسۋشىلار الدىندا اۋدان اكىمى جارىلقاسىن ايتاقوۆ جانە جامبىل وبلىستىق پوليسيا دەپارتامەنتىنىڭ شتاب باستىعى، پوليسيا پولكوۆنيگى قاليجان شوڭعاربايەۆ، «ناعىز پاتريوتتار» قوعامدىق بىرلەستىگىنىڭ ءتورايىمى عاليا ابىتايەۆا ءسوز سويلەپ، جاستاردى سالاۋاتتى ءومىر سالتىن ۇستانۋعا شاقىردى. وسىدان كەيىن جاستار قاۋىمى ءتۇرلى جانرداعى بيدەن قۇرالعان فلەشموب تارتۋ ەتتى.

كورەرمەندەر ءۇشىن ەڭ اسەرلى ءسات «دەلتا دولينا» ەسىرتكى قىلمىسىنا قارسى ءىس-قيمىل ءبولىمىنىڭ قىزمەتكەرلەرىنىڭ ارنايى ۇيرەتىلگەن يتتەرمەن جاسىرىنعان ەسىرتكىنى تاۋىپ، قىلمىسكەرلەردى قۇرىقتاعان كورىنىستەرى بولدى.

اكسيا بارىسىندا ونىڭ قاتىسۋشىلارى كوككە ءتۇرلى-تۇستى شارلار مەن كوگەرشىندەر ۇشىردى. اتاپ وتەرلىگى، اكسيانىڭ جوعارى دارەجەدە وتۋىنە اتسالىسقان ازاماتتار وبلىستىق پوليسيا دەپارتامەنتىنىڭ اتىنان العىس حاتتارعا يە بولدى. اكسيا اياقتالا سالىسىمەن ج.ايتاقوۆ، ق.شوڭعاربايەۆ جانە باسقالارى اۋداندىق پوليسيا بولىمىنە جول تارتىپ، ونداعى ەلىمىز بويىنشا العاش بولىپ اشىلعان ءفرونت-وفيستى كورىپ قايتتى.

وسىعان وراي اۋداندىق پوليسيا ءبولىمىنىڭ الدىندا ميتينگ ءوتىپ، وعان اۋداننان بارعان قوناقتار مەن اۋداندىق ارداگەرلەر كەڭەسى ۇيىمى ءتوراعاسىنىڭ ورىنباسارى ق.وتاربايەۆ، ىشكى ىستەر ارداگەرلەر كەڭەسىنىڭ ءتوراعاسى ب.اۋەلوۆ، «ناعىز پاتريوتتار» قب ءتورايىمى ع.ابىتايەۆا قاتىسىپ، قاتىسۋشىلاردى ءفرونت-وفيستىڭ اشىلۋمەن قۇتتىقتادى.

مىنە، وسىلايشا شۋلىقتار ءبىر كۇندە جاستاردى ەسىرتكىسىز بولاشاققا ۇندەگەن اۋقىمدى شارا وتكىزىپ عانا قويماي، ءفرونت-وفيستىڭ لەنتاسىن قيدى. اتالعان وفيس ەل ءۇشىن قىزمەت ەتە بەرەتىنىنە سەنەمىز. جانە بۇل ورتالىق ەسىرتكى بيزنەسىمەن كۇرەس باعىتىنا قارقىن قوسىپ، كورسەتكىش پەن ناتيجەنىڭ سان ەسە جاقسارا تۇسۋىنە سەپتىگىن تيگىزەدى دەگەن ءۇمىت زور.