«باستاۋ بيزنەس» مەملەكەتتىك باعدارلاماسى تالايدىڭ جولىن اشقانى بەلگىلى. اسىرەسە ءوز كاسىبىن اشۋعا جۇرەكسىنگەن جۇرت ءۇشىن بۇل باعدارشامعا اينالدى. ناتيجەسىندە جامبىل وبلىسى قورداي اۋدانىندا ءۇش جىلدىڭ ىشىندە جوبا ۇمىتكەرلەرى 910،07 ميلليون تەڭگە نيسيە العان. بۇل كاسىپكەرلىكتىڭ كوكجيەگى كەڭەيىپ عانا قويماي، جاڭا جۇمىس ورىندارى اشىلدى دەگەن ءسوز، دەپ جازادى Qamshy.kz اقپارات اگەنتتىگى. 

«كەپىلزاتتىق قامتاماسىز ەتۋ جانە نەسيە تاريحتارى بويىنشا مينيمالدى بازالىق تالاپتارى مەن نيەتى بار ازاماتتاردىڭ باسىم بولىگى نەسيەلەرىن الىپ ۇلگەردى. پروبلەمالار تەك قانا ءوتىمدى كەپىلزاتتىق قامتاماسىز ەتۋدى ۇسىنا الماعانداردا تۋىندادى. نەسيە تاريحى ناشار ازاماتتاردى ءبىز الدىن الا ەسكەرىپ، قۇجاتتاردى قابىلداۋ بارىسىندا شىعارىپ تاستايمىز»، – دەيدى «اتامەكەن» كاسىپكەرلەر پالاتاسى قورداي اۋداندىق فيليالىنىڭ ديرەكتورى ەرجان ادەن.

تاعى ءبىر قۋانارلىق فاكت - يننوۆاسيالىق جوبالاردى دامىتۋعا بولىنگەن گرانتتار جانە جاس قاتىسۋشىلارعا بولىنەتىن گرانتتار سوماسى ميلليارد تەڭگەگە جاقىنداعان. ال، جوبالاردىڭ باسىم بولىگى اۋىل شارۋاشىلىعىندا ىسكە اسىرىلىپ جاتقانىن ەسكەرسەك، بۇل سالاعا سالىنعان قوسىمشا ينۆەستيسيا ەكەنىن اڭعارۋعا بولادى. ەكىنشى ماڭىزدى تۇسى – جۇمىسپەن قامتۋدى قامتاماسىز ەتۋ. نەسيە العان باعدارلاما قاتىسۋشىلارى جەكە كاسىپكەر رەتىندە تىركەلىپ، سالىق، زەينەتاقى جانە الەۋمەتتىك تولەمدەردى اۋدارۋعا، جۇمىسقا قىزمەتكەر قابىلداۋعا مىندەتتى. اۋداندا كەيىنگى ءۇش جىلدا «باستاۋ بيزنەس» باعدارلاماسىنىڭ قاتىسۋشىلارى 253 جاڭا كاسىپكەر، دەمەك جۇمىسسىز جانە ءوزىن-وزى قامتىعان ادامدار سانى ازايعان. ال، بۇل كاسىپكەرلەر جۇمىسقا ادام قابىلدايتىنىن ەسكەرسەك، بۇل سان ەكى ەسە وسەدى.

جاستاردىڭ كوبى ءۇشىن بۇل جوبا ومىردە ءوز ورنىن تابۋعا مۇمكىندىك بەرۋدە. مىسالى، جاڭاتۇرمىس اۋىلىنىڭ تۇرعىنى ايبولات امانبايەۆ جۋىردا جوبا بويىنشا وقۋدى اياقتاپ، گرانتتىق قارجىلاندىرۋعا قۇجات دايىنداۋ ۇستىندە.

«بۇل جوبا تۋرالى ءوز تانىستارىمنان ەستىدىم. وسىعان دەيىن قوردايدا، الماتىدا كەز-كەلگەن شاشتارازدا ەرلەر شاشتارازشىسى بولىپ جۇمىس ىستەپ، ءوز ءىسىمدى باستاۋدى ارمانداپ جۇرگەن ەدىم. وعان قاراجاتىم بولعان جوق. كاسىپكەرلەر پالاتاسىنا تاپسىرىس بەرىپ، وقۋدى اياقتاپ، گرانتقا قۇجات جيناپ جاتىرمىن»، – دەيدى ول.

ال، قورداي اۋىلىنىڭ تۇرعىنى كامشات ورازىمەتوۆا گرانتقا قۇمبلوكتارىن وندىرەتىن اپپارات الۋدى جوسپارلاۋدا.

«باستاۋ بيزنەس» جوباسى جايىندا مەن تەلەديداردان ءبىلدىم. باعىمدى سىناپ كورەيىن دەدىم، وقۋدى اياقتادىم، ەندى قارجىلاندىرۋدى كۇتىپ وتىرمىن. جولداسىم ەكەۋىمىز ۇيدە قۇمبلوكتارىن جاسايمىز، اپپاراتتى قولدان جاسادىق، سوندىقتان ساپاسى ناشار. زاۋىتتان شىعارىلعان جاقسى اپپارات الۋدى كوزدەپ وتىرمىز»، – دەپ جوسپارلارىمەن ءبولىستى ول.

جالپى، اۋداندا باستاماشىل جانە بەلسەندى ازاماتتار كوپ، ولارعا تەك قانا ءىسىن باستاۋعا كومەك كەرەك. «باستاۋ بيزنەس» جوباسى ول ءۇشىن تاپتىرماس مۇمكىندىك.