جامبىل وبلىسى شۋ اۋدانىنىڭ اكىمى جارىلقاسىن ايتاقوۆتىڭ جۇمىسىنا كوپشىلىك بۇگىندە ءدان ريزا. اكىم قىزمەتىنە كىرىسكەن بويى، قارا حالىقتىڭ قامىن كۇيتتەپ ءجۇر. وعان ءبىز العا اۋىلدىق وكرۋگى، ساۋىتبەك اۋىلىنداعى كەزدەسۋدە تاعى ءبىر مارتە كوز جەتكىزدىك، دەپ جازادى Qamshy.kz اقپارات اگەنتتىگى. اۋىل ماسەلەسى جونىندە مالىمدەگەن وكرۋگ اكىمى ب.ەسبەرگەنوۆ پەن اۋىل تۇرعىندارىنىڭ ايتۋىنشا، مۇندا دا جايىلىمدىق جەر، كوشە جولدارىن اسفالتتاۋ، ەسكىرگەن ەلەكتر باعاندارىن اۋىستىرۋ، كانالدى تازارتۋ سىندى ماسەلەلەر كوپ ەكەن. سونىمەن قاتار، اۋىز سۋ ماسەلەسى، مەكتەپ جولىن جارىقتاندىرۋ قاجەتتىگى دە ايتىلۋدا.

تۇرعىنداردىڭ مۇڭ-مۇقتاجىن مۇقيات تىڭداعان اۋدان اكىمى ءار سۇراققا تىڭعىلىقتى، جۇيەلى جاۋاپ بەردى. مىسالى، ج.ايتاقوۆ اۋىلداعى ەڭ ۇلكەن ماسەلە – اۋىز سۋ ماسەلەسى ەكەندىگىن، ونىڭ رەسپۋبليكالىق بيۋدجەت قاراجاتى ەسەبىنەن عانا شەشىمىن تاباتىنىن ايتتى. قازىرگى تاڭدا اۋىز سۋ بويىنشا جسق دايىندالۋدا. ول مەملەكەتتىك ساراپتامادان ءوتىپ، وڭ ناتيجە الىپ شىقسا، رەسپۋبليكالىق بيۋدجەتتەن قاراجات بولىنەدى. شامامەن ءبىر جىل ىشىندە اۋىز سۋ پروبلەماسى شەشىمىن تابۋى مۇمكىن. ەكىنشىدەن، جول ماسەلەسىنە كەلگەندە سۋ قۇبىرىن جۇرگىزبەي تۇرىپ، جول جوندەۋدىڭ قاجەت ەمەستىگىن نازارعا سالدى. ويتكەنى، كوپشىلىك كورىپ جۇرگەندەي، ءبىرىنشى جولدى اسفالتتاپ، مۇنان كەيىن ونى قايتا قازىپ سۋ قۇبىرىن جۇرگىزۋ ەكى شىعىن بولسا، ەكىنشىدەن بۇزىلعان جولعا قايتا قاراجات قاراستىرىلمايتىنى، ول جول قايتادان جوندەلمەيتىنى انىق. سول سەبەپتەن، ءبىرىنشى سۋ قۇبىرى، سودان سوڭ جول ماسەلەسىنە كوشۋ ۇيعارىلدى. ال، اۋىلدى گازداندىرۋ ماسەلەسىنە كەلەر بولساق، كوگىلدىر وتىن اۋىل شەتىنە دەيىن كەلەتىنى، اۋىل ىشىنە، كوشەلەرگە گاز قۇبىرىن جۇرگىزۋ تۇرعىنداردىڭ كوگىلدىر وتىنعا قوسىلۋ بەلسەندىلىگىنە بايلانىستى ەكەندىگى، ويتكەنى، اۋىل ىشىنە گاز قۇبىرىن تارتۋ تۇرعىنداردىڭ گازعا قوسىلۋ قۇنىنان تۇسكەن قاراجات ەسەبىنەن جۇزەگە اسىرىلاتىنى ءتۇسىندىرىلدى. كانال تازالىعى بويىنشا «كازسۋشار» مەكەمەسى كانالداردى كەزەكپەن تازالايتىنى ايتىلعانىمەن، سۋدى بوگەپ تۇرعان كانال ورتاسىنداعى زاڭسىز ورناتىلعان گيدروقۇرىلعىنى الىپ تاستاۋدى سۋ شارۋاشىلىعى مەكەمەسىنىڭ مامانىنا ەسكەرتىپ، بۇل ماسەلەنى پوليسيا قىزمەتى ارقىلى بولسا دا شەشۋ قاجەتتىگىن جەتكىزدى. مەكتەپ جولىن جارىقتاندىرۋدى وكرۋگ اكىمىنە مىندەتتەسە، ەسكىرگەن ەلەكتر باعاندارىن اۋىستىرۋ نەمەسە جوندەۋدى اۋدان اكىمدىگىنىڭ تكش، جك جانە اج ءبولىمىنىڭ باسشىسىنا تاپسىردى.

وسىلايشا ج.ايتاقوۆ: «حالىقتىڭ تۇرمىستىق احۋالىن ارتتىرۋ، اۋىلدىڭ الەۋمەتتىك جاعدايىن كوتەرۋ ەڭ كۇردەلى ءارى ءبىرىنشى كەزەكتەگى ماسەلە. ەندىگى ماقسات كوتەرىلگەن ماسەلەلەردىڭ شەشىمىن تابۋ بولعاندىقتان، مەن وسى باعىتتا جۇمىس جاسايتىن بولامىن. ويتكەنى، قۇرعاق ۋادەمەن كۇن وتكىزۋدىڭ زامانى ءوتىپ كەتتى. دەگەنمەن، بار ماسەلە ۋاقىت پەن قاراجاتقا بايلانىستى. وسى ەكەۋى ۇيلەسىمىن تاۋىپ جاتسا، قوردالانعان پروبلەمالاردى بىرتىندەپ رەتكە كەلتىرۋگە بولادى»،-دەپ جۇرتشىلىقتىڭ جانارىنا ءۇمىت وتىن سەۋىپ كەتتى.