جامبىلدىق ديقاندار بيىل 687،1 مىڭ گەكتار اۋىل شارۋاشىلىعى القابىنا ەگىن ەككەن. قامباعا 763،2 مىڭ توننا استىق قۇيىلىپ، استىقتى القاپتاردىڭ گەكتارعا شاققانداعى ونىمدىلىگى 23 سەنتنەردى قۇراعان، دەپ جازادى Qamshy.kz اقپارات اگەنتتىگى.
اعىمداعى جىلى جامبىلدىق ديقاندار 352،4 مىڭ گەكتار اۋماققا ماساقتى، 60،9 مىڭ گەكتارعا مايلى داقىلدار ەكسە، 10،1 مىڭ گەكتار القاپقا كارتوپ ەكتى. مۇنان بولەك 66،3 مىڭ گەكتارعا كوكونىس-باقشا داقىلدارى ورنالاستىرىلسا، ستراتەگيالىق داقىل سانالاتىن قىزىلشا القابىنىڭ جالپى كولەمى 5،6 مىڭ گەكتاردى قۇرادى. بيىل ءوڭىر شارۋالارى نەگىزىنەن كوكونىستەر مەن باقشا داقىلدارىن كوپتەپ وسىرۋگە كۇش سالدى. سونىڭ ەسەبىنەن اتالعان داقىل تۇرلەرى 18،6 مىڭ گەكتار القاپقا ارتىق ەگىلىپتى.
كۇزگى جيىن تەرىننىڭ العاشقى ناتيجەلەرىندە اعىمداعى جىلى قامباعا 763،2 مىڭ توننا استىق قۇيىلعان. ورتاشا ونىمدىلىك گەكتارىنا 23 سەنتنەرگە تەڭ. كۇنى بۇگىنگە دەيىن 60،9 مىڭ گەكتارعا ەگىلگەن مايلى داقىلداردىڭ 39 مىڭ گەكتارى ورىلعان. ولاردان الىنعان ءونىمنىڭ جالپى كولەمى 27،9 مىڭ گەكتاردى قۇرايدى. بۇل دەگەنىڭىز وڭىردەگى مايلى داقىلداردىڭ ءار گەكتارىنان 7،1 سەنتنەر ءونىم جينالعانىن بىلدىرەدى.
سول سەكىلدى جامبىلداعى كارتوپتى القاپتارداعى ونىمدىلىكتە وتە جوعارى كورسەتكىشكە قول جەتكىزىلگەن. جالپى اۋماعى 230،8 مىڭ گەكتار القاپقا ەگىلگەن «ەكىنشى ناننىڭ» ءار گەكتارىنان ورتا ەسەپپەن 270،5 سەنتنەر ءونىم جينالدى.
بيىل ءوڭىر ديقاندارى باسىمدىق بەرگەن كوكونىس-باقشا القاپتارى 99،9 پايىزعا جينالعان. سايكەسىنشە ەگىن شارۋاشىلىعىنىڭ ەڭ ماڭىزدى سەكتورى سانالاتىن بۇل داقىلدىڭ ءار گەكتارىنان 27،3 توننا ءونىم جينالىپ، ديقاندار ەڭبەگى ەسەلەنىپ قايتتى.
بۇگىندە كەيبىر شارۋاشىلىقتار كۇزگى-جيىن تەرىم ناۋقانىنىڭ نەگىزگى باعىتتارىن اياقتاپ، كۇزدىك بيدايدى سەبۋ جۇمىستارىنا كىرىسىپ تە كەتكەن.
–اعىمداعى جىلى وبلىستا 114 مىڭ گەكتار القاپقا كۇزدىك بيداي سەبۋ جوسپارلانىپ وتىر. بۇل جۇمىستارعا 5063 تەحنيكا جۇمىلدىرىلماق. سونداي-اق جالپى كولەمى 16 200 توننا بولاتىن جانار-جاعارماي قورى جەتكىلىكتى. كۇزگى دالا جۇمىستارىن قاجەتتى قارجىنى الۋدا جامبىلدىق شارۋالار «كەڭ دالا»، «ەگىنجاي» سىندى نەسيەلەندىرۋ باعدارلامالارىنىڭ مۇمكىندىكتەرىن پايدالانۋدا، –دەيدى وبىلس اكىمدىگىنىڭ اۋىل شارۋاشىلىعى باسقارماسى باسشىنىڭ ورىنباسارى ەرلان قۇلكەيەۆ.
پىكىر قالدىرۋ