«اكىم بول، حالقىڭا جاقىن بول» دەيدى قازاق دانالىعى. بۇل مىندەتتى مەملەكەت باسشىسى قاسىم-جومارت توقايەۆ تا حالىققا ارناعان جولداۋىندا ەرەكشە ەسكەرتكەن بولاتىن. ءتىپتى پرەزيدەنت بۇقارا اراسىندا جۇرگىزىلگەن ساۋالناما قورىتىندىسىندا حالىقتىڭ 30 پايىزى اكىمدەرگە كوڭىلى تولمايتىنى انىقتالسا، ول شەنەۋنىك قىزمەتىن بوساتۋى قاجەتتىگىن دە باسا ايتتى. وسى ورايدا اۋليەاتالىق اكىمدەر جۇرتشىلىقپەن جۇزدەسىپ، تۇرعىنداردىڭ تىلەگىنە ءجىتى قۇلاق تۇرۋدە دەپ جازادى Qamshy.kz اقپارات اگەنتتىگى. ماسەلەن جامبىل وبلىسى شۋ اۋدانىنداعى تولە بي اۋىلىنداعى حقكو، اۋداندىق پوشتا بايلانىس تورابى، مەملەكەتتىك كىرىستەر باسقارماسى، اۋداندىق ستاتيستيكا ءبولىمى، ورتالىق كىتاپحانا، زەينەتاقى مەن جاردەماقى تولەۋ ورتالىعى سىندى نىسانداردىڭ بۇگىنگى تىنىس-تىرشىلىگىمەن تانىسۋ بارىسىندا جارىلقاسىن ءابدىعاپار ۇلى عيماراتتاردىڭ احۋالىنا، جۇمىس كابينەتتەرىنە جانە وسى نىساندارعا جاقىن ورنالاسقان مەكەمەلەرگە باسا نازار اۋداردى.

- بارلىق جاعداي مەكەمە جۇمىسشىلارى ءۇشىن عانا ەمەس، قىزمەتتى تۇتىنۋشىلار ءۇشىن دە ىڭعايلى بولۋى كەرەك. ياعني، عيمارات اۋىزسۋمەن، دارەتحانامەن، سونداي-اق مىسالى، حقكو-عى سەكىلدى قالىڭ كەزەك ورىن العان جاعدايدا كەزەك كۇتۋشىلەرگە ارنالعان ورىندارمەن قامتىلۋى قاجەت،-دەدى اۋدان باسشىسى.

ارينە، جارىلقاسىن ءابدىعاپار ۇلى حالىققا قىزمەت كورسەتۋ بارىسىندا كەزىگەتىن ىڭعايسىزدىقتار مەن شەشىمىن تابۋدى قاجەت ەتەتىن ماسەلەلەردى دە نازاردان تىس قالدىرمادى. اۋدان اكىمى بولعان ءتۇرلى مەكەمەلەردىڭ باسشىلارى قوردالانعان ماسەلەلەردى العا تارتتى. مىسالى، بۇگىنگى تاڭدا ارحيۆ ورنالاسقان جىلجىمايتىن مۇلىكتى تىركەۋ ورتالىعى (بتي) عيماراتىنىڭ شاتىرىنان قاتتى جاڭبىر جاۋىپ نەمەسە قار ەرىگەن كەزدە سۋ اعادى ەكەن. اۋدان باسشىسى تولە بي اۋىلىنىڭ اكىمى ە.دابەروۆكە اتالمىش كەمشىلىكتى رەتكە كەلتىرۋدى مىندەتتەدى. ويتكەنى، ارحيۆ ماڭىزدى مالىمەتتەرگە تولى، سول سەبەپتەن ونىڭ جاعدايى لايىقتى دەڭگەيدە بولۋى قاجەت. مۇنان باسقا، اۋدان اكىمى كۇتپەگەن كەزدەسۋدى وڭتايلى پايدالانىپ، ءوز كوكەيلەرىندەگى مۇڭ-مۇقتاجدارىن جەتكىزىپ قالۋدى ءجون كورگەن ءبىرقاتار مەكەمەلەردەگى قىزمەتكەرلەردىڭ سۇراقتارىنا جاۋاپ بەرىپ تە ۇلگەردى. كەيبىر باسشىلاردىڭ سۇراقتارىنا سول جەردە ناقتى جاۋاپ قايىرسا، كەيبىر سۇراقتاردى ءوز باقىلاۋىنا الدى. جالپى، اكىم اتاپ وتكەندەي، ءوزى باس سۇققان بارلىق الەۋمەتتىك نىسانداردا جۇمىس جۇيەلى جۇزەگە اسىرىلۋدا جانە ولاردىڭ ۇجىمدارىنا قاتىستى ەشبىر سىن ەسكەرتپەلەر دە بولمادى.