دەنساۋلىق ساقتاۋ ءمينيسترى ەلجان ءبىرتانوۆتىڭ قىزمەتتەن كەتۋىن تالاپ ەتكەن ستۋدەنتتەردىڭ ماسەلەسى ودان سايىن ۋشىعا ءتۇستى، دەپ حابارلايدى Qamshy.kz اقپارات اگەنتتىگى كتك ارناسى سىلتەمە جاساپ.

كەشە مينيستر الماتىعا ارنايى كەلىپ، وزىنە قارسى بەينەروليك تۇسىرگەندەرمەن بەتپە-بەت كەزدەستى. كەزدەسۋ بارىسىندا مينيستر رەزيدەنتۋرانىڭ وزگەرگەن تارتىپتەرىن ءتۇسىندىرىپ، ستۋدەنتتەر ينتەرناتۋرادان كەيىن مىندەتتى تۇردە اۋىلدىق ەمحانالاردا ءۇش جىل ەڭبەكتەنۋى ءتيىس ەكەندىگىن ايتتى:

«سىزدەر ينستيتۋتتى جالپى تاجىريبەلىك دارىگەر ديپلومىمەن بىتىرەتىندەرىڭىزدى بىلدىڭىزدەر. دارىگەر بوپ جۇمىس ىستەۋگە دايىن بولدىڭىزدار. سىزدەرگە ەشكىم رەزيدەنتۋراعا اۆتوماتتى تۇردە تۇسەسىزدەر دەپ ۋادە بەرگەن جوق. سوندىقتان وقۋ اقىسىن وتەۋگە مىندەتتىسىزدەر. رەزيدەنتۋراعا تۇسپەس بۇرىن مامان تاپشى وڭىرلەرگە بارىپ ەڭبەك ەتۋگە تيىسسىزدەر. دارىگەرلەردى تەگىن وقىتىپ، ءوز بەتىمەن قويا بەرەتىندەي مەملەكەتتىڭ قارجىسى تاسىپ جاتقان جوق».

سونىمەن قاتار، مينيستر بيىل ءتىپتى، جاستارعا باسپانا بەرۋ ماسەلەسى دە شەشىلگەنىن حابارلادى. الايدا، ستۋدەنتتەر ءمينيستردىڭ سوزىنە كەلىسپەۋشىلىك تانىتۋدا. وزدەرىنىكىن دۇرىس دەپ ەسەپتەيتىن شاكىرتتەر مينيستر شاقىرعان جيىندى تاستاپ كەتتى. دارىن يبراگيموۆ ەسىمدى ستۋدەنت قۇقىقتارى بۇزىلعانىن ايتىپ، مينيسترمەن سوتتاساتىندارىن مالىمدەدى:

«ءبىزدىڭ ءارى قارايعى ماقساتىمىز – ەگەر ۋنيۆەرسيتەتتەن قۋىپ شىقسا، ءارى قاراي سوتتاسامىز. سوتقا بارامىز. ءبىرتانوۆ مىرزا، ءبىز سىزبەن اياعىنا دەيىن كۇرەسەمىز. قۇقىقتارىمىزدى بۇزدىڭىز. ەگەر ءبىرتانوۆ قىزمەتىنەن كەتسە، مىناداي زاڭ بۇزۋشىلىق بولمايدى».

كتك ارناسىنىڭ حابارلاۋىنشا، ەلجان ءبىرتانوۆتىڭ ايتۋىنشا، تەگىن وقۋعا تۇسكەندەر بۇل تالاپتى و باستا بىلگەن. ءبىراق، نەگىزگى ماماندىعىن مەملەكەت ەسەبىنەن ءبىتىرىپ رەزيدەنتۋراعا اقىلى تۇردە تاپسىرىپ قويعاندار مينيسترمەن كەلىسپەي، ءىستى سوتقا دەيىن جەتكىزبەك.